ليه بنفصل في نص القعدة الحلوة مع صحابنا؟ ونعالج الموضوع إزاي؟
كام مرة بنبقى نفسنا نخلص شغلنا يوم الخميس وبنكون مستنيين بفارغ الصبر ننزل نقابل صحابنا.. وأخيرًا وبعد شيفت طويل لا ينتهي بننزل فعلًا ونطلب مشروبنا المفضل.. وفجأة في نص الكلام بنسكت ونحس إننا عايزين نمشي ونرجع البيت عشان ننام في سلام وبيبقى صعب نكمل القعدة بنفس الحماس؟
بس السؤال هنا.. ليه بنفقد الشغف فجأة مع إننا كنا متحمسين من صباحية ربنا للنزولة دي؟
مبدأيًا محتاج تعرف إن الإنسان مننا عنده حاجة اسمها “Social Battery” أو الطاقة الاجتماعية.. بالبلدي كده هي شوية الطاقة اللي عندك عشان تعرف تتعامل مع الناس.
فالطاقة دي لو كتير هتعرف تتعامل كويس وتتفاعل مع الناس اللي حواليك.. طب ولو قليلة؟ مش هتبقى قادر تتكلم أو تتتعامل مع حد.. بالظبط زي اللي حصل معاك زي ماقومت وسيبتهم
وقبل ما تروح تسأل جوجل وتفتكر إن الموضوع خطير.. أحب أطمنك إن ده شئ طبيعي.
وأسبابه كتيرة بتحصلنا كلنا زي مثلًا:
- نوع التفاعل الاجتماعي نفسه.. هل بنتكلم في شغل ولا قاعدين بنهزر ولا بنتناقش في حاجة مهمة؟
- جودة التفاعل أو سهولته.. وده معناه هل بتتعامل مع حد بيجادل ومطلع عينك مثلًا ولا عادي؟
- الضغوط الخارجية.. دي من أهم العوامل اللي بتأثر على طاقتك الاجتماعية لأن مثلًا ممكن لو حسيت إنك في مكان دوشة أو خارج مع عدد كبير ده يحسسك بالضغط وإنك عايز تسكت شوية
- الضغوط الداخلية.. ودي واضحة بقى.. مانت لو قلقان ولا بتفكر في حاجة شاغلاك أكيد طاقتك في التعامل مع الناس هتختلف
بس برضه محتاج تعرف حاجة مهمة وهي كل شخص ليه طاقة اجتماعية مختلفة عن أخوه اللي جنبه.. فمتخلش دماغك تسأل ليه بيحصلك كده معإن صاحبك كان قاعد معاكو وبيتكلم عادي بكل نشاط وحيوية.
طب إيه الحل؟
أول حاجة محتاجين نعرفها إن مش دايمًا الحل بيكون فيه إننا ناخد وقت أو مساحة لنفسنا ونفضي دماغنا.. لأن دماغنا بتعتمد على طريقتين في الموضوع ده:
-
الأولى هي “Self Regulation”
واللي عبارة عن إنك تحاول شحن طاقتك لوحدك او تنعزل خمسة كده عشان تعرف ترجع تواجه العالم تاني.
-
والطريقة التانية هي الـ”Co Regulation”
وده بقى جهازك العصبي مش بيعرف يشحن طاقته تاني إلا لما يتواصل مع ناس حواليك.
طب إزاي هقعد مع ناس وأحس اني فاصل وعايز امشي ويبقى الحل إني اقعد مع ناس برضه؟
وسع خلقك يا عزيزي القارئ هنشرحلك.. الفكرة هنا إنك ممكن تكون محتاج تقعد مع ناس مختلفين مش نفس اللي قاعد معاهم.. أو حتى هما هما بس محتاجين تغيرو الموضوع أو تقعدو قعدة ساكتة شوية.. ساعتها هتلاقي نفسك فوقت تاني ومش عايز تمشي.
خلي بالك:
إن في بعض الأشخاص طاقتهم الإجتماعية بتخلص أسرع من المعدل الطبيعي.. دول اللي بنسميهم “High Sensory Intelligence”.. اللي عقلهم بيفسر تفاصيل أكتر من الشخص العادي.
يعني هتلاقيهم مركزين في نبرات صوت اللي قاعدين كلهم.. أو حركة عينهم أو حتى الروايح اللي في المكان بشكل أكتر من العادي.. ده بيخليهم يستنزفوا طاقتهم بسرعة.
فكل اللي محتاجه تشوف انت بترجع تشحن طاقتك أسرع وانت لوحدك ولا لأ؟.. لو الإجابة لأ يبقى جرب المرة الجاية تقعد مع ناس مختلفة أو تغير الموضوع اللي بتتكلم فيه مع نفس الناس أو تقوموا من مكانكو تتمشوا شوية حتى.
أهم حاجة بس مانبقاش نتحجج بطاقتنا الإجتماعية اللي خلصت واحنا بنفكس لخروجات صحابنا بعد كده هاه!
