فاضل أيام قليلة على رمضان وعارفين إنك شايلة هم العزومات وفطار الـ 30 يوم من دلوقتي وإزاي هتعرفي تطبخي أكل يشبع وتعملي سفرة كاملة كل يوم.
فهنقولك شوية تجهيزات لو عملتيها من دلوقتي هتسهل عليكي وتوفرلك وقت ومجهود في رمضان:
هتسد معاكي في المحشي والخضار والمكرونة وأي تسبيكة صلصة سريعة.. فشوية طماطم وملح وفلفل وسكر وعلى الخلاط بقى.. وقسميهم في أكياس وارمي في الفريزر.
أفرمي كمية محترمة من التوم.. كده كده أساسي في أكلات كتير..
مع رشة ملح وحطيه في علبة مقفولة كويس في الفريرز.
مفيش سفرة في أول يوم رمضان مافيهاش محشي من أي نوع ..
فممكن تجهزي بإنك تسلقي الكرنب وتقطعيه في أطباق.. ووقت ما تحتاجيه طلعيه من الفريزر يفك.. بس وهيبقى سهل يتحشي بعد كده.
ورق العنب نفس الكلام.. بس زودي لمونة في السلق عشان يدي “المزازة” اللي بنحبها دي.
بشوية بصل متشوح في زيت أو زبدة وحطي اللحمة المفرومة لحد ما يبقي لونها بني.. وتقدري تزودي صلصة أو فلفل ألوان وأي بهارات شغالة معانا.
دي بقى ماتقوليش لحماتك عليها.. أو قوليلها لو بتحبيها أوي يعني
هتحمري الشعرية أو لسان العصفور في شوية زيت “قليلين” جدًا لحد ما ياخدوا لون حلو.. وبعد ما يبردوا حطيهم في برطمان نضيف ومقفول كويس بعيد عن المياه والحرارة.. هينجزوا معاكي أوي في رمضان.
سواء بتقوليها بالكاف ولا بالهاء.. مش موضوعنا دلوقتي.
هتحشيها باللي عايزاه وتحطيها في الفريرز.. بس اتأكدي إنه مش لازق في بعضه عشان يبقي سهل في القلي بعد كده.
دي بقى انتي أكيد عارفاها.. تبلي كل حاجة بتحتاج تتبل من دلوقتي وماتنسيش البانية اللي هينقذك في نص رمضان.
تقدري تتبليه وتسييبه أو تعمليه بالبقساط وتشيليه في الفريزر على القلي.
جهزي الخضار اللي بتحبيه.. لو بتحبي البسلة فصصيها من دلوقتي.. قطعي القلقاس.. قمعي البامية.. جهزي الفاصوليا.
وياه لو قسمتيهم في أكياس وكل كيس يكفي طبخة.. تبقي شيف وبرنسيسة والله.
لزوم الترويق على اللي بياكلوا.. قطعي البطاطس من دلوقتي وإغسليها كويس لحد ما النشا كله يروح مع الماية.
حطيها في ماية ساقعة وتلج ومعلقة خل أو ليمون وبعدها إغسليها تاني ونشفيها وجمديها في الفريزر.. ولو عايزة تبقى أحلى أسلقيها نص سلقة كده الأول.
كفتة لحمة.. كفتة فراخ.. كفتة رز.. كله شغال.. جهزي وعلى الفريزر مفيش وقت للتفسير.
ماهو موسم بقى وهيطلب منك كل يوم كنافة شكل.. جهزي
برطمان حلو كده للشربات هينفعك في المواقف دي.
وبس ياستي.. رمضان كريم وكل سنة وإنتي طيبة وربنا يعينك يا ست الكل.
