11 كتاب محتاج تقرأهم لو مستني طفل أو بتخطط للخلفة

مع جملة “مبروك مراتك حامل” بتجيلكم مشاعر ملغبطة.. فرحانين إن هييجي بيبي وفي نفس الوقت بتعيشوا لحظة إدراك للمسؤولية الكبيرة اللي هتكون عليكم.. لأن فجأة بدل ما مشاكلكم هتاكلوا إيه وفين هتبقى حاجات تانية أكبر.. وعشان كده جمعنالكم 11 كتاب لو مستنيين طفل أو بتخططوا للخلفة

1. رحلة الحياة دليل الأسرة الشامل لصحة طفلك النفسية والجسدية

الكتاب ده فيه الزتونة لأنه جامع بين الطب والطب النفسي وفن التربية.. وبيشرح مراحل الحمل والولادة وكمان مراحل نمو جسم وذهن الطفل من الولادة لحد سن 18 سنة.. وبيقولكم إيه التطعيمات اللي لازم ياخدها الطفل.. وإيه أشهر الأمراض النفسية والجسدية اللي بتيجي للأطفال في المراحل المختلفة.. وفيه رسومات بتقولكم تعليمات تعملوها مع الطفل هتساعدكم تفهموا احتياجاته

 2. طفل المخ الكامل

الكتاب بيشرح إزاي تخلوا مخ طفلكم ينمو بشكل كامل.. وبيوضحلكم كل جزء في دماغه بيشتغل إزاي ومسؤول عن إيه.. وبيقدملكم 12 استراتيجية تساعد على النمو الصحي لمخ الطفل بيناسبوا المراحل العمرية المختلفة

3. الأطفال لا يفهمون كلمة لا

لو مش عاوزين تعاقبوا طفلكم بطريقة غلط وتأثروا على نفسيته بس برضه لازم توصلوله إن تصرفه غلط بس مش عارفين إزاي.. فالكتاب ده بيديكم طرق صحية للعقاب وتعديل السلوك بشكل صحي.. وتتعاملوا إزاي مع العند

4. سترونج Mom

لو عرفتي من الدكتور إن البيبي اللي جاي ولد.. فأكيد هتحتاجي تقرأي الكتاب ده اللي بيقولك من الآخر كده إزاي تربي Gentleman.. وتدربيه على دخول الحمام وتجهزيه للمدرسة.. وتخليه يبطل عصبية وتعلميه النظام.. وكمان تحميه إزاي من التحرش  

5. التربية الإيجابية السنوات الثلاث الأولى

عشان استقبال أول بيبي حاجة صعبة.. الكتاب ده بيساعدكم إزاي تستعدوا للمرحلة دي وبيعرفكم إزاي تفهموا احتياجاته وطريقة تفكيره.. وبيشرح إزاي أول 3 سنين من حياة البيبي بتأثر على شخصيته.. وإيه طرق التربية الصح وإزاي تعلموهم الاستقلالية.. وكمان بيديكم دليل لتغذية البيبي ومشاكل الرضاعة

6. مفتاح القوة

الكتاب بيعلمكم إزاي تستغلوا نقاط قوة طفلكم وتكتشفوا معاه مواهبه بدل التركيز على غلطاته.. وإزاي تشوفوا الجانب الإيجابي من تصرفاته

7. فن التعامل مع الأطفال

الكتاب بيقدملكم نصايح عن كل مرحلة وموقف بتمروا بيه مع البيبي.. وإزاي تعملوا ليه روتين ونظام نوم.. وعشان بتبقوا عاوزين تطمنوا البيبي  نموه طبيعي ولا لا.. فالكتاب عالم جدول لوزن وطول البيبي في كل مرحلة.. وبيشرح مواضيع جديدة عليكم زي التسنين والفطام والزحف

8. كتالوج الأمومة 

الكتاب ده ليكي كأم جديدة عشان بيتكلم عن كل مشاكل الرضاعة وأنواعها سواء الطبيعية أو الصناعية.. وكمان عن المشاكل اللي بتواجهك في الفترة دي

9. طفلي يتكلم

ولو مش عارفين الطفل المفروض يتكلم إمتى.. فالكتاب ده بيقدملكم دليل كامل عن كلام الطفل وتواصله وبيقولكم إيه أحسن الطرق اللي تنموا بيها مهارات التواصل بتاعته.. وإزاي تتجنبوا يحصله أي مشاكل في الكلام 

10. ألف باء الصحة النفسية للأبناء

الكتاب بيفهمكم مراحل النمو النفسي عند الطفل وإزاي تقدروا تبنوا علاقة قوية معاه.. وكمان تساعدوه إزاي يطور مهاراته الاجتماعية والعاطفية 

11. لأنها تفرق

الكتاب ده هيساعدكم في كل مرحلة عمرية عشان هيفهمكم احتياجاته ومتطلباته.. وهيفهمكم التقلبات النفسية والمزاجية ليه وإزاي تتعاملوا معاها من خلال استراتيجيات مبنية على تجارب ناس

وفي الآخر نحب نقولكم مفهوم إن تربية البيبي مسؤولية تخض بس أديكم عرفتوا كام كتاب هيسهل عليكم الرحلة.. وافتكروا إن تربيته هي مسؤوليتكم انتم الاتنين.. وماتكونوش قاسيين على نفسكم طبيعي ممكن تتصرفوا غلط وده عشان ببساطة دي أول مرة ليكم في الدنيا وأول مرة ليك تكون أب أو أم