في ذكرى افتتاح أول مطار مصري.. إيه حكاية إنشاء مطار ألماظة؟
زي دلوقتي من سنين كتير كانت مصر تحت الاحتلال الإنجليزي.. ومن ضمن التحكمات البريطانية وقتها إن مايبقاش فيه أي سيادة مصرية على أي مطار موجود في مصر.. وإن لازم الإشراف على المطارات يكون بريطاني أول عن أخر.
ولو استغربت وقولت إيه ده؟ حتى مطار القاهرة وبرج العرب؟ هقولك ماتقلقش دول لأ.. لأن ببساطة ماكانوش موجودين وقتها أصلًا.
في الوقت ده ماكنش فيه أي مطار في مصر غير مطار “هليوبوليس” واللي حسب كلام وزارة الطيران المدني المصرية.. إنه كان مسموح بس لسلاح الجو البريطاني وكانوا بيستخدموه أثناء وبعد الحرب العالمية الأولى.. وكان ممنوع على الطيارات المصرية والأجنبية التانيين.
لكن مصر ماكانش عاجبها الوضع وكانت عايزة يكون لها كامل السيطرة والحرية الجوية بالذات بعد ما بدأ يطلع جيل من الطيارين المصريين الأوائل.. فقررت مصر وبمرسوم ملكي تبني أول مطار مصري تحت سيطرتها بالكامل.
واتحط حجر الأساس.. وفى سنة 1930 بدأ التنفيذ الفعلي لـ “مطار ألماظة”.
وزي النهاردة من 94 سنة.. يوم 2 يونيو 1932.. افتتحه الملك فؤاد رسميًا بمناسبة وصول أول سرب من سلاح الطيران المصري الحربي من إنجلترا وهبطوا بطائراتهم في مصر في قاعدة ألماظة الجوية.
وكانوا 5 طائرات من ضمنهم تلاتة مصريين واللي حلق بيهم الطيارين عبد المنعم ميجاويتي.. أحمد عبد الرازق وفؤاد عبد الحميد حجاج.
وكان افتتاح شعبي كبير بحضور الملك والحاشية بتاعته.. ومن وقتها اتكتب سطر جديد في تاريخ السيادة المصرية الجوية وتاريخنا المصري كله.
