ليه مش بنشبع نوم في الشتا وكسلانين على طول؟
طبعا الشتاء داخل بتقله.. وبرودة الجو زيادة شويتين اليومين دول.. وخلاص مود الكسل والنوم اشتغل.. ودايمًا مهما نمنا بنكون عايزين ننام تاني.. وحركتنا بتقل وبتكون مقتصرة على تلبية نداء الطبيعة بس
طيب يا ترى إيه السبب بقى؟ في المقال ده هنحاول نوضح لكم الأسباب العلمية وتركات بسيطة نقضي بيها على كسل الشتا ونشوف اللي ورانا ياكش نحقق أحلامنا
ليه على طول كسلانين وعندنا خمول في الشتاء؟
- تقليل التعرض لأشعة الشمس: بما إن النهار بيقصر خلال أشهر الشتاء، فبالتالي بيقل التعرض لأشعة الشمس وده بيأثر على إيقاع الساعة البيولوجية عندك .. فبيخلي جسمك ينتج هرمون الميلاتونين أكتر وأكتر (هرمون النوم) فـ هتلاقي نفسك حاسس بالخمول والكسل معظم الوقت
- نقص فيتامين د: أشعة الشمس تعتبر مصدر رئيسي لفيتامين د … فـ 10 دقائق كفيلة لإنتاج ما يكفي من فيتامين د طول اليوم.. لكن في الأجواء الشتوية بيكون ده صعب… وبما إن فيتامين د مسؤول عن الحالة المزاجية ومستوى الطاقة ووظيفة المناعة.. فـ هتلاقيهم مش قد كده يعني
- اضطرابات المزاج: بيعاني أشخاص كتير من الحزن والاكتئاب والقلق خلال فصل الشتاء.. وده بيرجع لاضطراب نفسي اسمه “الاضطراب العاطفي الموسمي (SAD)” وطبعا كلنا عارفين كويس أعراض الاكتئاب اللي بتدور حوالين (إرهاق-إنعدام شغف-أكل-نوم)
طب نعمل إيه عشان نهرب من الكسل والخمول ده؟
– لو انت في البيت افتح الستائر .. أو لما تنزل حاول تستغل أشعة الشمس المفيدة وتغذي جسمك بيها.. ببساطة اتعرض للشمس
– تناول الكافيين اللي يناسبك… لأنه هيساعدك تفوق وتركز أكتر وتقدر تتعامل ف يومك
– خصص وقت للتمرين الصبح لأنه هيحسسك بأن جسمك فايق وهيساعدك في مكافحة التعب أو الخمول
– الحصول على وقت كافي من النوم مهم جدا لتجنب التعب أثناء النهار. والوقت الكافي بيكون ما بين 7-9 ساعات.. مع ظبط ساعة محددة للنوم والصحيان حتى في الأجازات الأسبوعية.. وعشان تعمل كده اقفل موبايل أو التليفزيون أو لاب توب أو أي جهاز .. هتلاقي نفسك نمت فورا زي الصورة كده
