جولة في أكونت سمية الخشاب على تويتر!
حساب سمية الخشاب على تويتر بقاله فترة مسبب قلق وحالة من الجدل على السوشيال ميديا بسبب تصريحاتها وتغريداتها المختلفة اللي بتكتبها وآرائها بصراحة زي إنها بتنصح الناس يواجهوا الطاقة السلبية بالرقص مثلا، أو آرائها عن التحرش، أو كلامها عن الدوري الإنجليزي وردها على الممثلين والمغنيين الأجانب.. واتشهر الأكونت جدا في الفترة الأخيرة بعد ما نشرت صورة أثرت الجدل يوم فرح طليقها أحمد سعد”
انتشر النهاردة التلات 31 أغسطس تويت لسمية الخشاب بتتكلم فيها عن الإنجاب وأهمية اختبار الصحة العقلية للناس قبل ما تخلف وقالت فيها “أنا بطالب برخصة وامتحان لـ الإنجاب، يعني قبل ما الأزواج يخلفوا يروحوا يطلعوا الرخصة دي فيتعملهم اختبار هل هما مؤهلين يربوا أو لا؟ هل هما mentally stable؟ هل هيطلعوا نشأ كويس للمجتمع؟ واللي يسقط في الامتحان يعملوله therapy وياخد كورس تدريب لحد ما ينجح عشان مايظلموش الأطفال معاهم..”
وبسبب الجدل اللي حصل من التويت دي وتويتات تانية قبلها اخدنا جولة في أكونت سمية الخشاب على تويتر خصوصا من أول مايو اللي فات لإن حصل فيه نقلة واختلاف في طريقة الكلام وردودها على الناس كمان.
والاختلاف اللي ظهر في الأكونت بدأ بالتحديد من يوم عرض حلقة مسلسل موسى -اللي ظهرت فيه سمية الخشاب كبطلة مع محمد رمضان- في الحلقة اللي اتجوزت فيها موسى ومن ضمن أحداث الحلقة دي إن كان فيه مغني للفرح واللي هو كان في طليقها الفنان أحمد سعد، وبعدها انتشرت صورة على السوشيال ميديا لمحمد رمضان وهو شايل سمية الخشاب وأحمد سعد متصور معاهم، فأكونت سمية الخشاب على تويتر نشر الصورة دي بعد انتشار صورة المسلسل.
وده اللي عمل قلق على السوشيال ميديا وقتها وده كان في رمضان تقريبًا، وخلى ناس كتير تبدأ تتابع أكونت سمية الخشاب على تويتر، وبدأ الأكونت يبقى عليه كذا تويت بالانجليزي بعدها، وكمان بدأت ترد على الجمهور وتعملهم كوت ريتويت وتتفاعل معاهم.
ده غير كمان إنها بتنشر أعمالها القديمة زي مسلسل الحج متولي وفيلم حين ميسرة وفيلم “راندفو” وبتفكر الناس بيهم بطريقة مختلفة وبيبقى عليها “كابشنز” تخلي الناس تتفاعل معاها ويفتكروا الأعمال دي، زي مثلا إنها بتقول بعض النصايح للشباب اللي ليها علاقة بالتعارف من على مواقع التواصل الاجتماعي ونشرت النصايح على أغنياتها القديمة “عرفتك من على النت”
حبايبي بلاش online dating وتيندر ومتتعرفوش علي حد من الapps دي عشان سلامتكم pic.twitter.com/meSUCMyaXr
— Somaya Elkhashab (@somayaelkhashab) June 20, 2021
وبتتفاعل كمان بشكل ساخر مع الترندات العالمية للنجوم العالمين وأسئلة الصحف العالمية عنهم وبترد علي تويتس ليهم زي ما ردت على تويت إيه هو الألبوم المفضل لـ”Kanye west” وردت وقالت “Donda” وهو ألبوم لسه مانزلش أصلا.
ولما الجمهور سألها على رأيها في تيلور سويفت ردت عليهم بـ”ايموجي” تعابين وسكتت، وسألوها برضه على “Lady gaga” قالت “لا دي حبيبتي Queen of everything”، ولما سألوها على “Katy Perry” قالت “بحبها أوي وأكتر أغنية بحبها ليها Hot N Cold”، وكان رأيها في “Azealia banks” إنها أشهر منها
وعلقت كمان على خبر انتشر من أحد المواقع لـ “جينيفر أنستون” وقالت لها في تويت “كان معاكي Brad واتبطرتي على النعمة “، وعلقت على صورة لـ “بريتني سبيرز” وقالتلها في تويت “حياتي ربنا يكفيها شر أبوها المادي الوحش وصاحبها اللي بيستغلها بجد حرام رمز زي دي يتعمل فيها كده”
ومن ضمن التويتات اللي عملت قلق كمان لما اتكلمت عن قضية التحرش وعلاقة التحرش بلبس البنات وقالت بشكل ساخر “أي حد بيحط مبرر للتحرش إنه اللبس السبب عايزاك يا جميل أنت وهو تلبسوا مايوه شرعي وأنتوا نازلين البحر في الساحل عشان لبسكم الخليع ده بيستفزنا وممكن يبيح لنا نتحرش بيكم”
وخلال جولتنا برضه لقينا إن صورها مع فيفي عبده شدت انتباه عدد كبير من الجمهور بسبب ال”كابشنز” واللي واحد منهم كان Me teaching my bestie how to flirt so she could bring all the boys to the yard” فيما معناه “وأنا بعلم صاحبتي إزاي تعاكس”
ولقينا برضه تويت سببت قلق كانت بتساند فيها الرجالة إنهم يعملوا اللي عايزينه ويستخدموا فلاتر في الصور لو عايزين ومالهمش دعوة بكلام الناس وقالت في التويت “حبايبي الشباب حطوا فلاتر وصوروا واعملوا اللي نفسكوا فيه مش ده اللي بيحدد أنتوا رجاله ولا لا.. إحنا مش في الجاهلية”
ومن أشهر التويتات اللي انتشرت على السوشيال ميديا ليها كانت نصيحتها للطلاب إنهم كل ما يحسوا بضغط من المذاكرة يقوموا يرقصوا وقالت “حبايبى أنا عارفة إنكم بتمتحنوا دلوقتى قلبى معاكم وأول ما تبقوا stressed قوموا ارقصوا”
وللأسف ناس كتير اتهمتها إنها عايزة تلفت الانتباه وناس تانية شايفة إن دمها خفيف وإنهم بيتفاعلوا مع السوشيال ميديا بسببها لإنها ألطف أكونت في الفترة الأخيرة.. أنت شايف إيه؟
