قصة راجل عاش 100 يوم بـ قلب صناعي من التيتانيوم

راجل أسترالي عاش لمدة 100 يوم بـ قلب صناعي من التيتانيوم في الوقت اللي هو مستني فيه يعمل عملية زراعة قلب.. واللي تعتبر أطول مدة تقريبًا لحد دلوقتي شخص يعيش بيها بـ قلب صناعي.. فتعالوا نعرف أكتر إيه هي الحكاية دي؟

حسب CNN و SkyNews و TheGuardian

قصة الراجل وزراعة القلب الصناعي:

المريض عنده 40 سنة وفي شهر نوفمبر اللي فات كان زرع القلب الصناعي في مستشفى سانت فينسنت بسيدني.. وخرج من المستشفى بعدها وفضل عايش بالقلب الصناعي عادي لحد ما جه دوره في زراعة القلب وعمل العملية في شهر مارس وكان فات على زراعة القلب الصناعي 100 يوم وتعتبر أطول مدة حد يعيشها بقلب صناعي 

وحسب بيان من المستشفى الراجل بيتعافى بشكل كويس وده مؤشر كويس إن جهاز القلب الصناعي ده ممكن يتم الاعتماد عليه في حالات زراعة القلب اللي مستنية دورها.. لكن الجهاز لسه تحت التجربة ولسه ماتمش اعتماده للاستخدام العام

إزاي الجهاز بيشتغل؟

الجهاز عبارة عن جزء واحد متحرك بيتثبت في مكانه بمغناطيس ومفيهوش صمامات ولا حاجات ميكانيكية عشان ميتعرضش للتآكل وبيضخ الدم للجسم والرئتين وبيحل محل البطينين في القلب المصاب أو البايظ بمعنى أصح

الهدف منه

الهدف على المدى البعيد هو استخدام الجهاز لإنقاذ الناس الكتير اللي بتكون في قائمة الانتظار بتاع زراعة القلب 

وبيقول البروفيسور “هايوارد” المشرف على المريض الأسترالي واللي شارك في إعداد الجهاز الصناعي إن خلال العقد المقبل هنشوف القلب الصناعي بديل للمرضى اللي مش قادرين يستنوا في قوائم الانتظار قبل عمليات زراعة القلب وخصوصًا لو مفيش متبرعين متاحين!

التجارب عليه

والجهاز تم تجربته في دراسة جدوى مبكرة أجرتها إدارة الغذاء والدواء في الولايات المتحدة وشهدت نجاح التجربة لخمس أشخاص

أول واحدة فيهم تمت في يوليو 2024 لراجل عنده 58 سنة يعاني من قصور قلبي في مرحلته الأخيرة والجهاز خلاه عايش لمدة 8 أيام لحد ما توفر متبرع بقلب وبعدها تمت التجربة على 4 تانيين ولكن أطول واحد فيهم هو آخر تجربة اللي فضلت لحد 100 يوم

تفتكر الجهاز ده هينجح يكون بديل فعلًا للناس اللي بتدخل قائمة الانتظار في زراعة القلب خلاص؟ وإيه أقصى مدة ممكن يقعدها الجهاز يخلي الشخص عايش فيها لحد ما يلاقي متبرع؟