دراسة جديدة.. مخك بيشتغل حتى وانت مش واعي!
طول عمرنا عارفين إن المخ ده حاجة معقدة جدًا.. ومن زمان العلماء بيحاولوا يفهموه عشان يعرفوا هو بيشتغل إزاي؟
وده اللي خلى العلماء والباحثين يكتشفوا كل يوم حاجة جديدة فيه.
وعلى حسب كلام “MedPage Today” إن من ضمن الاكتشافات دي هي دراسة عملها باحثين في كلية بايلور للطب اللي في أمريكا واللي عرفوا منها إن المخ قادر يعالج ويفهم اللغة والأصوات حتى لو متخدر وفاقد للوعي.
ووضح أستاذ ورئيس قسم جراحة الأعصاب في مؤسسة كولين الدكتور “Sameer Sheth” إن النتائج أظهرت إن الدماغ بتكون نشطة جدًا في وقت فقدان الوعي أكتر من اللي كانوا فاكرينه قبل كده.. وإن حتى لما المريض يكون تحت تأثير التخدير الكامل المخ بيفضل يحلل اللي بيحصل حواليه!
وعشان يثبت الكلام ده.. سجل النشاط العصبي للخلايا العصبية الفردية في مكان معين في المخ اسمه “hippocampus”.. وده جزء مرتبط بالذاكرة.
وخلي بالك ده ماحصلش مع إنسان سليم.. ده حصل مع مريض صرع داخل يعمل عملية وهو متخدر.. وده مش عشان هم بيعشقوا المعاناة لأ عشان المرضى اللي بيعملوا النوع ده من الجراحة تحديداً هيسهلوا عليهم يوصلوا للجزء ده من الدماغ.
وبدأت العملية.. وباستخدام تقنية الـ “Neuropixels” بدأوا يعرضوا المرضى لنغمات بتتكرر وفي النص كده بيدخلوا أصوات مختلفة كل شوية.. لقوا إيه بقى؟
لقوا إن الخلايا العصبية دي قادرة تميز النغمات غير المألوفة.. وإن القدرة دي بتتحسن بمرور الوقت وده معناه إن فيه “مرونة عصبية” في المخ حتى أثناء التخدير.
طب وبعدين؟
الباحثين ماسكتوش لحد كده واتجهوا لحاجة معقدة أكتر.. بدأوا يعرضوا قصص قصيرة على المرضى ويسجلوا الاستجابات العصبية.
واتفاجأوا إن الجزء ده من المخ أظهر معالجة فورية للغة وقدر يميز بين أجزاء الكلام زي الأسماء والأفعال والصفات.
وكمان لقوا إن الإشارات العصبية تقدر تتنبأ بالكلمات الجاية في الجملة.
وده خلى فيه تساؤل إزاي ده بيحصل برغم الاعتقاد بإن النوع ده من التنبؤ دايمًا مرتبط باليقظة والانتباه والشخص الفايق المصحح.. فإزاي بيحصل في الوقت اللي الشخص فيه فاقد للوعي؟
هو الاكتشاف بيقول إيه؟
الاكتشافات دي وضحت إن الوظائف الإدراكية زي فهم اللغة والتنبؤ مش بتتطلب وعي.. بالعكس.. الوعي نفسه غالبًا مش بيطلع من جزء واحد بس في المخ لكن بيحتاج إن كذا منطقة في الدماغ تشتغل وتتواصل مع بعض في نفس الوقت.
العلماء كمان قالوا إنهم إن مخ الإنسان في حتة التنبؤ دي بيتشابه شوية مع الذكاء الاصطناعي.. وإن الاتنين لما بيسمعوا جملة بيبدأوا يتوقعوا اللي هيتقال بعدها.
طب شو استفدت؟
النتائج دي هتساعد الباحثين يفهموا أكتر إزاي الأنظمة البيولوجية والاصطناعية بتحلل أي معلومة تدخلها.. وده هيسهل عليهم تطوير تقنيات جديدة للتواصل.. زي أجهزة تعوض الناس اللي فقدت القدرة على الكلام مثلًا..وده على حسب كلام دكتور “Vigi Katlowitz” الكاتبة الرئيسية للدراسة دي.
لكن ده مايمنعش إن لسه محتاجين بحث أكتر عن الموضوع.. لأن ماتنساش يا عزيزي القارئ إن ده اتجرب على نوع واحد بس من التخدير.. ممكن مايمشيش مع باقي الأنواع.. ولا مع باقي أنواع فقدان الوعي زي النوم أو الغيبوبة.. كمان الدراسة دي كانت على منطقة واحدة بس من المخ.
الدراسة دي أكبر إثبات على إن الوعي أكثر تعقيدًا بكتير من اللي إحنا فاهمينه.. وإن مخنا بيعمل حاجات كتير في السر وإحنا مش عارفين.. ومين عارف هيكتشفوا إيه كمان شوية.. مش يمكن مخنا يكون بيعمل حاجات تانية إحنا مانعرفهاش؟!
