موضوع مايهمكش: إزاي تعالجي شعرك لو بوظتيه من صبغة العيد أو قصيتيه غلط؟

عيدتي؟.. واتبسطتي؟.. تعالي بقى ننقذ اللي عملتيه في شعرك يوم الوقفة!

لو اتهورتي “كالعادة” وصبغتي شعرك أحمر ناري في العيد.. فتعالي اشرحلك اللي حصل:

صبغة الشعر عبارة عن شوية مواد كيميائية.. لما بتتحط على الشعراية بتبوظ حاجز الحماية الطبيعي للشعر أو جذع الشعراية نفسه.. وده اللي بيخليه ضعيف وناشف.. فالنتيجة النهائية إنه هيتقصف.

غير إن طبقة الحماية دي مع الوقت بتكون مساميتها عالية.. فاللون يتسحب من الشعر بسرعة.. فتروحي تصبغي تاني.. وهكذا بقى لحد ما نشوف أخرتها مع الشعر ده.

طب نعالج الكلام ده إزاي؟

أول حاجة اتقي الله في شعرك

محتاجة تريحي شعرك شوية.. لا تصبغيه ولا تعمليه مكوة دلوقتي.. هو ضعيف خلقه فسيبيه في حاله الله يرضى عليكي.

تاني حاجة رطبيه كويس أوي

استخدمي حمامات كريم وماسكات للشعر يكون فيها مواد مرطبة زي: جوز الهند وجل الصبار وزيت اللوز الحلو وزبدة الشيا.. بس أهم حاجة الانتظام من مرة لمرتين في الأسبوع.

وخلي بالك.. سيبيه حوالي نص ساعة وماتقربيهوش من الفروة.. لا يوقعلك الشعر اللي فاضل إحنا مش ناقصين.

تالت حاجة البروتين مهم جدًا

بس مش اللي بيتاكل.. في حمامات كريم وماسكات بتعتمد على مواد بروتينية وكيراتين وزبادي وكده.. مهم تستخدميهم مرة كل 3 أسابيع أو شهر عشان تقوي روابط الشعر وتعوضي البروتين اللي الشعر فقده.

طب لو انتي من الشرفاء اللي ماصبغوش بس اديتيها واحدة نو ريسك نو فان واتهورتي وقصيتيه؟

هتحتاجي تتأكدي الأول شعرك خفيف ولا لأ عشان تعرفي تحددي هتستخدمي إيه؟

يعني مثلًا.. لو شعرك خفيف ومش بيستحمل حاجات كتير على الفروة.. أحسن حل ليكي تستخدمي “لوشن” أو سبراي قوامه مائي وترشي منه كل يوم.. هيساعدك تطولي شعرك تاني.

لكن لو شعرك تقيل.. تقدري تستخدمي زيوت تطول وتتقل الشعر زي: الجرجير أو الخروع أو الروزماري.. التوم برضو هيفيدك جدًا بس اعملي نفسك مش شامة حاجة بقى.

ماتنسيش لو استخدمتي زيوت تغسلي شعرك كويس عشان ماتسدش المسام.

أهم حاجة المرة الجاية تاخدي بالك من دول:

• كده كده الصبغة والحرارة مابيجيش من وراهم خير.. بس التجديد حلو برضه فماتكتريش منهم وحاولي لو هتصبغي تستخدمي صبغة مافيهاش أمونيا.. ولو هتكوي شعرك حطي سيروم واقي من الحرارة.

• لو بتخافي من الصبغة بس عايزه تدي “ضي” خفيف لشعرك.. الحنة مأثرتش معاكي في حاجة صدقيني.

• قصي شعرك زي ماتحبي ماحدش واخد منها حاجة.. أهم حاجة بس تحافظي عليه يكون صحي.. وتكون القَصة لايقة على وشك وعاجباكي.

• تقدري تعرفي شكل القَصة اللي هتليق عليكى لو عملتي سيرش بسيط عن شكل الشعر اللي بيليق على كل شكل وش.. عشان مترجعيش تندمي بعد كده وتعيطي لصحابك في التليفون.

• افهمي طبيعة شعرك إيه.. عشان لو عوزتي تطوليه تاني ماتوقيعهوش وتختاري الحاجة المناسبة ليكي.

وكده كده انتي حلوة وشعرك حلو وأهم حاجة تكوني اتبسطتي بيه في العيد.. مش مهم عواقب الأفعال بقى خليكي فريش!