“إنتي مش من مستوانا عشان تلعبي معانا”.. وفاة طالبة ثانوية بسبب التنمر

“إنتي مش شايفة شكلك عامل إزاي”.. جملة زي دي كانت سبب في وفاة الطالبة رودينا (16 سنة) بإحدى المدارس الثانوي بمنطقة فيصل في الجيزة.

رودينا كانت بتتعرض للتنمر من زميلاتها في المدرسة وكانوا بيتعمدوا يضايقوها بكلام قاسي زي لما في مرة طلبت تلعب مع زميلاتها وواحدة منهن قالتلها: “إنتي مش من مستوانا عشان تلعبي معانا” والجملة دي آثرت بشكل سلبي على الحالة النفسية لرودينا حسب ما والدها صرح لموقع القاهرة 24

والدها حاول يهديها ويقولها إن المشادات دي عادية وبتحصل بين الطلاب في المدارس عشان متزعلش ولكن الكلام كان له تأثير كبير على نفسية رودينا.

رودينا أغمى عليها في البيت بشكل مفاجئ وتوقفت عن الحركة والتنفس وتوفت بسكتة قلبية قبل ما توصل المستشفى حسب كلام والدها.

منى محمود، ولية أمر على صلة برودينا قالت إنها كانت متفوقة وكل سنة كانت بتطلع الأولى على المدرسة، وإن تفوق رودينا خلى بعض الطالبات يتنمروا عليها طول الوقت لحد ما أصيبت بسكتة قلبية وماتت.

مصادر قالت لموقع المصري اليوم إن وزارة التربية والتعليم الفني بتتولى تحقيق بشأن الواقعة حل وصول شكوى بشكل رسمي، وإنها أصدرت تعليمات لجميع المدارس على مستوى الجمهورية لمكافحة ظاهرة التنمر بمختلف أشكالها.

قصة رودينا انتشرت على مواقع التواصل الإجتماعي وأثارت غضب الناس اللي طالبوا الأهالي بالاهتمام بتربية أبنائهم ومحاسبة إدارة المدرسة.

Related Articles

Back to top button