8 خطوات عشان تخليه “سويت نوفمبر” عليك
كلنا بنبقى مستنين شهر نوفمبر يجي عشان نقول إنه هيبقى “سويت نوفمبر” وهيبقى شهر مختلف عن باقي الشهور اللي عشناها طول السنة وهيحصل فيه أحداث لطيفة ومش هتحصل أي حاجة تضايقنا، وبنفضل نرتب إزاي يبقى “سويت نوفمبر” ونستخدم اسم الفيلم وأول كام يوم من بداية نوفمبر بنبهدل الفيلم معانا وآخر الشهر بنلاحظ إنه ماكنش “سويت” ولا حاجة.
في بداية شهر نوفمبر قررنا نقولك شوية نصايح عشان تتبسط على الأقل بالشهر الخريفي الجميل ده ويبقى “سويت نوفمبر” شوية:
1- اتمشى:
استغل الجو الخريفي واتمشى على قد ما تقدر، طبعا مش لازم تبقى عداء وتتمشى مسافات كبيرة بس اتمشى وشم هوا حتى لو لوحدك لإن ده هيديك إحساس الانتعاش وهتجدد طاقتك وهتبعد عن الضغوطات اللي عندك، وياريت لو عرفت تتمشى وقت غروب الشمس عشان تشوف أشكال السما والسحاب والشمس في الغروب بتبقى شكلها حلو فعلا.. وممكن تصورها وتنزلها في الستوريز.
2- اعمل أكل:
في الصيف غالبا مابنقدرش نستحمل وقفة المطبخ لإن الجو بيبقى حر جدا وبتحس إنك بتتشوي زي الفرخة، بعدين يجي الشتا تبقى برضه مش قادر تقوم من تحت الغطا ولا تبل ايديك، فحاول تستغل الوقت ده إنك تجرب وصفات أكل جديدة وتخبز وتخلي ريحة المخبوزات في البيت عشان تديك إحساس بالدفء والأمان.
3- ولع نار مع صحابك:
اسهر مع صحابك في يوم في مكان مفتوح وممكن تعملوا “كامبينج” وتولعوا نار وتتفرجوا على السماء، حتى لو هتروحوا مكان في الأرياف مش لازم صحراء وتبعدوا عن دوشة المدينة وتفصلوا شوية بس هتعيش ليلة هادية وهتتبسط بالهدوء والسلام النفسي اللي هتحس بيه.
4- استغل البلاك فرايداي:
كلنا عارفين إن الـ”شوبينج” بيخلينا نتبسط وبنستريح شوية، فبدل ما تصرف فلوسك من أول الشهر حوش شوية أول الشهر ده واستغل البلاك فرايداي اللي عروضه بتبدأ من نص الشهر تقريبا عشان تجيب حاجات جديدة لنفسك وتدلع نفسك.
5- ظبط دولابك:
ده موسم إنك تطلع الهدوم الشتوي وتدخل الهدوم الصيفي، وبدل ما تخلي حد يعمل الخطوة دي بدالك رتب أنت الدولاب بنفسك، عشان على الأقل تبقى عارف مكان الحاجة باقي الشتاء وتبقى عملت نشاط مفيد تستفيد بيه الكام شهر الجايين.
6- اتفرج على أفلام:
مش طول الوقت لازم تفرهد نفسك ممكن تقعد تحت الغطا وتعمل فشار وتجهز أفلام ومسلسلات وتتفرج عليهم، وشوف لو حد من صحابك فاضي يتفرج معاك مثلا، لو مافيش عادي ممكن تتفرج لوحدك.
7- اخرج في جناين:
عارفين طبعا إن الجناين والزرع والخضرة موجودين طول السنة، بس الجو ده بالذات الصبح مناسب إنك تخرج مع أهلك أو صحابك “بيكنيك” وفرشتوا ملاية على النجيلة وخدتوا فطار معاكوا ومش هتعرف تلاقي جو مناسب زيه غير في شهر 3 اللي جاي وعليك خير.
8- حب روح للناس يا حب:
لو أنت “سينجل” وقدامك شخص مناسب أو حاسس إن فيه احتمال يبقى فيه بينكوا حاجة، خد الخطوة وماتفوتهاش، اهو تبقى شوفت حلاوة البدايات في جو حلو وعقبال ما الشتاء يدخل تبقى مرتبط وماتقعدش تقول إن عندك فراغ عاطفي والشتاء عايز ناس مرتبطة وحضن عشان يدفيك بدل الكاكاو الساخن وكلام الفيسبوك ده.
