إيه هي أشهر الأكلات الفلسطينية؟

عشان نكمل اللي عرفناه قبل كده عن فلسطين زي المدن، الشال، الزي التقليدي والتراث الفلسطيني حبينا نعرفكم على الأكلات الفلسطينية..

كل أكلة بتعكس ثقافة وعادات البلد بتاعتها، بيتشابه الأكل الفلسطيني مع البلاد المجاورة ليها زي لبنان والأردن وسوريا.. قبل الحرب سنة 1948 كانت فلسطين بتعتمد إعتماد كلي على أرضها في مكونات الأكل وتقريباً مش بتجيب حاجة من برا وده نظراً لموقعها المميز وبيئتها والطقس بتاعها، زي ما الأغاني والأعمال الفنية بتتورث كمان طريقة عمل الأكل بتتورث من جيل لجيل وبتبقى مميزة لما الجيل الجديد يتأثر بثقافة تانية ويحط التاتش بتاعه.

أشهر الأكلات المرتبطة بالمدن في فلسطين:
1- مدينة نابلس: والتي تشتهر بـ “الكنافة والمدلوقة”
2- مدينة القدس: تشتهر بـ  “المطبق أو المطبق الحلو” ودي كيكة بالسمسم طعمها حلو، لأن في نوع تاني منها سعودي بيكون محشي لحمة مفرومة

3- مدينة طولكرم: من أشهر أكلاتها “المسخن أو المحمر” وده عبارة عن فراخ مشوية وهنشرحه دلوقتي
4- مدينة الخليل: تشتهر بـ “الملبن” وده بيبقي من عصير العنب المجفف والدبس
5- مدينة يافا: تشتهر بـ “المفتول، الفطير والفول”
6- مدينة رام الله: تشتهر بـ “القطين” اللي هو التين المجفف

بعد ما عرفنا أشهر أكلات المدن، تعالوا نعرف مع بعض أشهر الأكلات الشعبية:
أشهر حاجه في الأكلات الفلسطينية ان كلها بتبدأ بحرف الميم “م” وبصراحه منعرفش إيه السر، خلونا نشوف أشهر الأطباق ومحتواها بيكون إيه:-

1- مقلوبة: أكلة مشهورة في أغلب بلاد الشام ولكن فلطسين أشهرهم في عمايل الأكلة دي، بيقولوا في البداية كان مشهور بيها الناس اللي بتعيش على الشواطئ وبتصطاد “الصيادية” وكان اسمها “مقلوبة السمك” بس لما باقي الشعب اكتشفها وبدأ يعملها باللحمة والفراخ والبتنجان وغيرهم بقى اسمها “المقلوبة” بس.. وسر تسميتها بالاسم ده انهم بيحطوا المكونات من اللحوم تحت الرز في الحلة بعدين يقلبوها في الطبق بعد ما تستوي

2- مفتول: عامل زي العدس عندنا كده ومشهور عندهم في الشتا، عندهم حاجة اسمها سميد وده قمح مجروش أو برغل بيكونوا على شكل كرات صغيرة وبيطبخ بطناجر خاصة (حلل يعني) على بخار شوربة خضار باللحمة.. بيكونوا حلتين فوق بعض واحده فيها الشوربة تحت واللي فوقها الجزء اللي تحت بتاعها شبه المصفة عشان البخار يعدي منها

3- مسخن: عندهم حاجه اسمها خبز الطابون أو التنور وده زي العيش البلدي عندنا بتاع الفرن عادي، الأكلة عبارة عن قطع عيش كده زي الفتة عندنا فيها مرقة ومحطوط فوقها فراخ وبصل وسماق (نبات بيتعمل منه حاجة زي الكمون والفلفل كده) 

4- ورق العنب: واسمحولنا نقول وجبة عادي من غير حرف الميم، اسمه عندهم في فلسطين “ورق الدوالي” زي عندنا في مصر بيحبوا ورق العنب طول السنة فا بيخزنوه عشان ياكلوا منه حتى لو مش الموسم بتاعه، بيتحشي رز ولحمة مفرومة وساعات بيبدلوا اللحمة كالعادة بحاجات تانية وبيحبوا كمان يسيبوا شوية شوربة كده ما تنشفش عشان تدي طعم جامد للمحشي

5- منسف: نرجع لحرف الميم تاني عادي، فلسطين والأردن اخوات في أغلب الأكلات منهم المنسف.. بيتعمل في المناسبات والأعياد عشان يتقدم للضيوف مش بس كده ده له تقاليد في طريقة الأكل وهي ان اللي قاعدين بيحطوا إيدهم الشمال ورا ضهرهم وبياكلوا بالإيد اليمين بس من غير معلقة حتى

6- مجدرة: أقرب أكلة للكشري المصري عشان المكون الأساسي فيها هو البصل وكمان فيها عدس كمان برغل (قمح مسلوق) وزيت زيتون