طريقة جديدة لإطفاء الحرايق باستخدام الموجات الصوتية.. طب إزاي الكلام ده؟

عمرك فكرت إن هييجي يوم نطفي فيه أي حريقة باستخدام الصوت بدل المياه وطفاية الحريق؟ الموضوع مابقاش مجرد فكرة.. 

نجحت شركة “Sonic Fire Tech” المتخصصة في مكافحة الحرائق إنها تتطور فكرة بدأها اتنين مهندسين في جامعة “جورج ماسون”.. والفكرة كانت عن استخدام الموجات الصوتية البسيطة في إطفاء النار.. 

شركة “Sonic Fire Tech” بقى طورت الفكرة وعملت منها جهاز يستخدموا رجال الإطفاء عشان يطفوا الحرايق.. وده من خلال توجيه موجات صوتية عالية جدًا بترددات منخفضة بين 30 و60 هرتز..

طيب ده هيحصل إزاي؟

العلماء اللي اشتغلوا على التجارب قالوا بما إن النار عشان تولع بتحتاج 3 حاجات (وقود + حرارة + أكسجين).. فإحنا لو قدرنا نسيطر على عنصر من العناصر دي هنقدر نمنع النار بنجاح.. 

توجيه الموجات الصوتية بالترددات دي بيأثر على الأكسجين اللي في التفاعل الكيميائي اللي بيعمل النار.. وده من خلال الضغط عليه وإخراجه من حيز النار.. وبالتالي النار ماتلاقيش الأكسجين اللي بيغذيها فتنطفي.. 

الموضوع بيحصل بسرعة كبيرة.. موجات الصوت بتخرج الأكسجين من مكانه بشكل أسرع من قدرة الأكسجين الجديد على الدخول تاني في التفاعل وبكده النار تموت بسلام وأمان 

الجهاز له مميزات كتير

• مش هنستخدم مياه في إطفاء الحرايق وده هيقلل تلف الأثاث في أي مكان بيولع مثلًا 
• كمان مفيش كيماويات زي الطفايات التقليدية أو الإطفاء الرغوي.. وده هيحافظ على البيئبة 
• أسرع من أي وسيلة تانية

رغم كل المميزات دي فهو له شوية عيوب برضه:

• مش فعال أوي قدام الحرايق الكبيرة.. يعني هيكون فعال أكتر لو الحريقة في حاجة صغيرة أو في بدايتها 
• كمان مش زي المياه اللي بتبرد مكان الحريق وهي بتطفيه.. موجات الصوت ممكن تطفي النار بس مش هتبرد مكان الحرق 
• هو لسه مش بديل كامل ونقدر نعتمد عليه لأنه لسه في مرحلة التطوير 

وفي النهاية خلوا بالكم من نفسكم عمومًا وبلاش تلعبوا بالنار سواء هتطفيها بالمياه أو الصوت.