اكتشاف ٣ مقابر في جبانة البوباسطيون بمنطقة سقارة بيوضح تاريخ كبار رجال المجتمع في مصر القديمة

النهاردة يوم الأحد 19 يوليو البعثة الأثرية المصرية أعلنت عن اكتشاف 3 مقابر صخرية من عصر الدولة الحديثة في جبانة البوباسطيون في منطقة سقارة.. وده في أعمال حفائرها العلمية بالقطاع الشرقي للحافة الجبلة للموقع.. فهنقولك تفاصيل الاكتشاف

تفاصيل الاكتشاف

• الدكتور عمرو الطيبي مدير عام منطقة آثار سقارة قال إن المقبرة الأولى بتعود لشخص اسمه “منتوحتب”.. وجدرانها الشمالية عليها مناظر متقنة لحاملي القرابين ومشاهد الصيد.. وكمان فيه منظر كبير لصاحب المقبرة قاعد مع مامته اللي اسمها “إعح حتب”.. والمناظر دي بتعكس المكانة الاجتماعية الرفيعة للأسرة
• جدران المقبرة كان عليها مجموعة من الألقاب المهمة.. زي الأمير الوراثي والعمدة والتابع للملك والذي يسعد قلب الحاكم والمدير والمشرف على البلاد الأجنبية والمشرف على جيش مدينة خبشيت.. وكل الألقاب دي بتُستخدم عشان تقول إن صاحب المقبرة دي كان رجل من كبار رجال الإدارة والجيش في بدايات عصر الدولة الحديثة.

• المقبرة كمان بتضم بئر للدفن بس أعمال الحفائر مكملتش جواها وهيكملوها  خلال الموسم الأثري الجاي 

•  المقبرة الثاني بترجع للشخص اسمه “بارع إم وايا” ومعروف برضه باسم “ساموت”، واللي كان لقبه كبير التجار ببيت بتاح.. والمقبرة دي عبارة عن سجل عائلي متكامل اتحفظت فيه أسماء زوجته “توي” واللي لقبها كان “سيدة البيت” ووالدته “أتبيو” وكان لقبها مغنية المعبود آمون.. وكمان فيه أسماء أبنائه الأربعة.. فده بيقدم صورة نادرة للحياة الأسرية والاجتماعية لشخصيات بارزة في عصر الدولة الحديثة

•  المقبرة الثالثة بقى بترجع لشخص اسمه “نحسي” ورغم إن حالته سيئة من الحفظ.. لكن باقي النقوش فهي قيمتها مهمة.. وعرفتنا على اسم صاحبها ولقبه المشرف على البيت.. بالإضافة إلى اسم زوجته “نفرو بتاح” اللي كان لقب سيدة البيت

المقبرة دي كان فيها عنصر مهم هو جزء من عمود عليه نص هيروغليفي بيشير إلى عودة أحد القادة من بلاد نهرن الموجودة شمال سوريا.. والنص ده مش بس بيساعدنا نعرف تاريخ المقبرة إنها من عصر الدولة الحديثة.. لا هو كمان بيقدم دليل جديد على طبيعة العلاقات المصرية مع مناطق الشرق الأدنى خلال تلك الفترة

أهمية الاكتشاف

• اكتشفوا نقوش هيروغلوفية وعناصر أثرية بتوضح جوانب جديدة من تاريخ جبانة منف القديمة.. فهيزود من فهم الحضارة المصرية القديمة

• الاكتشاف كمان بتيجي أهميته من إنه بيعيد إحياء سيرة أصحاب المقابر دي واستعادة صفحات تاريخهم اللي كانت محفورة تحت الرمل لآلاف السنين.. فهو كمان ليه بُعد إنساني كبير أوي