موضوع مايهمكش: في يوم الأفوكادو.. ليه اتسمى بـ “الذهب الأخضر”.. ورحلة صعوده من إنه علف للمواشي لفاكهة الأغنياء؟

الأفوكادو فاكهة غريبة ماتفهمش ليها حاجة ولا منها مانجا ولا منها خوخ بالبذرة اللي جواه دي.. وكمان أسعاره مولعة وعشان كده هو فاكهة الناس اللي من العالم الأول.. بس تعرف أصلًا إن الأفوكادو كان علف للمواشي زمان! فهنحكيلك عن رحلة صعوده من كونه علف للمواشي لحد ما ربنا كرمه وبقى فاكهة للأغنياء

الأفوكادو علف للمواشي

الأفوكادو أصوله بترجع للمكسيك اللي بتنتج 45% من الإنتاج العالمي.. وكانت شعوب المايا والأزتك اللي بتزرعه وكانوا بيستخدموه علف للحيوانات والمواشي عشان مكنش فيه أسواق تجارية له فمكنش له قيمة كبيرة في السوق وانتشاره خارج أمريكا اللاتينية كان بطئ جدًا.. لحد ما الأسبان لقوا الأفوكادو في القرن الـ 16 وبدأوا ينشروه بس برضه الموضوع كان ماشي ببطء

رحلة انتشار الأفوكادو

لما انتشرت زراعة الأفوكادو وخلاص تجارته هتبدأ تشم نفسها وهتنتعش ظهرت موضة في بداية التمانينات أخرته وهي “موضة الجسم الرفيع والرشاقة”.. وبقت كل التلفزيونات تتكلم عن تمارين التنحيف والصحة والرشاقة وكانوا بيقولوا نصايح للناس إنهم يبعدوا عن أي أكل دهني وساعتها الناس كانوا مفكرين إن الأفوكادو فاكهة مليانة دهون وبكده هو مضر للجسم فلازم يبطلوا ياكلوه

دور الدعاية والتسويق في زيادة الطلب على الأفوكادو

لحد ما ظهرت جمعية خاصة بالأفوكادو عملها المزارعين اللي بيزرعوه عشان يحسنوا صورته وابتدوا يتعاونوا مع مراكز أبحاث عشان ينشروا دراسات بتوضح إن الدهون الموجودة في الأفوكادو دهون صحية وغير مشبعة زيها زي الموجودة في السمك وليها فوايد كبيرة  للجسم والبشرة.. التسويق والدعاية اللي حصلت للأفوكادو والقفزة الكبيرة اللي حصلت في زراعته خلت الطلب عليه كبير وسعره يزيد والناس بقت تدور عليه عشان فوايده الصحية

العصابات وتجارة الأفوكادو

الأفوكادو يهدى بقى ويبطل مشاكل؟ وهي دي تيجي برضه! حسب أستاذ البساتين بجامعة كيب تاون في جنوب أفريقيا “ماريو سكيري” فازدهار تجارة الأفوكادو وإقبال الناس عليه لفت انتباه العصابات اللي حسوا إنهم يقدروا يحققوا أرباح كبيرة من التجارة فيه أكتر من المخدرات.. وده خلاهم يعملوا سوق موازية ويسرقوا مزارع الأفوكادو أو يفرضوا إتاوات على أصحاب الأراضي وإلا بقى هيعملوا لهم حوارات ومنكش كل يوم.. ومع كل زيادة في أرباح الأفوكادو كانت عصابات جديدة بتدخل تشترك لحد ما في سنة 2019 اتخانقت 3 عصابات مع بعض عشان يسيطروا على أرباح الأفوكادو واللي كانت نهايتها موت 19 شخص ونزح 35 ألف شخص بعد ما العصابات حدفت عليهم قنابل.. واللي كان بيشجعهم أكتر على ده هو إن المناطق الريفية لزراعة الأفوكادو مساحتها كبيرة صعب الشرطة تعرف تلاحقهم فيها عشان الأراضي كثيفة رغم جهود الشرطة إنها توقعهم   (لسة برضو عايز اعرف هما مسيطرين ولا لا؟ … لو مش عارفين.. نقصر الحتة دي ونخليها في سكة حواواته مخلصتش.. وطلع عصابات كذا كذا وخلاص وسوق موازية)

ليه اتسمى بالذهب الأخضر؟

• غني بفيتامينات كتير: زي البوتاسيوم والألياف المعدنية والمغنيسيوم والفوسفور والكالسيوم واللي بيفيدوا صحة الجسم والعضم والشعر والبشرة
• ارتفاع سعره: الأفوكادو يعتبر من أغلى الفواكه في الأسواق العالمية مقارنة بالمحاصيل والفواكه التانية
• تزايد الطلب العالمي عليه: خاصة مع انتشار أنظمة الدايت زي الكيتو والدايت المعتمد على النباتات واللي الأفوكادو جزء لا يتجزأ منها.. ده غير إن الأطباق اللي بالأفوكادو بتتباع في المطاعم بأسعار خزعبلية
• صعوبة زراعته وتكاليفه العالية: بيحتاج الأفوكادو ظروف مناخية معينة وكميات كبيرة من المياه وده بيزود تكاليف إنتاجه.. ده غير إنه عشان ينمو بيحتاج من 3 لـ 4 سنين فبياخد وقت طويل

في الآخر بقى بعد ما عرفت المعلومات دي عن الأفوكادو.. انت بقى من الناس اللي بتاكله ولا بستغلاه فمابتجيبهوش؟!