حكاية رواد الفضاء اللي بقالهم 9 شهور عالقين في الفضاء ومش عارفين يرجعوا

رائدين فضاء أمريكيين فضلوا عالقين في الفضاء لمدة 9 شهور بعد ما كانت مدة مهمتهم 8 أيام.. ياترى ليه طولوا كل المدة دي؟ وإيه القصة؟

القصة بدأت في 5 يونيو 2024، لما شركة “بوينج” أطلقت مركبتها “ستارلاينر” وعليها رائد الفضاء “باري بوتش ويلمور” و”سونيتا ويليامز” لمحطة فضائية، ودي كانت أول رحلة مأهولة للمركبة، والمفروض كانوا هيرجعوا بعد 8 أيام، بس لاحظوا عطل لخمسة من محركات الدفع وقت الإقلاع وتسريبات هيليوم؛ فوكالة “ناسا” شافت إن صعب يكملوا المهمة ولازم يوصلوا لحل طارئ يرجعوا بيه الطاقم، وقررت “ناسا” ترجع المركبة فاضية من غير طيار في سبتمبر 2024، وفضل الرائدين موجودين في محطة الفضاء الدولية لمدة 9 شهور، ومدة إقامتهم المطولة دي كانت أطول من مدة الإقامة الاعتيادية اللي بيقعدها رواد الفضاء في المحطة الدولية.

ووكالة “ناسا” أجلت رجوع الرائدين أكتر من مرة؛ وده اللي خلق تخوف كبير إن الطاقم يفضل عالق في الفضاء، وشركة “بوينج” ساعتها قالت إن الإقامة الطويلة للطاقم هدفها إنهم يتأكدوا من مراجعة المشكلات الفنية اللي واجهتها الكبسولة وقت سفرها لمحطة الفضاء الدولية، والمراجعة دي كشفت عن مشاكل كتير دفعت وكالة “ناسا” إنها ماتقدرش تحدد ميعاد معين لرجوع الرواد للأرض.

ووكالة “ناسا” وشركة “سبيس إكس” التابعة لـ “إليون ماسك”، أطلقت مركبة “كرو- 10” فيها 4 رواد فضاء لمحطة الفضاء الدولية يوم 16 مارس 2025، علشان يرجعوا الرائدين للأرض، وبعد 29 ساعة من إطلاقها، التحمت كبسولة “سبيس إكس” بمحطة الفضاء الدولية، والرائد “ويلمور” و”ويليامز” هيسيبوا محطة الفضاء الدولية يوم الأربع مع رائد فضاء من وكالة “ناسا” اسمه “نيك هيج” ورائد الفضاء الروسي ألكسندر جوربونوف.

9 شهور في الفضاء، مدة طويلة ويمكن كمان مخيفة، فيا ترى قضوا وقتهم خلال المدة الطويلة دي إزاي؟

الرائدين الفضائيين كانوا بينفذوا تجارب علمية وبيعملوا صيانة للمحطة وبيلعبوا رياضة كمان لمدة ساعتين كل يوم علشان يحافظوا على كتلة العضلات، ماشيين بمبدأ “أنا في الحالات اللي زي دي أحب أسمع سامو زين جدًا”، لا وكمان احتفلت الرائدة “سونيتا ويليامز” بعيد ميلادها الـ 59 في الفضاء، وعيلتها بعتتلها برطمان من زبدة الفول السوداني.

تفتكر لو كنت مكانهم، ومش عارف مصير رجوعك إيه، هتفضل بنفس ثباتهم الانفعالي ده؟ ولا هتـ Panic؟