6 خطوات بتقولك إزاي تحافظ على عمر بطارية موبايلك!

ماهو ماينفعش برضه تبقى جايب موبايل بالشئ الفلاني ونسيبك

 كده من غير ما نقولك تحافظ على بطارتيه إزاي؟

وقبل ما تقولي أنا ماجبتش حاجة ولسة معايا موبايلي القديم 

هقولك لو عايزه يعيش معاك أكتر بقا خلي بالك من الحاجات دي:

وده كلام وفقًا لموقع  Apple الرسمي و Google Android Help و CASE MOGUL

1. السخونية

السخونية هي العدو الأول للبطارية وبتسبب أضرار كيميائية كبيرة وهي السبب الرئيسي إن كفاءتها تقل مع الوقت.. عشان كده حاول ماتخليش الموبايل يوصل لدرجات حرارة عالية بالذات وهو في الشاحن

وساعات فيه “كوفر” بيسخن الموبايل فيستحسن تشيل “الكوفر” وانت بتشحنه

كمان فيه أجهزة كتير دلوقتي بتوقف الشحن تلقائي لما الموبايل يسخن وده بيثبتلك قد إيه السخونية دي كارثة فخلي بالك منها

2. أشحن 100 ولا 80؟

أكيد سمعت إن فيه رأيين في الموضوع ده.. الرأي الأول وهو إن الشحن لـ100% بيبوظ البطارية وبيسرع استهلاك عدد دورات شحن

والرأي التاني وهو إن الشحن لـ 80% هيخلي البطارية تتعود على كده وتقل كفاءتها الفعلية

الحقيقة إن الاتنين صح بس في حالات معينة:

زمان.. كانت البطاريات القديمة جدًا “النيكل” ممكن مع الشحن المتكرر لـ 80% تتعود وماتعرفش تشحن 100% تاني

لكن دلوقتي وفي “أغلبية” الموبايلات الجديدة.. البطاريات بقت (أيون الليثيوم – Li-ion) وده بيخليها ذكية جدًا وعارفه حدود الشحن بتاعها

فالأفضل والرأي السائد دلوقتي هو الشحن لـ 80% … لأن آخر 20% هيتشحنوا في البطارية هيحتاجوا جهد وحرارة عالية جدًا.. وده هيقلل عمر البطارية الافتراضي على المدى البعيد

مش “غلط” كل فترة للتانية إنك تشحن البطارية كاملة.. الغلط لو كل شحنة بقت كده

3. أشحن امتي؟

ماتخليش البطارية توصل لـ”زيرو”.. الأحسن تشحن لما توصل من 20 لـ10% 

لأن الزيرو ممكن يخلي البطارية مع الوقت كفائتها تقل أو ماتشحنش تاني.

4. ماتشحنش وإنت نايم

البطاريات ليها عدد مرات محدد  تتشحن فيه “شحنة كاملة” قبل ما تحتاج تتغير… ولو فضلت طول الليل في الشاحن بيقلل من السعة بتاعتها

عشان كده ماتسيبش موبايلك في الشاحن وتدخل تنام

5. اختار الشاحن المناسب

الشواحن “الرديئة” ممكن تأثر على البطارية.. حاول يكون الشاحن أصلي أو على الأقل يكون من مكان معروف وموثوق على قد ماتقدر

6. حَدث على طول

تحديثات الـ”سوفت وير” مهمة وبتفرق جدًا في عمر البطارية خصوصًا وفي موبايلك عمومًا

وأخيرًا مبروك ياسيدي على الموبايل الجديد ولو كنت من الشرفاء اللي لسه مجددوش موبايلاتهم ولا يهمك وروق وتماسك كده