تفاصيل غرق قسم الآثار المصرية في متحف اللوفر

قسم الآثار المصرية في متحف اللوفر بفرنسا حصل فيه تسرب لمياه صرف صحي.. ونتيجة لده وثائق وكتب تاريخية مصرية كتيرة تضررت هناك.. فهنقولك إيه التفاصيل وحجم الخساير!

إيه اللي حصل بالظبط؟

يوم 26 نوفمبر اللي فات حصل تسرب في أنابيب مياه موجودة في غرفة من 3 غرف في مكتبة إدارة الآثار المصرية الموجودة بمتحف اللوفر.. والتسرب ده سبب فيضان كبير من مياه الصرف الصحي اللي اتلف وثائق وكتب تاريخية مصرية هناك.. ونائب مدير المتحف “فرانسيس شتاينبوك” قال إن التسرب ده حصل بسبب صمام كان معروف إنه متعطل من سنين كتيرة أوي والإصلاحات بتاعته كانت هتحصل في سبتمبر 2026

إيه حجم الخساير؟

وقال “شتاينبوك” إن حوالي 300 و400 قطعة أثرية تضررت بسبب التسريب ده.. بس هي دوريات مصرية ووثائق علمية بترجع لأواخر القرن الـ 19 وأوائل القرن الـ 20 بيستخدمها علماء المصريات وآه ليها أهمية كبيرة بس هي مش كتب تراثية مميزة كتبها المصريين القدماء نفسهم

طب إيه تحرك متحف اللوفر تجاه التسرب ده؟

متحف اللوفر هيعمل تحقيق داخلي بخصوص تسرب الصرف الصحي في قسم الآثار المصرية مكان تخزين الكتب اللي تضررت.. و”شتاينبوك” إن المخطوطات والكتب دي هيتم تجفيفها وهيبعتوها لآلة تجليد الكتب لترميمها وهيرجعوها بعدها للرفوف

ودي الحادثة التانية اللي تحصل في متحف اللوفر بعد اقتحام 4 حرامية للمتحف وسرقوا 8 جواهر قيمتهم حوالي 88 مليون يورو يعني 102 مليون دولار