5 أعضاء الإنسان يقدر يعيش من غيرهم عادي!

أي ألم جسدي حتى لو كان صغير بيخلينا نعرف قيمة كل جزء وكل عضو في جسمنا، لما بنقعد ونتأمل كم العمليات اللي بتحصل في الجسم وكل جهاز إزاي بيشتغل عشان صحتنا تبقى كويسة بنعرف إن جسمنا ده معجزة، لكن بعض الأبحاث والدراسات قالت إن فيه أجهزة مش ضرورية في جسم الإنسان، وفسروا وجودهم بإن الإنسان البدائي زمان كان بيحتاجهم أيام لما كان بيعيش في الغابات والكهوف وبيصطاد الغزلان، وكانت مفيدة فعلا وقتها لكن دلوقتي بقت زيادة على الجسم.

وفقاً لموقع “businessinsider” وبعض التقارير والأبحاث دي فالأعضاء هي:

1- ضرس العقل:

لو قبل كده جالك ألم في الجزء الخلفي من فكك وبدأت تحس إن مفيش حاجة أوحش من وجع الأسنان فعلا، فغالبا كنت بتعاني من وجع ضرس العقل، خصوصا لو روحت لدكتور أسنان وقالك إنه محتاج يخلع الضرس ده فهتخلعه عادي وهتحس إن مافيش أي تأثير عليك ولا على الأكل.

علماء أنثروبولوجيا الأسنان وعلماء الأحياء التطوري قالوا إن ¾ البشر بيعانوا من ضرس العقل وواحد من أسباب وجوده هو إنه كان الإنسان القديم بيستخدمه في مضغ الأكل عشان يتم هضمه أحسن.

وقالوا كمان إن الأسنان مابقتش مناسبة لفكنا، زي تسوس الأسنان اللي ماكنش على أيام أجدادنا ولو كان موجود ماكنش بصعوبة دلوقتي.

2- الزايدة:

هي عبارة عن عضو مجوف طوله بيتراوح من 10-5 سم وموجود في القولون، واللي دورها في الحيوانات هو تكسير السليلوز وهو نوع من الألياف الغذائية، لكن مش واضح دورها في جسم الإنسان، دكتور “جاي إلعاد” أخصائي الجراحة العامة من مركز مئير كلاليت الطبي بيقول إنها بتلعب دور معين في جهاز المناعة للجسم” وإن زمان الوضع كان مختلف لما كان الإنسان بيستهلك نباتات كتير في أكله وكان المفروض يهضم كميات كبيرة من السكر فكانت الزايدة بتساهم في ده.

حوالي 8% من السكان في العالم بيعانوا من التهاب الزائدة الدودية والظاهرة دي منتشرة بشكل كبير عند الأطفال الأصغر من سن 18 سنة، أو في البالغين فوق سن الستين”.

وبعض الدكاترة بيقولوا إن التهاب الزايدة بيجي في الجنب اليمن من البطن، واللي بيكون بسبب تورم الغدد الليمفاوية في المنطقة أو بسبب تعلق أجزاء من الأكل أوالبراز فيها، وبمجرد الانسداد البكتيريا بتكتر وده اللي بيسبب الالتهاب.. وعشان ييثبتوا إنها عضو مش مهم قالوا إن أي إنسان بعد ما بيشيلها بيعيش حياته عادي جدا زي قبل ما يشيلها.

3- عضلات الودن:

أكيد شوفت فيديوهات قبل كده لناس بتحرك ودانها أو ممكن تبقى أنت بتعرف تحرك ودانك أصلا بس على بسيط، والسبب ورا ده هو قوة عضلات الودان وزي ما هي قدرة غريبة زي ما هي مالهاش أي ميزة فسيولوجية عند البشر.

بس دكتور “جيرتي” بيقول إن فيه حيوانات كتير بتستخدم الميزة دي عشان يحركوا ودانهم زي القطط والكلاب، فهتلاقي إن أغلبنا مابيقدرش يحرك ودانه زيهم وعشان كده بيستنتج الدكتور إن الميزة دي كانت عندها واتدهورت.

4- العضلات الموقفة للشعرة:

عارف لما تسقع أو حد يقولك حاجة في ودنك أو تخاف فجسمك يقشعر وشعر جسمك يقف، ده كله بيحصل بسبب عضو اسمه “أريكتور بيلي”.

بعض الدكاترة بيقولوا إننا مش لوحدنا في الثدييات اللي بيحصل معانا كده فيه حيوانات تانية بتقشعر أو فروها بيقف لما تحس بتهديد أو برد، وبيقول إن فيه عضلات صغيرة بين الجلد وبصيلات الشعر اسمها “الممثل فيلي” ولما بتنقبض بنحس بالقشعرة دي.

بس هل فعلا الإنسان محتاج العضلات دي؟ بمعني إنها عند الحيوانات لما بيواجهوا تهديد بيبانوا بحجم أكبر لإن فروهم بيتمدد أما بالنسبة لنا مفيش أي سبب يخلي شعر الجسم يقف أو يقشعر أو مفيش فايدة منه.

5- عضو جاكبسون:

أكيد لاحظت قبل كده إن الكلاب بتشم منطقة الفخذ عندها وده بسبب إنها بتبقى عايزة تشم الفيرومونات، واتضح كمان إن البشر عندهم نفس العضو الشمي الصغير واسمه “عضو جاكسون”.

عضو جاكسون بيبقى موجود بين المناخير والفم في الإنسان وبيتدهور لما الجنين بيكبر زي بالظبط أسماك القرش والخفافيش والقرود، ووفقا لدراسات كتير مافيش أي اتصال عصبي بين عضو جاكسون والجهاز العصبي المركزي، عشان كده في الغالب هو مش مهم برضه.