أقصر 3 أيام في 2025.. ومن أقصر الأيام في التاريخ الحديث
النهاردة 9 يوليو 2025 الأرض بتشوف واحد من أقصر الأيام.. والأرض في الشهر ده وشهر أغسطس الجاي هتشوف 3 من أقصر الأيام في التاريخ الحديث وده بسبب سرعة دورانها.. وهنعرف إيه تفاصيل الموضوع ده دلوقتي
حسب New York Post وحسب Daily Mail
إيه العادي؟
الأرض عادة بتاخد 24 ساعة أو 86400 ثانية بالظبط عشان تكمل دورة كاملة وده اللي بنسميه اليوم الشمسي وكلنا خدناه في حصة العلوم زمان عادي
وإيه اللي مش عادي؟
اللي مش عادي بقى إن السنة دي هتشوف 3 من أقصر الأيام:
يوم 9 يوليو 2025 هيكون أقصر بـ 1.30 ملي ثانية
يوم 22 يوليو 2025 هيكون أقصر بـ 1.38 ملي ثانية
يوم 5 أغسطس 2025 هيكون الأقصر فيهم وأقصر بـ 1.51 ملي ثانية
وبكده يكون يوم 5 أغسطس ده أقصر يوم في التاريخ الحديث بعد اليوم اللي حصل في 5 يوليو 2024 واللي كان أقصر بـ 1.66 ملي ثانية بس وقتها العلماء مقدروش يحددوا إيه هو سبب التسارع اللي حصل لكوكب الأرض
طب إيه السبب اللي قالوه السنة دي؟
- ذوبان الجليد بشكل أسرع
- الأرض مش صلبة ففيه تحرك للطبقات المنصهرة في النواة وده بيزود السرعة
- التغيرات المناخية
- الزلازل الكبيرة ممكن تعيد ترتيب الكتلة الداخلية للكوكب
الثانية الكبيسة:
كلنا عارفين إن فيه سنة كبيسة.. إنما الثانية الكبيسة دي تبقى إيه بقى؟
حسب PBS News مراقبين الوقت ممكن يحتاجوا يطرحوا ثانية واحدة من الساعات في 2029 لأن الكوكب بيدور بسرعة أكبر شوية وده هتكون أول مرة تحصل في التاريخ وهيسموها “الثانية الكبيسة السلبية”
في النهاية اليوم لو اتشال منه 20-30 ثانية أو أكتر حتى في الغالب مش هناخد بالنا وهنفكر إن الموضوع بسيط لكنه هو بيحصل بسبب ظواهر مهمة ومحتاج متابعة لأن توابعه ممكن تكون كبيرة وخطيرة ولسه المجتمع العلمي بيحاول يوصل للسبب الرئيسي يفهموه ويعرفوا التوابع وطرق التعامل معاه
