موسم اللسع: تفسير الكهرباء اللي بتحس بيها لما تلمس أي حد وأي حاجة

كل سنة في اليومين دول أغلب الناس بتشتكى وتصيح على السوشيال ميديا وفي الحقيقة من إنهم لما بيسلموا على حد أو بيلمسوا أي حد أو حاجة بيتكهربوا، وبيحسوا بشرارة طالعة كأن فيه كهرباء فعلا، أو لما بيلمسوا آلة فيها كهرباء أو جمادات زي مقبض الباب أو العربية ممكن يتكهربوا برضه، الموضوع ده مش أنت بس اللي بتعاني منه وماتشكش في نفسك وتحس إن أنت اللي فيك حاجة غلط.

عموما بسبب زيادة حكاية لسعات الكهرباء اللي بين الناس وبعض في الجو ده، ناس كتير شكت إنها ممكن تبقى تعبانة أو عندها مشكلة، بس الحقيقة المشكلة مش فيك خالص، المشكلة هي إن جسمك بيكون فيه شحنات كهربائية ساكنة أو كامنة والجسم اللي بتمسكه برضه في شحنات كهربائية ساكنة سواء كان مقبض أو هدوم صوف مثلا فبتحس بلسعة كهرباء.

 ده غير إن برضه من ضمن الأسباب اللي بتزود النوع ده من لسعات الكهرباء المفاجئة في الفترة دي هي جو الربيع أو جو الخريف برضه وده اللي بيبقى فيه رياح شديدة ومفيش مطر وده أصلا بيزود كمية الكهرباء في الجسم.

وسبب تاني برضه هو نوع الهدوم اللي الشخص بيبقى لابسها والمادة اللي الهدوم بتبقى مصنوعة منها والمواد المصنوع منها نعل الجزم برضه، الهدوم بتشيل شحنات واحتكاك الحاجات ببعض بيولد كهرباء فيها سالب وموجب وده اللي بيسبب اللسعة اللي بيحس بيها بعض الناس.

فيه شوية نصايح عامة ممكن تتلتزم بيها لو اللسعات الكهربائية بدأت تضايقك زي:

1- حاول ماتلبسش هدوم مصنوعة من الصوف أو الهدوم الصناعية خصوصا إننا بنلبسهم كتير في الشتاء

2- ممكن قبل ما تلبس الهدوم تبخ أو ترش عليها شوية مياه عشان تخفف النسيج 

3- البس جزم متبطنة بجلد 

4- حاول تمشي كتير حافي على الأرض عشان تفرغ الشحنات الكهربائية من جسمك لما رجلك تلمس الأرض 

5- البس هدوم قطن أكتر خصوصا لو الهدوم الداخلية واللي بيكون فيها ألياف طبيعية مش بوليستر صناعي 

6- حاول تلمس قطع خشب أكتر وقت ممكن أو البس أسورة من النحاس عشان تسحب الشحنات الكهربائية الزيادة من جسمك