أفضل 8 أعمال فنية عن الهروب من السجن للحرية

أفلام الهروب من السجن بتكون من نوعية أفلام الإثارة اللي بتخليك قاعد على أعصابك مع البطل وتعيش معاه رحلته وهو بيحاول يهرب ويا سلام لو الهروب بخطة ذكية أو باستخدام أدوات بسيطة، بتخليك تعيش ساعة ونص أو ساعتين من العظمة وأنت بتتفرج.

جمعنالك أفضل 8 أعمال عن الهروب من السجن عشان لو حبيت تعيش جو الإثارة وتتسلى.. وأول فيلم هنتكلم عليه هو الفيلم رقم 1 في قائمة أعلى الأفلام تقييما على موقع IMDB

1- فيلم “The Shawshank Redemption”:

الفيلم بيحكي عن “أندي دوفرسن” اللي محكوم عليه بالسجن المؤبد في سجن شاوشانك بعد ما تم اتهامه ظلم بقتل مراته وعشيقها، وخلال تواجده في السجن بيتعرف على “ريد” اللي بيكون رفيقه خلال رحلته الصعبة في سجن شاوشانك.

2- مسلسل “Prison Break”:

“لينكولن بوروز” بيتحكم عليه بالإعدام ظلم لقتله شقيق نائب الرئيس ولكن أخوه “مايكل” بيفتعل جريمة ويطلب يتسجن في السجن اللي أخوه فيه عشان يقدر يدخله ويهربوا مع مساجين تانيين.

3- فيلم “Papillon”:

الفيلم بيتكلم عن هنري شاريير اللي معروف باسم “بابيلون” والمتهم بالقتل، وبيقضي عقوبته في سجن معسكر عمل على جزيرة في غيانا الفرنسية، وهناك بيتعرف على “لويس ديجا ” اللي بيأدي دوره “رامي مالك” وبيحاولوا هما الاتنين بالاشتراك مع مساجين تانيين الهروب من السجن اللي سمعته سيئة وبيتم معاملة السجناء فيه بشكل غير آدمي.

4- فيلم “Escape From Alcatraz”:

قصة الفيلم بتدور عن “فرانك موريس” السجين الذكي اللي قدر يهرب من كذا سجن شديد الحراسة لحد ما بيتم سجنه عشان يقضي عقوبة مدى الحياة في “ألكتارز” وهو أكتر سجن مؤمن في الولايات المتحدة الأمريكية وموجود على جزيرة، لحد ما بيتعرف على “فريد وارد” و”جاك تيبو” وبيخططوا مع بعض بشكل دقيق عشان يهربوا من السجن.

5- فيلم “Midnight Express”:

الفيلم مقتبس عن قصة حقيقية بتتكلم عن “بيلي هايز ” اللي اتورط في تهريب مخدرات من تركيا وتم الحكم عليه بـ4 سنين سجن واتضاف له عليهم 30 سنة كمان وبيتم إيداعه في أحد سجون تركيا اللي كان فيها بيئة السجن غير آدمية، وبيتم تعذيب المساجين وتعذيب بيلي كمان، وبيلي فكر يا يكمل حياته في السجن لحد ما يموت جواه، أو يستعيد حياته وحريته ويخرج برا السجن ده.

6- فيلم “Rescue Dawn”: 

الفيلم بيحكي عن طائرة أمريكية كانت في مهمة سرية ووقعت الطيارة في الغابات خلال قصف دولة لاوس في آسيا سنة 1965، وطاقم الطيارة بيقع في أسر قوات “الفيت كونج” واللي هي كانت حركة مسلحة فيتنامية، واللي بتبعتهم لمعسكر أسرى وهناك بيتم تعذيبهم، لحد ما بيفكر الرائد “ديتر دنجلير” إنه يحط خطة للهروب ولكن… اتفرج أحسن.

7- فيلم “Escape Plan”:

الفيلم ده بيرجعنا للأيام الجميلة لإنه بيجمع بين نجمين الأكشن المفضلين لأي شخص بيحب الأفلام الأكشن، هناك راي بريسلين “سيلفستر ستالون” اللي بيخش السجن بمزاجه وإرادته لإن دي مهنته، وهو إنه يخش السجون يهرب منها عشان يكتشف ثغراتها ويخليها سجون مستحيل الهروب منها، ولكن في مرة بيدخل سجن عشان يشوف شغله فيه ولكن بيكتشف إنه مش هيخرج تاني، وهناك بيتعرف على سوان روتماير “أرنولد شوارزنيجر” اللي بيحاولوا يعرفوا طريقة للهروب.

8- فيلم “The Great Escape”:

هو فيلم أمريكي من إنتاج 1963، بيحكي قصة حقيقية حصلت خلال الحرب العالمية التانية عن مجموعة ضباط وجنود من دول التحالف بيتم اعتقالهم كأسرى حرب في معتقل نازي ولكن بيحطوا خطة للهروب من السجن وتهريب مئات المساجين معاهم.