خريطة جديدة في PUBG وأجزاء جديدة من GTA و Call of Duty.. وأخبار تانية في الملخص الأسبوعي
مساء الجمال والكريستال على كل جيمر بيتابعنا وبيتجدد موضوعنا اللي بنلخص لكم فيه أهم الأخبار اللي حصلت في عالمنا الجميل وهو عالم الفيديو جيمز.
أهم خبر هنبدأ بيه عشان دي اللعبة المفضلة لأي جيمر سواء مخضرم أو على قده، وهو إنه أخيرا أخيرا أخيرا شركة “روك ستار” المطورة للعبة GTA أعلنت بشكل رسمي إن في جزء قادم للعبة.
كل السنين اللي فاتت كان الأخبار اللي بتطلع ما هي إلا تقارير وتوقعات، وكان نفسنا نشارك معاكم أي تفاصيل زيادة بس للأسف هما ماأعلنوش ولكن بيقولوا إن عملية تطوير اللعبة شغالة دلوقتي وهيعلنوا التفاصيل وقت ما يكونوا جاهزين لده، هل ممكن نسمع أي أخبار قبل نهاية 2022؟ ابقوا قولوا لنا رأيكم.
وعلى سيرة الكلام في تطوير الألعاب والأجزاء الجديدة، استديو “Infinity Ward” أعلن عن تطوير جزء جديد من “Call of Duty” من خلال حسابهم على تويتر.
وده أول إعلان رسمي من جانب الاستوديو، بعد ما انتشر في الشهور الأخيرة أخبار عن تطوير جزء جديد من اللعبة واللي هيجي تكملة لجزء “Modern Warfare” اللي تم طرحه في 2019 وحقق نجاح ضخم في السلسلة كلها.. نتمنى نشوف تريلر للعبة خلال الشهور الجاية.
A new generation of Call of Duty is coming soon.
Stay frosty.
— Infinity Ward (@InfinityWard) February 3, 2022
وباستكمال كلامنا على التطوير برضه.. استوديو “Naughty Dog” فتح الباب لعدد كبير جدا من الوظائف الشاغرة، و”نيل دركمان” أحد مخرجي الاستوديو عمل كوت ريتويت للتغريدة وأعلن بشكل شبه مباشر عن 3 ألعاب جديدة جاية في السكة.. من الواضح إن 2022 هتشهد عظمة في صناعة الألعاب.
We’re growing! Come join us and work on 🤫, 🤐, and 🤭! https://t.co/rKL3u4iZaq
— Neil Druckmann (@Neil_Druckmann) February 4, 2022
اللي يشوف بلاوي الناس تهون عليه بلوته.. وبلوة شركة” EA” كبيرة بعد آخر جزء من “Battlefield” واللي خيبت ظنون كل محبين السلسلة بعد ما ظهرت اللعبة بمستوى سيء جدا، فقام أكتر من 60 ألف لاعب بتوقيع عريضة عشان يستردوا أموالهم، وبالمناسبة.. اللعبة سعرها 70 دولار.
لعبة “PUBG Mobile” أعلنت عن شراكة مع منظمة السياحة اليونانية عشان هتطلق خريطة جديدة قائمة على جزيرة “سانتوريني” اليونانية والخريطة هتتسع لـ8 لاعبين ضد 8 آخرين.
