10 حاجات تعمليها عشان تحمي شنطتك وموبايلك من السرقة في الشارع
بعد انتشار فيديو من حلقة في برنامج رضوي الشربيني “هي وبس” اللي بيتم عرضه على قناة CBC سفرة وكانت مستضيفة مدربة “كيك بوكسينج” بتقول للبنات يتصرفوا إزاي لو حد حاول يسرق شنطتهم ولكن لما استدعوا حد غير اللي كان معاها قدر يقطع الشنطة من البنت فعلا ويخطفها.
وبسبب انتشار الفيديو ده حبينا نقولك شوية حاجات تعمليها عشان ماحدش يعرف يسرق شنطتك أو يسرق أي حاجة منك بعيدًا عن الفيديو ده:
1- ركزي مع صوت الموتوسيكلات اللي جنبك أو قدامك وخليكي وخصوصا الموتوسكيلات اللي جايه من وراكي.
2- بلاش تحطي محفظة أو موبايل أو أي حاجة مهمة في جيوب الموبايل اللي ورا.
3- حاولي وأنتي بتتكلمي في الموبايل يبقى من خلال “الايربودز” أو السماعات حتى وخلى الموبايل في جيبك برضه.
4- شغلي برنامج يحدد مكان موبايلك في حالة سرقتها.
5- وأنتي شايلة الشنطة بلاش تخليها متعلقة على كتفك كده بس، وامسكيها كويس.
6- لو كان فيه فلوس في الشنطة اللي أنتي ماشيه بيها حاولي تلبسيها بشكل محكم وتخليها الناحية التانية من اتجاه الطريق اللي ماشيه فيه.
7- خلي بالك في حالة إنك سحبتي فلوس من أي ماكينة ATM في الطريق وبعد ما تسحبي الفلوس اتأكدى إنهم في المحفظة الأول وحطيها في الشنطة بعدين البسي الشنطة بشكل محكم.
8- وأنتي في الشارع لو بتشتري حاجة حاولي ماتطلعيش كل الفلوس اللي معاكي بشكل ملحوظ عشان ماتبقيش مطمع للحرامية.
9- خلى بالك من المواصلات العامة زي لما تكوني قاعدة جنبك شباك في عربية أو ميكروباص ممكن الحرامية يمدوا ايدهم من الشباك وينشلوا الموبايل أو الشنطة.
10- وخلي بالك برضه من المترو لإنه وقت فتح أو قفل باب المترو فيه حرامية بيسرقوا الموبايلات أو الشنط ويجروا وبيكون باب المترو اتقفل خلاص فمش هتقدري توصليلهم.
