موضوع مايهمكش: إزاي تعمل تمارين الامتنان؟ وهل فعلا بتحسن جودة النوم؟

يوم 21 سبتمبر هو يوم الامتنان العالمي World Gratitude Day، وبالمناسبة دي خلينا نعرف أكتر عن الامتنان ومعناه، وإزاي تعمله في يومك، وهل فعلا بيساعد على تحسين النوم؟

خلينا نعرف الأول.. إيه هو الامتنان؟

حسب موقع Silent Night، الامتنان يعتبر عاطفة إيجابية مرتبطة بمشاعر الشكر والتقدير. بعض الناس بيشوفوا إن الامتنان بيبقى تأكيد إيجابي إن الحاجات الكويسة والحلوة هتحصلنا وموجودة حوالينا، وإنك تبقى عارف الحاجات دي وبتعترف بيها وبتفكر نفسك بيها ده يعتبر شكل من أشكال الامتنان. الامتنان برضه بيشجعنا على تقدير الحاجات الصغيرة الحلوة اللي في حياتنا، واللي ممكن ننساها أو مناخدش بالنا منها أصلا في دوشة وزحمة حياتنا اليومية.

موقع Better Sleep بيقول إن فيه فوايد جسدية وعاطفية كتير بتحصل للإنسان لما بيعبر عن امتنانه، وإن حاجة بسيطة زي الامتنان آخر اليوم ممكن يساعد في تحسين الصحة العقلية للشخص.

في دراسة اتعملت سنة 2003 وضحت إزاي الامتنان بيساعد على تحسين المزاج والرفاهية العامة. ودراسة تانية اتعملت في 2022 وضحت إزاي ممارسة الامتنان بيساعد على تقليل أعراض الاكتئاب والقلق.

ودراسة غيرهم اتعملت في 2018 قالت إن الشخص لو عنده توقعات متفائلة في الحياة ده هيساعده في تحسين مختلف مجالات حياته. ولو التفاؤل مش سهل بالنسبالك، فممارسة الامتنان نفسه بيساعدك في زيادة الإيجابية والتفاؤل عندك.

والامتنان بيعمل حاجات أكتر بكتير من بس رفع المعنويات والإيجابية، العلماء بيقولوا إنه بيخلق حالة من الهدوء وبيساعد الشخص على النوم أحسن، والعلماء اللي درسوا تأثير الامتنان على النوم لقوا نتايج كتير مفيدة.

في دراسة اتعملت على أكتر من 400 شخص، منهم 40% عندهم اضطرابات نوم، ولقوا إن جودة النوم اتحسن بشكل كبير بسبب الامتنان، ولما كانوا بيفكروا في الحاجات اللي ممتنين ليها قبل النوم ده كان بيخليهم يروحوا في النوم بشكل أسرع ولفترة أطول.

دراسة تانية اتعملت على مجموعة من الستات بيكتبوا الحاجات اللي ممتنين ليها، ولقوا إن المجموعة اللي كانت بتمارس تمرين الامتنان كان عندهم معدلات تفاؤل ورفاهية أعلى، وجودة نوم أحسن من الباقيين.

طب إيه تمارين الامتنان اللي ممكن تعملها بشكل بسيط وسهل؟

موقع Better Sleep نشر مجموعة من التمارين السهلة: 

1- وأنت نايم على السرير قبل النوم، حاول تركز على حاجة واحدة بس أنت ممتنلها في حياتك دلوقتي.. فكر في تفاصيل الحاجة دي وليه أنت ممتنلها.. وافضل مركز على الحاجة دي وتفاصيلها.

2- قبل النوم اسأل نفسك إيه الحاجات اللي أنت ممتنلها النهاردة في يومك؟ حاجات حصلت حتى لو بسيطة أو صغيرة.. فكر في كل حاجة من الحاجات دي ويومك كان هيبقى إزاي من غيرهم.

3- خلي جنبك نوتة أو كراسة جنب السرير وقبل ما تنام بـ 10 دقايق اكتب كل الحاجات اللي أنت ممتنلها النهاردة في يومك.. أو الحاجات اللي أنت ممتنلها في المطلق، وحاول تخلي دي آخر حاجة تعملها وتفكر فيها قبل ما تنام.