ليه ممكن تحتاج تتصرف عكس اللي مشاعرك بتقولك عليه.. وإيه هو التصرف المعاكس/ Opposite Action؟
ساعات بتمر بمواقف بتعصبك وتخليك غضبان فمخك يقولك قوم اعجن اللي قدامك ده وهتبقى كويس.. بس ضروري تقف وقتها وتقرر تعمل عكس اللي مشاعرك بتقولك عليه.. وفي الموضوع ده هنقولك إيه هو التصرف المعاكس/ Opposite Action وليه مفيد حسب موقع Psychology Today و Center for Cognitive Behavior Therapy
إيه هو الـ Opposite Action؟
أسلوب في العلاج السلوكي المعرفي بتستخدمه عشان تدير بيه مشاعرك القوية.. وهو إنك لما تحس إن لما تحس بشعور يخلي عندك رغبة بتلح عليك إنك تعمل تصرف معين تروح وتعمل عكسه على طول
طب إيه خطوات تطبيقيه؟
- حدد المشكلة واسمها: فتقول أنا غضبان من اللي قدامي دلوقتي
- قيم تصرفك: اللي مشاعرك بتقولك اعمله.. قول هو الغضب ده كله صح؟ وهل الضرب والعصبية هيحل المشكلة ولا هيزودها اكتر؟
- حدد هو شعورك عايزك تتصرف إزاي بالظبط: يعني غضبك بيقولك اضرب اللي قدامك؟ ولا تكسر الحاجة اللي حواليك؟ ولا تزعقله؟
- اعمل عكس التصرف: يعني اتصرف بعكس الغضب واللي هو اللذاذة والتفهم.. واعمل عكس التصرف بالكامل يعني ماتبقاش لطيف مع اللي قدامك وانت كاتم غضبك جواك
- كرر التصرف المعاكس: كل مرة لحد ما مشكلتك تبدأ تقل مع الوقت
ليه مفيد؟
رغم بساطة الأسلوب ده ولكن هو مفيد جدًا للأسباب دي:
- بيكسر دايرة المشاعر السلبية: لما بتتصرف على أساس مشاعرك وانت زعلان مثلًا تقرر تنعزل وتقعد في سريرك فتزعل أكتر وده يخليك منعزل أكتر وتعيد في دوامة مالهاش آخر.. لكن التصرف المعاكس بيوجه انتباهك للعالم الخارجي وبيوقف الأوفرثينكنج
- بيخليك تترجم مشاعرك صح: فعقلك بيعرف إن التهديد والقلق أو الخوف اللي انت حاسه مش حقيقي.. ومع الوقت بتبدأ تعرف إن الموقف بالشكل المخيف والخطير اللي انت متخيله
- إدارة وتنظيم المشاعر: فبتبقى انت اللي بتحرك مشاعرك مش العكس.. وده بيخليك حاسس بالسيطرة
- بيحسن علاقتك باللي حواليك: فبدل ما تنفع وانت غضبان وتضايق اللي حواليك في لحظة غضب.. بتتحكم في غضبك وتعمل تصرف مختلف عكس اللي كان هيخسرك اللي قدامك
- بيخليك تواجه: وده لأن من أهم الأسباب اللي بتخلي المشاكل النفسية زايدة هو إنك بتتجنب المواجهة سواء مع نفسك أو مع اللي حواليك.. وعشان كده هو مفيد لأصحاب اضطرابات الأكل فبدل ما تزعل وتروح تاكل وتتعب.. بتقعد مع مشاعرك وتبدأ تنظمها وتعمل عكس اللي زعلك بيقولك عليه
هل كل المواقف ينفع فيها التصرف المعاكس/ Opposite Action؟
مش كل المشاعر ينفع نستخدم فيها عكس التصرف.. انت وتقييمك للموقف ولازم تسأل نفسك شوية أسئلة زي هل الشعور اللي حاسه هيخليني أعمل تصرف مبالغ فيه على الموقف اللي قدامي؟ وهل التصرف هيأثر على مستقبلي ولا لأ؟ وهل هندم على التصرف ده ولا لأ قدام؟ ولو كانت إجابتك آه هندم فضروري تعمل التصرف المعاكس
وبكده تكون عرفت طريقة تنظم بيها مشاعرك بدل ما تتهور وتعمل تصرفات تخليك تلبس في الآخر
