ليه الرجالة بتعيط في ماتشات الكورة مـن غير مـا تتكسـف؟
كأس العالم بيبقى عيد للرجالة وبتكتر بقى مشاهد التشجيع والزعيق وكمان العياط رغم إن نادرًا ما بنشوف راجل بيعبر عن مشاعره.. وفي مؤتمر للجمعية البريطانية لعلم النفس قالت الدكتورة النفسية “مويرا ماغواير” إن 9 من كل 10 رجالة عيطوا بسبب ماتش كورة..طب ليه أصلًا ماتشات الكورة هي المكان الوحيد الآمن اللي الرجالة بتعيط فيه من غير كسوف؟
أسباب عياط الرجالة في ماتشات الكورة
- المساحة الآمنة: المجتمع بيربي الراجل على النشفان والقوة وأي حاجة عكس ده بتبقى ضعف.. فمابيلاقيش مساحة يعبر فيها عن مشاعره إلا في الكورة خاصة إنها لعبة عنيفة.. فبالنسبة له وبالنسبة للمجتمع ردود فعله حتى لو كانت عياط هتبقى مشاعر قوية تجاه لعبة عنيفة ورجولية
- الوفاء: الراجل بيشوف دموعه في الملعب على إنها علامة على الولاء والانتماء الوفي لفريق معين.. عكس دموعه في العلاقات بيشوفها علامة على الضعف
- سرعة المشاعر: ماتش الكورة بيبقى سريع وكل المشاعر بتبقى في ساعتها.. وده عكس العلاقات اللي بتطور ببطء وبياخد وقت عقبال ما يستوعب المشكلة اللي فيها
- الهوية: الفريق اللي بيشجعه بيبقى عيلته اللي اختارها.. فمشاعره بتبقى مشاعر جماعة كاملة مش مجرد مشاعر شخصية.. فالخسارة بتبقى خسارة متشاركة مابتهددش هويته الشخصية أو رجولته.. ولو حتى عيط دموعه بتبقى مستخبية وسط باقي المشجعين في المدرجات
- الهرمونات: هرمون التستوستيرون بيعلى وقت الفوز وبيقل جامد وقت الخسارة.. فاللغبطة المفاجأة اللي بتحصل دي بتعلي هرمون الكورتيزول وكمان بتضعف الجزء المسؤول عن التحكم في الانفعالات بالدماغ.. فالدنيا بتبوظ خالص وبيعيط
- الكبت: الرجالة بيمروا بمواقف صعبة كتير في يومهم ومعندهمش وقت حتى يفهموا أو يحلوا كل الحوارات دي.. فالـ 90 دقيقة بتاعة ماتش الكورة بيطلعوا فيها كل الكبت بتاع الأيام اللي فاتت كلها.. فممكن الفاول اللي ماتحسبش مايبقاش هو بس السبب اللي بيخليه بيعيط.. هو لقاها فرصة يطلع اللي جواه بالمرة
وفي الآخر بعد الأسباب دي طلعت الكورة هي الحاجة اللي بتحسن مزاج الرجالة وتخليهم يعبروا عن مشاعرهم خاصة إنهم مابيحكوش عن اللي مضايقهم عكس الستات.. فافتح الماتش كده نشوف بيقول إيه واتبسط!
