إزاي تتعامل مع خسارة فريقك المفضل؟
![](https://theglocal.com/wp-content/uploads/2022/02/37.png)
من اللحظات الصعبة جدا على أي مشجع لفريق سواء كان متعصب أو مش متعصب حتى إنه يشوف فريقه أو فريق بلده بيخسر في أي رياضة أو لعبة بيتابعها.. وبعد خسارة الأهلى النهاردة من نادي باليرمو س البرازيلي في نصف نهائي كأس العالم للأندية وخسارة المنتخب من السنغال في ماتش نهائي الأمم الأفريقية حس أغلب المصريين بخيبة أمل كبيرة خصوصا بعد العشم والأمل اللي كان عندهم إن فرقهم تفرحهم ويكسبوا.
ولإن الخسارة أمر طبيعي ووارد يحصل وطبيعي برضه تزعل وتضايق لو فريقك خسر لإن أكيد عندك مشاعر وبتحس.. خلينا نقولك تعمل إيه لما تشوف فريقك خسر وتحس إنك حزين زي ما قال موقع “wikihow” في واحد من مقالاته:
1- اتكلم مع حد بيحب الرياضة دي زيك:
الرياضة عموما تجربة جماعية وأغلب الناس بتحب تتفرج عليها مع بعض، بس لو كنت بتتفرج لوحدك قوم كلم حد من صحابك مشجعين الفريق ده أو اتكلم معاهم لو قاعد معاهم ونفس عن خيبة أملك لإن فريقك خسر.
2- اقفل التليفزيون:
لو كنت بتتفرج على الماتش على التليفزيون وفريقك خسر اقفل التليفزيون واعمل حاجة تانية وشوف أي نشاط تاني تعمله عشان تشتت عقلك عن النتيجة دي، وياريت تبقى حاجة مختلفة عن الرياضة دي زي إنك تطبخ أو تقرأ كتاب أو تتفرج على فيلم.
3- اعترف بمشاعرك:
في بعض الأوقات بيبقى مسمحولك تعيط أو تتكلم عن قد إيه أنت متضايق أو غضبان عشان فريقك خسر وبلاش تمثل العكس وادي نفسك فرصة عشان تنفس عن مشاعرك أو على الأقل تحس بخيبة الأمل عادي، بس خلي الموضوع تحت السيطرة عشان مفيش سبب شخصي يخليك تغضب أو تحزن أوي.
4- كل أي حاجة بتحبها:
الأكل ممكن يبقى مصدر راحة كبير لما تواجهة خيبة الأمل بس اتأكد إنه يبقى أكل صحي لإن أغلب الناس في الأوقات دي بتاكل حلويات وأكل غير صحي.
5- مارس رياضة:
ممكن تعمل شوية نشاط بدني لإنه وسيلة بسيطة عشان تتخلص من الإحباط حتى لو شوية تمرينات زي الضغط أو القفز أو الجري أو تتمشى وده هيساعدك تتخلص من التوتر وخيبة الأمل.
6- افتكر إنها مجرد لعبة:
أه الخسارة بتبقى مؤلمة لكن حاول تفتكر إنها مجرد مباراة أو موسم واحد وإن فريقك يقدر يسجل مرات تانية وده هيخليك أقل إحباط ويبقى من السهل إنك تتخطى الخسارة وتتحمس عشان الماتشات اللي بعد كده.
7- خليك مخلص لفريقك:
على الحلوة والمرة معاه زي ما بيقولوا مشجعين النادي الأهلي لإن أكيد خسارة واحدة مش كفاية عشان تخليك تبطل تشجع فريقك فخليك مخلص حتى بعد الخسارة، بالإضافة كمان إن لما فريقك يكسب بعد كده هتحس إنك أحسن بكتير وإنه بيعوضك.
8- افتكر الأوقات الكويسة:
مفيش فريق بيخسر طول الوقت وعشان تتجاوز الهزيمة الكبيرة فكر في الأوقات الكويسة اللي فريقك فرحك فيها وكسب.
9- استعد للتعامل مع سخرية الفرق المنافسة:
السخرية والشتائم والهزار هي جزء من تجربة محبين الرياضة وبدل ما تتفاجأ بالكلام ده بعد الخسارة خليك مستعدله واتعامل معاه بشكل مناسب، وممكن تضحك وتسكت وماتردش عليهم، وبدل ما ترد استني لما فريقهم يخسر واتريق أنت كمان عليهم وهزر معاهم وخليك عارف إن ده مش هيغير نتيجة الماتش وهزر لإنه هيكون وسيلة تانية للتنفيس عن ضغطك وإحباطك.
10- خليك متفائل:
أعظم شئ في الرياضة إن دايما هيكون فيه مرة تانية وده معناه فرصة تانية للفوز وبدل ما تركز على خسارة المرة دي اتفائل إنه هيكسب المرات الجاية وخليك عارف إن الخسارة ممكن تبقى مفيدة لفريقة في المستقبل عشان هتديهم دفعة يصلحوا أخطاءهم.