بعد إصابة بروس ويليس به.. إيه هو مرض الحبسة وأسبابه؟

سمعت عن مرض “الحبسة”؟ لو سمعت عنه فأكيد عرفته بعد خبر اعتزال نجم الأكشن بروس ويليس بعد تشخيص إصابته بمرض الحبسة الكلامية اللي بيعيق قدرة الشخص على الكلام والكتابة واللي أعلن الخبر ده هي مراته “إيما هيمنج” وعائلته في بيان.. طيب إيه هو المرض ده؟

حسب موقع Healthline، مرض الحبسة أو ما يعرف بالـ “Aphasia” هو اضطراب في التواصل بيكون ناتج عن تلف في منطقة بالدماغ أو أكتر من منطقة في الدماغ وده اللي بتسببه الحبسة واللي ليها كذا نوع زي: القراءة والكتابة والتحدث وفهم الكلام والاستماع وده بيختلف حسب الجزء المتضرر في الدماغ ولكن إصابة شخص بالحبسة ده مش معناه وجود اضطراب عقلي أو إن ذكائه بينخفض.

أعراض الحبسة حسب موقع Healthline بتختلف من شخص للتاني حسب مكان حدوث الضرر في الدماغ وشدته.

طيب يعني المٌصاب بالحبسة بيتأثر إزاي؟ التأثير بيحصل في الكلام والاستيعاب والقراءة والكتابة.. بمعنى إيه؟

يعني المصاب ممكن يتكلم بجمل قصيرة ومش مكتملة أو غير مفهومة أو كلمات ملهاش معنى أو يرتب الكلمات بشكل غلط.

وعلى الجانب الآخر، المصاب مش بيفهم كلام الناس.

طيب إيه أسباب الإصابة بمرض الحبسة؟ في أكتر من سبب للموضوع زي: ورم في المخ أو إصابة في الرأس أو سكتة دماغية أو عدوى أو اضطرابات عصبية.

حسب جمعية الحبسة الوطنية، من 25% لـ 40% من المصابين بالمرض بيكون بسبب السكتات الدماغية

طيب مين أكتر شخص معرض للإصابة بمرض الحبسة؟ المرض بيصيب الناس من جميع الأعمار حتى الأطفال، وإن السكتة الدماغية هي السبب الأكبر لمرض الحبسة.

طيب بما إن السكتة الدماغية هي أحد عوامل الإصابة بمرض الحبسة.. إزاي تحمي نفسك منها؟ موقع Healthline بيقولنا على خطوات ممكن تقلل من خطر الإصابة بالسكتة الدماغية زي:

– الإقلاع عن التدخين والكحوليات

– تعمل نظام غذائي فيه نسب منخفضة من الصوديوم والدهون

– اتخاذ خطوات للتحكم في ضغط الدم والكوليسترول 

– لو شخص بيعاني من مرض السكر بيحتاج يتخذ خطوات للتعامل معه 

– لو في أي وقت ظهر على الشخص أعراض السكتة الدماغية لازم يحصل على الرعاية الطبية بأسرع وقت.

لو تعرف حد مصاب بمرض الحبسة.. إزاي تتعامل معاه؟

تقلل أي دوشة حواليه، تستخدم كلمات بسيطة وأنت بتتكلم معاهم، تديهم وقت يخلصوا كلامهم وماتكملش أنت الكلمات، تستخدم الإشارات أو الملاحظات المكتوبة هيكون أفضل في التواصل مع المرضى.

وبنتمنى الشفاء لكل المصابين بأي مرض في العالم كله.