7 حاجات لازم تعرفها قبل ماتروح لثيرابيست

في بداية كل سنة بنقرر أننا عايزين نغير حاجات في شخصيتنا ونصلح المشاكل اللي عندنا خاصة النفسية بس للأسف بنقف في النص مش عارفين ناخد الخطوة إزاي ومش عارفين ممكن نعمل إيه لو عايزين نروح لمعالج نفسي وإزاي نعرف إنه دكتور بجد ومش هيضحك علينا بسبب التراست أيشوز اللي عندنا عشان كده في الموضوع ده هنقولك تعمل إيه عشان تاخد الخطوة وفقا لموقع everydayhealth و self

1-الفرق بين الطبيب النفسي والمعالج النفسي؟

لازم تعرف إن في فرق بين الـ psychiatrist و psychologist
الـ psychiatrist:
هو الشخص اللي درس في كلية الطب وحصل على شهادة ال (MD) وكمل تخصصه في الطب النفسي وبيقدر يشخص ويعالج الأمراض النفسية والعقلية ويقدر يوصفلها كمان أدوية.
الـ psychologist:
المعالج النفسي هو الشخص اللي درس في كلية الدراسات العليا وحصل على الدكتوراه واتدرب برضو على تشخيص وعلاج الأمراض العقلية لكن في أغلب الأوقات ما يقدرش يوصف أدوية للمرضى

2- دور كويس على الدكتور المناسب ليك

خذ وقتك في إنك تدور على دكتور مناسب ليك من كل الزوايا سواء في إنه يكون شاطر وناس كتير جربته أو مكانه يكون قريب ليك أو حتى يكون سعره مناسب للبادجت بتاعتك علشان تضمن إنك هتستمر تروحله وماتكسلش.. وأهم حاجة تعرف هو متخصص في إيه وهل تخصصه مناسب لحالتك ولا لا.

3-العلاج النفسي بيحتاج طول نفس

لازم تكون عارف إن الدكتور اللي هتروحله مش ساحر هيعالجك من أول مرة ويحل كل مشاكلك ..العلاج النفسي بياخد وقت وبيحتاج إن الدكتور يعرف معلومات كتير عنك علشان يقدر يساعدك بس برضو لازم تكون عارف إنك لو فضلت حاسس إنك مش مرتاح بعد كذا جلسة جايز يكون الثيرابيست مش مناسب ليك وفي ناس بتجرب كذا معالج لحد ما تلاقي اللي ترتاح معاه وده طبيعي جدا.

4-ماتتكسفش تسأل المعالج عن أي حاجة

لازم تسأله أول بأول إيه هى خطة العلاج اللي هتبدأوها وإزاي تعرف بعدين في تقدم في حالتك ولا لا ولو مش شايف تغيير اعرف منه هل ده شيء هو كمان شايفه لأن أحيانا مابنشوفش التغييرات إلا لما حد تاني يخلينا ناخد بالنا منها.

5-لازم تعرف إنك هتمر ب ups and downs

مش دايما هتكون مبسوط وأنت رايح للثيرابيست أحيانا هتكون متحمس ومبسوط وأحيانا هتكون خايف وقلقان ومش عايز تروحله
لأن التغيير صعب خاصة في حاجات في سلوكنا وشخصيتنا بقالها سنين مش دايما الإنسان بيقدر يتقبل ده خاصة لما بنشوف ماضينا قدام عينينا وبنبتدي نفهم سبب انفعالتنا.

6-هتكلم مع الثيرابيست في إيه؟

دايما بنبقى قلقانين إننا نروح لثيرابيست علشان بنبقى حاسين أن مفيش حاجة نقولها أو مش هنعرف نتكلم ونحكي معاه لكن لازم نبقى عارفين إنهم بيقدروا يعملوا ده من غير ما الموضوع يبقى غير مريح و يخرجوا الكلام منك من غير ماتحس بإرهاق

7-قول اللي حاسس بيه دايما

الثيرابيست لازم يكون مساحة آمنة ليك علشان تقدر تتكلم وتكون أحسن فلو  قال حاجة أنت مش موافق عليها أو حاسس إنها مش مريحة ليك أو حتى قال حاجة مافهمتهاش لازم تتكلم معاه وتسأله علشان يقدر يساعدك ويفهمك

في الآخر لازم تفكر نفسك إن “Change is scary,But so is staying the same” صحيح هنبقى خايفين دايما نتغير ونعمل حاجة مختلفة بس لو فضلنا واقفين مكاننا ومابنتعلمش من أخطائنا وطورنا شخصيتنا ده مخيف أكتر بكتير..