عبثيات: 5 نصائح ضروري تعرفهم لسلامتك قبل ماتش مصر والسنغال 

بعد هزيمة منتخب مصر من السنغال في نهائي الأمم الأفريقية أغلب اللعيبة المصريين قرروا إن الماتش اللي جاي مع السنغال تحدي وإنهم لازم يكسبوا وسمعنا لقاءات كتير وكلام منهم إنهم هيعوضوا في ماتشات التأهل لكأس العالم.. وكالعادة الوقت بيعدي بسرعة والنهاردة الساعة 9 ونص هتبقى أول مواجهة لمصر والسنغال بعد الخسارة اللي فاتت والماتش كمان هيكون على أرضنا.

طبيعي جدا كأي مصري هتشجع النهاردة بلدك لآخر لحظة في الماتش.. ولضمان مشاهدة ممتعة أكتر وفوز إن شاء الله هنقولك شوية نصايح ضرورية تاخد بالك تنفذها قبل ما تتفرج على الماتش:

1- ابعد عن أي حد اتفرجت معاه على الماتش اللي فات وغير عتبة وغير ناس وياريت كمان ماتكلمش اللي اتفرجت معاه على الماتش اللي فات طول اليوم ده خالص 

2- لو أنت شخص عصبي ماتتفرجش على الماتش خالص عشان محدش قادر لصياحك 

3- ماتحطش أمل على مصطفى محمد عشان كده كده بيخذلك 

4- اللب والسوداني والفشار وقت الفرجة على الماتشات ده في الأفلام والمسلسلات فبلاش تجيب الفشار واللب اللي هترزعه على الأرض بدل ما تطرد من البيت 

5- الناس اللي بتتفرج على النت البث عندها بيبقى متأخر.. فحاول ماتعملش هيصة ودوشة وقت الأجوان عشان بتحرقلهم الماتش.

Related Articles

Back to top button