إزاي تتعامل مع الشخصيات الصعبة في الشغل؟

الشغل بيفرض علينا نتعامل مع شخصيات مختلفة عننا ومش كل الشخصيات سهلة في التعامل ومتفهمة.. ساعات بنقابل شخصيات صعبة في التعامل الشخصي وطريقة الشغل وده بيخلي دايما في حوارات وصراعات.. وده بيأثر علينا في الشغل وعلى حالتنا النفسية وعشان نبقى professional ومنتأثرش بيهم دي شوية نصايح هتساعدك تتعامل معاهم وفقا لموقع  indeed

1- حاول تتكلم معاه

لو تقدر تتكلم معاه بشكل شخصي عن الطريقة اللي مضايقاك يبقى شيء كويس لإن جايز مايكونش عارف هو بيعمل إيه غلط أو بيأذي في إيه ومحتاج حد يعرفه.. لكن لو حسيت إنه شخص مابيتفاهمش وفر وقتك أحسن.

2- حاول تحافظ على رد فعلك وتبقى هادي

لما حد من زمايلك في الشغل يضايقك حاول تكون هادي وماتردش في وقتها أو تتصرف تصرف ناتج عن انفعال..  خد وقتك عشان رد فعلك يبقى منطقي ومتناسب مع الفعل اللي حصل.. وهل فعلا سلوكه أثر على شغلك ولو أثر عليه حاول تعرف إزاي؟

3-حاولوا تلاقوا أرض مشتركة بينكوا وتحترموا بعض

في الأخر مصلحتنا كلنا إن الشغل يكون مظبوط ومريح من غير مشاكل وحوارات فحاول تلاقي نقطة مشتركة مع الشخص ده وتحترمه حتى لو اختلفتوا في حاجات ده مايقللش من الاحترام.. وده هيساعدكوا تعملوا الشغل بشكل سلس.

4-حاول تتجنبه

لما يكون في شخص صعب ومش نافع معاه حلول في التعامل حاول تتجنبه لو ده متاح.. وتتعامل معاه وقت الشغل بس وبطريقة مهنية ومختصرة عشان مايحصلش حوارات بينكوا جانبية.


5- امتى تدخل مديرك في الموضوع؟

لو جربت كل الحاجات اللي فاتت ولقيت مفيش فايدة في التعامل مع الشخص ده ولسه مستمر في الضغط عليك وعلى الشغل يبقى لازم تصعد الموضوع وتتكلم مع مديرك فيه أو الـ HR وهما يقدروا يساعدوك بشكل أوضح.

ولو أنت الناس شايفاك شخص صعب التعامل معاه في الشغل حاول تشتغل على نفسك وتبقى أهدى.. لازم تتعلم إنك بتعرف تفصل مشاعرك الشخصية عن الشغل لإن ده هيساعدك تكون شخص professional والناس هتحب تشتغل معاك في المستقبل بدل ما تاخد موقف منك.وافتكر دايما إنك لو سيبت الشغل مش دايما الناس هتفتكرك بشغلك.. لكن اللي بيعيش هو معاملتك مع الناس وسلوكك معاهم. 

Related Articles

Back to top button