حاجات لازم تعرفها لو بتربي أو حابب تربي طيور أليفة
زي ما فيه ناس غاوية تربية حيوانات أليفة سواء كلاب أو قطط أو غيرهم من الحيوانات.. فيه ناس تانية بتحب الطيور الأليفة واللي منها العصافير والبغبغانات والحمام وأنواع تانية كتير وعشان كده حبينا نجمعلكم شوية معلومات لو إنت بتربي طيور أليفة أو حابب تربيهم عشان تساعدك.
حسب مقالات على موقع TheSprucePets
علامات توتر وغضب الطيور:
الطيور كائنات حساسة جدًا بطبيعتها وفي العادي كلنا سواء بشر أو حيوانات بنحس بالإجهاد وبيأثر علينا بأشكال مختلفة لكن الإنسان والحيوانات بيقدروا شوية يتعاملوا مع الموضوع.. أما الطيور بيكون الموضوع صعب عليهم شوية فا إزاي تتعرف على المشكلة دي؟
1- أي تغيير بشكل عام سواء في المكان أو ألوان المكان أو حتى كان فيه مصادر إزعاج في الصوت زي العربيات وغيرها فا ده بيسبب توتر كبير عندهم وكمان الضلمة والضوء بشكل عام لازم يكونوا مناسبين عشان بيعملوا مشاكل
2- كمان من علامات التوتر هتلاقي غضب أو عدوانية موجودة زي إنه ينتف ريشه أو يشوه نفسه بشكل عام وفقدان الشهية وتغير في نبرة الصوت أو النطق وكمان الخوف أو الملل
3- فيه حاجة اسمها خطوط توتر أو علامات كده زي الإنسان لما يكون مش نايم كويس بيظهر هالات سودا.. الطيور كمان بيظهر على ريشها علامات كده بتدل إنه متوتر أو خايف
4- فيه حركة كده بيعملها أي حد قلقان أو متوتر زي إنه يفضل يتمشى رايح جاي في مكانه.. الطيور برضه هتلاقيها بتكرر سلوكيات معينة لما يتوتروا يقعد ينقر في أي حاجة أو يكرر حاجة معينة وده بيبان أكتر مع البغبغانات
طالما قولنا المشكلة نقول علاجها:
أول حاجة الصوت العالي بيزود المشكلة فحاول ماتعليش صوتك ولا تصرخ فيه لأن ده بيدي إنطباع سيء عند الطيور.. تاني حاجة اتعامل واتحرك بهدوء خصوصًا لو حسيته بيهاجمك عشان ماتزودش قلقه ورده فعله.. تالت حاجة لو هو مش بيحب يتعامل مع بشر بتدربه على عصاية أو جسم معين كده يتعامل معاه بشكل عام ده بيهديه وبيساعده.. وأخيرًا اديله ألعاب أو لاعبه إنت أو تشغله حاجة يسمعها زي ما قرأت كده هو محتاج يتسلى ويا سلام لو تخليه يقضي وقت شوية برا القفص بتاعه.
أنواع طيور مابتحتاجش عناية كتير ومجهود كبير للناس اللي مشغولة:
1- ملك السلام وهو “الحمام” بيعمل اللي الناس المتجوزة ماتعرفش تعمله وهو إنه بيحب يقضي وقت شخصي مع نفسه وفي نفس الوقت هيحتاجك تقضي معاه وقت بس مش كتير وكده تبقى ضربت حمامتين بحجر واحد
2- “العصافير” معظمهم أصلا مابيحبش حد يتعامل معاه هو إنت بس هاتله عصفورة كمان وهو مش هيفرق معاه وجودك أساسًا.. أو حتى اعمله عيلة مش كبيرة بس كام عصفور مع بعض والقفص بتاعهم كده كده بيكون كبير شوية وهم هيبقوا مع نفسهم ووقت ماتحب تهتم هتهتم بس المهم تنضفلهم المكان كويس والأكل والشرب
3- “الكناري” وده من اسمهم تحسه صاحبك الغلبان اللي لا بيهش ولا بينش.. هتطلبوا أكل غالي هيدوس أكل عادي هيدوس ومابيعملش قلق خالص بس هو بيحتاج نظام أكل صحي أهم حاجة وياريت لو لعبة أو حاجة تسليه وهو ولا هيهش ولا ينش حرفيًا
4- “البغبغان” ده ملك التقدير بقى لو لقاك اهتميت وقدمت رعاية كله هيبقى تمام ومش هيطلب منك اهتمام كتير ولو حبيت تتسلى معاه بقى هيديك وقته كله بالساعات عادي
5- “طائر الحب” وده ماتفكرش إنه هيحتاج مزة تسليه أو عيل جان يقعد معاها في القفص لأ ده يجيد الإفلات في عز تعلقه عادي.. لو جبتله لعبة خلاص هو كده ملك الدنيا وما عليها والدنيا تمام بالنسباله
شوية أكلات ابعد عنها عشان ما تؤذيش الطيور:
عندك الشوكولاتات والتفاح والملح والأفوكادو وده كده كده لا إنت ولا الطيور هتاكلوه بس احتياطي نقوله.. والفطريات وورق الطماطم وممنوع كافيين والبصل والخضروات المجففة خصوصًا الفاصوليا
تأكلهم إيه؟
عندك بذور ودي كتير من الطيور بيتقبلها كنظام غذائي وده مش معناه إنها مفيدة على طول لأنها ناقصة فيتامينات ومعادن مهمة وعشان كده بتعامل البذور دي معاملة التسالي كده مع الطيور
أما المفيد والمهم هو الحبيبات ودي غالبًا بتكون معمولة مخصوص ليهم وليها نظام غذائي وعشان كده هي دي أنسب حاجة تأكلها للطيور
في النهاية ممكن تتابع مع دكتور بيطري مثلًا يساعدك تحط نظام غذائي لأن بالإضافة للبذور والحبيبات دي فيه خضروات ورقية معينة وخضروات عادية تانية وفواكه وحبوب ومكسرات بتعمل نظام غذائي للطيور وبتكون مفيدة وكويسة ليهم.
أخيرًا وآخرًا بقى تربية الطيور الأليفة تجربة ممتعة ومليانة بالتحديات وهتعملك لمسة من الحيوية والسعادة كده لحياتك اليومية.. بس مطلوب اهتمام خاص شويو وتفهم احتياجات الطير سواء من حيث التغذية أو السلوك أو البيئة المناسبة. ولو وفرت رعاية حلوة هتظبطله الدنيا وهو كمان هيظبطلك الدنيا وتسلوا بعض.. وخليك فاكر إن التعامل مع الطيور محتاج صبر وملاحظة مستمرة لمشاعرها وسلوكها عشان هي مش مجرد زينة لأ دي كائنات حية محتاجة حب واهتمام.
