ليه هاري كين يعتبر واحد من أكتر المهاجمين الـ”Underrated”؟
في عالم كرة القدم، كلمة Underrated أو “إندريتد” معناها إن اللاعب قيمته الحقيقية أكبر بكتير من التقدير اللي بياخده مش شرط يكون مجهول أو مش نجم لكن بيكون لاعب بيقدم مستويات استثنائية وتأثير ضخم مع فريقه ومع ذلك الإعلام والجماهير وحتى الجوائز الفردية ما بتديهوش المكانة اللي يستحقها.
وفي العادة اللاعب الإندريتد بيكون بيعمل شغل كتير الناس مش بتلاحظ مش بس بيسجل أهداف لكن بيشارك في بناء الهجمات وبيفتح مساحات وبيجذب المدافعين وبيساعد الفريق تكتيكيًا وحاجات كتير أرقام الأهداف لوحدها مش بتوضحها.
ولما نبص على الجيل الحالي هنلاقي إن هاري كين من أكتر اللاعبين اللي ينطبق عليهم الوصف ده عشان يواصل نفس الأداء دة في كأس العالم مع إنجلترا لكن بردوا نفس الفكرة العين بتروح لليونيل ميسي وكيليان مبابي ولاعيبة تانية.
ماكينة أهداف من غير ما ياخد التقدير اللي يستحقه
لما الناس بتتكلم عن أفضل مهاجمي الجيل الحالي غالبًا هتسمع أسماء زي إرلينج هالاند كيليان مبابي أو روبرت ليفاندوفسكي قبل هاري كين وده غريب جدًا لأن أرقام كين بتحطه في نفس المكانة ويمكن في بعض الجوانب يتفوق عليهم.
منذ انتقاله إلى بايرن ميونخ في صيف 2023 سجل 119 هدفًا مع النادي ومنتخب إنجلترا وهو أعلى رقم لأي لاعب في العالم خلال الفترة دي
وفي موسم 2025-2026 فقط وصل إلى 51 هدفًا في جميع البطولات ليصبح أول لاعب يسجل أكثر من 50 هدفًا مع فريق من الدوريات الأوروبية الخمسة الكبرى منذ موسم هالاند التاريخي مع مانشستر سيتي.
كما أصبح أكثر لاعب إنجليزي تسجيلًا في تاريخ دوري أبطال أوروبا بعدما وصل إلى هدفه رقم 50 في البطولة على مستوى الأندية ورغم كل الأرقام دي لسه ناس كتير ما بتحطوش ضمن أول اسمين أو تلاتة لما ييجي الكلام عن أعظم مهاجمي العصر الحديث.
توتنهام كان سبب كبير في ظلمه
أكبر سبب خلا هاري كين يفضل “إندريتد” سنين طويلة هو وجوده في توتنهام.. قضى حوالي 14 سنة داخل النادي وسجل أكثر من 280 هدفًا وأصبح الهداف التاريخي لتوتنهام وفاز بالحذاء الذهبي للدوري الإنجليزي 3 مرات ووصل لـ213 هدفًا في البريميرليج وهو ثاني أكثر لاعب تسجيلًا في تاريخ المسابقة بعد آلان شيرر.
لكن في المقابل الفريق ماكسبش أي بطولة كبيرة ووصل نهائي دوري أبطال أوروبا 2019 وخسره ووصل نهائي كأس الرابطة مرتين وخسر.
ومع منتخب إنجلترا وصل نهائي يورو 2020 ونهائي يورو 2024، لكنه خرج وصيفًا وده خلق صورة ذهنية عند ناس كتير إن كين لاعب عظيم لكن “من غير بطولات” مع إن البطولات لعبة جماعية بينما مستواه الفردي كان ثابتًا لسنوات طويلة.
الناس كانت بتتكلم عن خزينة بطولات توتنهام الفاضية أكتر ما كانت بتتكلم عن إنه واحد من أفضل المهاجمين في العالم.
حتى الجوائز الفردية ما أنصفتوش رغم إنه حقق الحذاء الذهبي للدوري الإنجليزي 3 مرات والحذاء الذهبي لكأس العالم 2018 وكان بينهي مواسم بأرقام تهديفية مرعبة عمره ما حصل على التقدير الإعلامي اللي حصل عليه مهاجمون آخرون.
في مواسم كتير كان ينافس على لقب هداف أوروبا لكن الحديث الإعلامي كان بيتجه للاعبين اللي بيحققوا بطولات مع فرقهم وده واحد من أكبر الأسباب اللي خلت ناس كتير تعتبر هاري كين واحدًا من أكثر النجوم المظلومين في العصر الحديث.
هاري كين مش مجرد هداف اللي بيتفرج على هاري كين بعين تكتيكية هيعرف إنه مش مهاجم صندوق تقليدي هو ممكن ينزل يستلم الكرة في نص الملعب ويبني الهجمة ويلعب تمريرة بينية قاتلة وبعدها بثواني تلاقيه جوه منطقة الجزاء بينهي الهجمة بنفسه.
بيعرف يفتح مساحات لزمايله ويجذب المدافعين ويغير اتجاه اللعب ويمثل نقطة ارتكاز لأي فريق وده السبب اللي بيخلي مدربين كتير يشوفوه مهاجمًا متكاملًا مش مجرد هداف.
شهادات الكبار.. كلهم اتفقوا على عظمته
توماس توخيل المدير الفني لمنتخب إنجلترا قال هاري كين بدون شك أفضل مهاجم في جيله وشايف إن ثقته بنفسه بقت تخليه يشيل مسؤولية بايرن ميونخ ومنتخب إنجلترا بكل هدوء وإنه وصل لمستوى جديد في مسيرته.
أما فينسنت كومباني مدرب بايرن ميونخ، فقال هاري كان دائمًا هدافًا لكنه طور نفسه بشكل مذهل ونزوله بين الخطوط بيخليه يفلت من رقابة المدافعين وده خلاه لاعبًا أكثر اكتمالًا وقائدًا حقيقيًا.”
أما واين روني الهداف التاريخي السابق لمنتخب إنجلترا قال هاري كين هو أعظم مهاجم رقم 9 في تاريخ منتخب إنجلترا وقال أن هو هداف قاتل لكنه ذكي جدًا في اختيار مراكزه وطوّر نفسه بشكل كبير خلال آخر سنوات.
حتى جوزيه مورينيو اللي دربه في توتنهام قال عنه هاري يعرف قيمته.. هو لاعب لا يصدق.. لما مدربين ولاعبين بالحجم ده يجمعوا على قيمة لاعب فده بيأكد إن التقدير اللي كان بياخده من الإعلام والجماهير ماكانش بنفس حجم مستواه الحقيقي.
بايرن ميونخ أثبت إن المشكلة ما كانتش فيه.. لما انتقل إلى بايرن ميونخ ناس كتير كانت مستنية تشوف هل أرقامه كانت بسبب إنه النجم الوحيد في توتنهام، ولا هو فعلًا مهاجم عالمي.
الإجابة جات بسرعة وفي أول موسم فاز بالحذاء الذهبي للدوري الألماني وفي الموسم التالي سجل 51 هدفًا وقاد واحدًا من أقوى الخطوط الهجومية في تاريخ البوندسليجا مع مايكل أوليز ولويس دياز.
نجاحه في ألمانيا أكد إن المشكلة عمرها ما كانت في هاري كين لكن في البيئة اللي كان بيلعب فيها.
أرقامه مع إنجلترا تحسم أي جدل مع منتخب إنجلترا كين هو الهداف التاريخي برصيد 74 هدفًا في 109 مباريات وكسر رقم واين روني بفارق كبير وسجل 15 هدفًا في البطولات الكبرى وهو الرقم الأفضل في تاريخ المنتخب.
وفاز بالحذاء الذهبي لكأس العالم 2018 بعدما سجل 6 أهداف ورغم كل ده ما زال اسمه في نقاشات كتير بييجي بعد مهاجمين أرقامهم وتأثيرهم أقل منه.
ليه هاري كين فعلًا “Underrated”؟.. لأن الناس في كرة القدم غالبًا بتحكم على المهاجم بالبطولات قبل الأداء لكن لو شيلنا البطولات من المعادلة هنلاقي إن هاري كين عنده كل حاجة ممكن تطلبها من مهاجم عصري.
يمكن انتقاله لبايرن ميونخ بدأ يغير نظرة الناس ليه لكن الحقيقة إن هاري كين كان لاعبًا استثنائيًا حتى وهو في توتنهام وكان يستحق التقدير ده من زمان وده بالضبط معنى كلمة Underrated… لاعب عظيم لكن الاعتراف بعظمته اتأخر سنين.
