ملخص مشكلة فيسبوك.. مين المسؤول وإزاي؟

في الساعة تمام السادسة مساء إلا كام دقيقة بتوقيت مصر، موقع “فيسبوك” وكل تطبيقاته للتواصل زي “إنستجرام” و “واتساب”و “ماسنجر” توقفوا عن العمل بشكل كامل، العالم توقع في الأول إنه عطل هيستمر 5 أو 10 دقايق وهيرجع تاني زي ما بيحصل كل فترة ولكن اللي حصل كان غريب وإنه استمر لمدة لست ساعات.

وكان “تويتر” هو موقع التواصل الإجتماعي الأول اللي اتجه له الناس بعد اللي حصل، وانتشرت تكهنات وشائعات عن اللي حصل، ولكن بعد مرور 12 ساعة تقريبا عن عودة خدمات “فيسبوك” للعمل، خلونا نشوف إيه السبب الحقيقي ونجاوب على الأسئلة الأساسية.. مين المسؤول عن اللي حصل؟ وإزاي؟ 

حسب موقع “krebsonsecurity”، فـ”دوج مادوري”، وهو مدير تحاليل الإنترنت في شركة “Kentik” وهي شركة متخصصة في تحاليل الإنترنت، قال إن شخص في “فيسبوك” كان هو السبب في كل اللي حصل، وكدة دي إجابة سؤال “مين المسؤول”.

طيب حصل إزاي؟ موظف “فيسبوك” قام بإجراء وهو تحديث “سجلات برتوكولات التوجيه الحدودية” في “فيسبوك” أو ما يعرف بالـ “BGP” أو ما يعرف بالـ “Border Gateway Protocol”، طب إيه الكلام ده؟

الـ”BGP” باختصار شديد، ده هو الخريطة اللي بتقول لأجهزة الكمبيوتر إزاي توصل لموقع “فيسبوك”، وهو اللي بيحدد طريقة سير البيانات في رحلتها من جهازك لسيرفرات المواقع، يعني لو أنت عايز تدخل على موقع ما وسيرفراته في مكان ما، الـ”BGP” بيبص على كل المسارات المتاحة وبيختار أفضل مسار ينقل فيه البيانات، فإمبارح لما كنا بنكتب “facebook.com” كان المتصفح بيقولنا، “فيسبوك” مين؟ لإن المتصفح مش فاهم أنت عايز مين ولا قادر يوصله، لإنه معندوش أي فكرة عن مكان “فيسبوك”.

وده كان بيفسر أخبار كتير انتشرت عن إن موظفين “فيسبوك” مش قادرين حتى يتواصلوا مع بعض باستخدام أدواتهم الداخلية وإيميلات الشركة لإن كلها مربوطة ببعض.

وبمناسبة الكلام عن الدومين، امبارح كان دومين “فيسبوك” معروض للبيع، وده بسبب زي ما قولنا فوق إنه مابقاش موجود،  لإنه اختفى من الإنترنت، فا كان متاح للشراء بشكل غير حقيقي، يعني هو الدومين مش محجوز وفي نفس الوقت محجوز فمحدش يقدر يشتريه، وده حسب كلام “محمد باسط”، المتخصص في أمن المعلومات والأمن السيبراني.

وحسب مدونة على موقع “Cloudflare” ، تعطل “فيسبوك” كان سبب في دخول عدد كبير من الناس على مواقع تواصل تانية زي “تيك توك” ، “تيليجرام”، “تويتر” ، وتطبيق “سيجنال”.

وحسب وكالة “أسوشيتد برس”، “فيسبوك” قال إن مفيش دليل على إن بيانات المستخدمين تعرضت للاختراق نتيجة العطل.

و”ماثيو برنس”، المدير التنفيذي لشركة “Cloudflare” قال إن برضه إن العطل ده مش بيشير إنه كان بسبب هجوم سيبراني (هجوم هاكرز)

حسب موقع “رويترز”، وتقديرات شركة “Standard Media Index” لقياس الإعلانات، من المحتمل إن “فيسبوك” يكون خسر 545 ألف دولار من عائدات الإعلانات على الموقع خلال ساعة واحدة فقط أثناء العطل وفي الولايات المتحدة بس.

وحسب موقع وكالة “بلومبيرج”،”مارك زوكربيرج” خسر أكتر من 6 مليار دولار في الـ6 ساعات اللي حصل فيها عطل خدمات “فيسبوك”، بالإضافة إلى أن أسهم “فيسبوك” انخفضت 4.9%.

وحسب مؤشر “بلومبيرج”، ده خلى “مارك زوكربيرج” يحتل المركز الخامس بعد “بيل جيتس” بعد ما بقت ثروته 121.6 مليار دولار

 طيب بجانب ده، “واتساب” و” إنستجرام” توقفوا ليه؟ لحد دلوقتي مافيش أي توضيح أو بيان رسمي بأسباب ده، وحسابات واتساب وإنستجرام على تويتر اكتفوا بتغريدة على تويتر كان ملخصها إننا عارفين إن فيه مشكلة وشغالين على حلها، حسب موقع “marca”.

طيب إيه ملخص كل الكلام ده؟ الملخص هو إن موظف في “فيسبوك” ارتكب خطأ بشكل غير مقصود أو قد يكون بشكل مقصود، تسبب في إن “فيسبوك” يختفي من على خريطة الإنترنت وكأنه لم يكن موجود من قبل، وإن الموضوع مافهوش هاكر صيني عنده 13 سنة ولا حاجة.. ولكن إدعوا لموظف “فيسبوك” لإنه بيسأل الآن.