موجة الاكتئاب الموسمي بدأت.. اعرف إنت بتعاني منه ولا لأ!

في فصل الخريف والشتاء بتقل ساعات النهار والليل بيبقى أطول وغالبا النوم والكسل بيبقوا مسيطرين على كل الناس، وده بيخلق نوع من أنواع الاكتئاب اللي اسمه الاكتئاب الموسمي وهو تقريبا اكتئاب بيكون جاي من قلة التعرض للضوء وتحول السما للون الرمادي بسبب الغيوم واللي بيُعتقد إنه بيسبب اختلال في التوازن الكيميائي في الدماغ، الاكتئاب الموسمي هو الاكتئاب اللي بيبتدي وينتهي تقريبا كل سنة في نفس الوقت من كل سنة، قليل جدا لما بيكون فيه اكتئاب موسمي في الصيف أو الربيع.

وبيعتبر الاكتئاب الموسمي من أشد أنواع الاكتئاب ومن أعراضه:

1- الشعور باليأس 

2- فقدان الطاقة

3- صعوبة التركيز

4- مشاكل النوم والشهية

5- التفكير في الانتحار 

لكن فيه أعراض بتخص الاكتئاب الموسمي اللي بيكون في الشتاء زي:

1- مابتقدرش تقعد مع الناس لفترة طويلة

2- حساسية من النقد 

3- النوم لفترات طويلة

4- زيادة الشهية بطريقة توصل لزيادة الوزن

5- الإحساس بتقل في الإيد والرجل

ولإننا دلوقتى في فترة تغيير فصول وداخلين على فصل الخريف أخيرًا بعد ما فصل الصيف انتهى، أغلبنا هيبقى بيعاني من تغيير في المزاج أو الاكتئاب الموسمي وده هيأثر عليه بشكل ما.. موقع “everydayhealth” قال شوية نصايح عشان نقدر نتخطى بيهم الاكتئاب الموسمي:

1- اتحرك:

زي أي نوع اكتئاب الحركة والتمارين بيساعدوا على تخفيف الاضطرابات العاطفية، والتمارين في الهوا ممكن تبقى مفيدة أكتر، ولو مش قادر تتمرن ممكن تتمشي حتى لو على “تريدميل”، والتمارين كمان هتساعدك تخس لو كان بيجيلك اضطرابات في الأكل أثناء الاكتئاب الموسمي.

2- استمتع بوجود شمس في يومك:

لو كنت بتعاني من اكتئاب موسمي في الشتاء أو الخريف خصوصا فخلي بالك إنك محتاج تخرج بدري على قد ما تقدر في النهار وتستفيد بوجود الشمس، ولو هتقعد في البيت في يوم فأنت محتاج تسيب الستاير مفتوحة أكبر وقت ممكن عشان الضوء الطبيعي يدخل بيتك.

3- التزم بجدول زمني:

لو بتعاني من الاكتئاب الموسمي فغالبا هتبقى بتعاني من صعوبة في النوم بالليل وهتبقى بتعاني برضه من إنك تصحى بدري، ولكن عشان تقلل المعاناة دي فأنت محتاج تحافظ على مواعيدك خصوصا في النوم والأكل والصحيان وده هيساعد على تخفيف أعراض الاكتئاب.

4- خد إجازة:

الإجازة الشتوية احتمال تساعد الأشخاص اللي عندهم اضطرابات إنهم يتخطوا الاكتئاب ده، لإن السفر بيكسر الروتين اليومي وبيساعد الشخص إنه يهرب من الجو البارد وياخد استراحة واحتمال يشوف شمس أحسن وجو أروق.

5- خليك شخص منتج:

حاول تعمل لنفسك “To do list” واكتب فيها حاجات تتعمل، حتى لو هتتعشى برا أو هتروح سينما أو تخرج مع صحابك أو تروح حفلة، وممكن تكتب فيها أهدافك في الشغل كل يوم كمان، وده كله عشان ماتسبش نفسك تقعد في السرير تحت الغطا وتستسلم للاكتئاب.

6- استخدم الروايح:

العلاج بالروايح ممكن يساعدك تتخطى الفترة دي، لإن الزيوت الأساسية بتأثر على المنطقة اللي في الدماغ المسؤولة عن التحكم في الحالة المزاجية وبتأثر على النوم والشهية، فممكن تستخدم الزيوت دي عن طريق إنك تحطها على ايديك وتشمها أو تحط شوية منها في حمامك الليلي أو تجيب شمع بروايح.

7- اتكلم مع دكتور:

عشان الاكتئاب الموسمي شكل من أشكال الاكتئاب برضه فمن الأحسن إن دكتور هو اللي يشخصه بعد ما تتكلم معاه ويسألك أسئلة معينة ولو لقاك محتاج لعلاج هو كمان يقدر يديك حاجة زي كده بشكل آمن.