موضوع يجوعك: 3 وصفات لطبق الفول عشان فطار الجمعة العائلي

فطار الجمعة بعد الصلاة تقليد مهم وراسخ في كل عائلة مصرية، وطبعًا الفطار مايبقاش فطار مصري أصيل من غير طبق فول محترم كدة ومعاه الطعمية والبيض والبتنجان والبطاطس.. أكمل كلام ولا ريقكوا جري خلاص؟! بقول كفاية كدة.. يعني كل اللي  فات ده والذي منه يمثل وجبة فطار عظمة تفضل مكملة معاك لحد المغرب تقريبًا.

ولأن طبق الفول هو بطل الفطار ده فهنقترح عليكم في الموضوع وصفات مختلفة ممكن تجربوها النهاردة في الفطار ونبدأ بوصفة الفول الحجازي أو السعودي…

1- الفول السعودي:

طبق الفول على الطريقة السعودية بيستخدم فيه صلصة “الدقوس” وهي بتستخدم غالبًا كصوص مع أكل الكبسة السعودية ولكن في الوصفة دي كمان هنحطها على الفول وهنحتاج عشان نعمل الطبق ده الآتي:

الأول هنعمل الدقوس ودي هنحتاج لها (طماطم – فلفل رومي أو حار حسب ما تحبوا ومتقطع ناعم – فص توم – حبة كسبرة خضرة قد كف اليد – وبهارات من ملح وكمون وفلفل أسود وكسبرة – وعصير ليمون إما نص ليمونة كبيرة أو لمونتين صغيرين)

كل اللي فاتوا دول يتحطوا على بعض ويتفرموا بالهاند بليندر أو الخلاط بس نص ضربة ما ينعمش أوي الخليط يعني..

تاني خطوة هنجيب الفول بتاعنا ونسخنة ونهرسه على النار في طاسة ونحاول مايبقاش مفروم أوي أو ناعم يعني نص نص وبعد ما نخلص ده نحط الفول في طبق التحضير وفوقه صلصة الدقوس ونقلبهم وممكن يتحط فوقهم طحينة وطبعًا أي مقدار من الزيت حسب ما تحبوا وبالهنا والشفا…

وفي الفيديوهين دول طريقة تحضير نفس الطبق بطريقتين مختلفين في تفاصيل بسيطة ولكنهم نفس النتيجة بنسبة كبيرة..

2- طبق الفول بالبسطرمة:

طبق الفول بالبسطرمة بسيط جدًا مفيهوش اختراعات كتير وكل اللي محتاجة له هو
(فول مدمس – بسطرمة – بصل – بقدونس – طماطم – ملح وفلفل أسود وأي بهارات تحبها وصلصة طماطم)
في الأول بالطاسة هنعمل صلصة عادية، الزيت وعليه التوم نشوحه لحد ما لونه يبقى دهبي، ونحط فوقه الطماطمية متقطعة صغير وعليهم صلصة الطماطم،

ودقيقتين كدة نقلبهم وبعدين نضيف البسطرمة بعد ما نقطعها ونقلبها معاهم شوية دقيقة كدة وبعدين نضيف الفلفل والبهارات بتاعتنا، بس ناخد بالنا من الملح مانكترش لأن البسطرمة بتبقى حادقة أصلاً ونقلبهم مع بعض كلهم كويس وبعدين نطلعهم للتقديم.

الوصفة اللي فاتت دي اللي بيحبوا الحاجة تكون متسبكة شوية أو فيها صلصة كتير ولكن نفس الوصفة ممكن تتعمل عادي طبق الفول تحضره سادة زي ما بتحبوا وتضيفوا عليه بسطرمة في الأخر وهو على النار وتقلبوهم كويس ويبقى برضه فول بالبسطرمة وجاهز للأكل.

وده فيديو لطريقة التحضير بشكل مفصل أكتر لزيادة الخير خيرين…

3- طبق الفول بالجبنة:

احنا متفقين إن الجبنة ينفع تتحط على أي حاجة وهتبقى لذيذة جدًا، بس جربت تحطوها على الفول؟! تعالوا نجرب..
الوصفة دي برضه مفيهاش تأليف كتير هنحتاج لها (فول مدمس – حمص مستوي وممكن نستخدم فول لبناني عالطول فيه الحمص والفول مع بعض جاهز – طماطم – بصل – فلفل أخضر – توم – بهارات وملح وفلفل – جبنة موزاريلا) ومعاهم طاجن كبير للفرن..

بنشوح البصل والتوم لحد ما يبقى لونهم دهبي في طاسة وعليهم الطماطم والفلفل يتشوحوا معاهم لحد ما يندمجوا سوا كويس وبعدين نضيف الفول المدمس ونقلب الخليط كويس وعليه البهارات وممكن تضيفوا ليمون لو بتحبوه ع الفول طبعًا وبعدين نخرج كل الخليط ده في طاجن على جنب.

نفرد الخليط في الطاجن ونحط فوقه الجبنة الموزاريلا وندخلهم الفرن لعشرين دقيقة على نار هادية ونطلعهم هنلاقي أحلى طاجن فول غرقان بالجبنة وبالهنا والشفا..

وده فيديو شرح أكتر للوصفة

كدة احنا خلصنا يارب نكون لحقناكم قبل ما تفطروا.. جمعة مباركة وبالهنا والشفا