مراجعة سريعة لـ مسلسل” أهل كايرو” هتعرفك إن المسلسل بيبان من تتره!

بذمتك انت.. مش دايمًا بيجي في بالك كوبلية “أنا ليا طلب عندكم والنبي علشاني.. فيه حد معاه تليفون دكتور نفساني؟”

بالمناسبة دي أحب أعرفك.. ده تتر مسلسلنا النهاردة

1 رمضان 2010 كان عرض أول حلقة من “أهل كايرو”.. من إخراج محمد علي وبطولة خالد الصاوي وكندة علوش ورانيا يوسف والراحل زكي فطين عبد الوهاب.

ظابط مباحث غرب القاهرة “حسن محفوظ” أو خالد الصاوي اللي هيلففك معاه الـ 30 حلقة عشان نحل قضية رأي عام ونجاوب على سؤال: مين اللي قتل “صافي سليم”؟

وحل السؤال ده مش سهل للأسف.. لأن”صافي” اللي بتقوم بدورها رانيا يوسف.. سيدة المجتمع اللي البلد كلها اتعزمت في فرحها هتخليك انت وحضرة الظابط تشكوا في كل الموجودين اللي تقريبًا كلهم عندهم دافع للقتل

“أهل كايرو” جواه خطوط اجتماعية بين حسن وطليقته.. وبينه وبين الصحفية “داليا غنيم” أو كندة علوش اللي هيكون ليها دور مهم في كشف الجاني.

ولو حسيت إنه أيوه وماذا بعد؟ تفرق إيه انت عن باقى الدرامات البوليسية التانيين؟

فهقولك إن مش أنا اللي هرد عليك.. رانيا يوسف اللي هترد عليك.. لما قالت في لقاء قديم لها إن محدش كان عارف مين القاتل الحقيقي غير تلاتة.. المخرج والمؤلف وخالد الصاوي.. وده اللي هيخليك لحد أخر حلقة فعلًا مش عارف هو مين اللي قتلها؟ إذا كان الممثلين نفسهم مش عارفين.. انت اللي هتعرف؟

ده غير التتر المميز اللي معروف لحد دلوقتي.. اللي لو ماشوفتش حتى المسلسل أكيد هتبقى عارفه وبتحبه!

المسلسل “كوكتيل” بين الدراما والتشويق.. وشوية رومانسية خفيفة على الوش.. ومعلقتين كبار كوميديا وإيفيهات مستخبية مش هتزهقك منه.

فجهز بقى كوباية البلح وانت بتدندن “عيني على أهل كايرو” واتفرج برواقة.. ولما تخلصه ابقى قولنا مين اللي قتلها.