اعرف مين هو الشخص غير المتاح عاطفيا؟

الفترة الأخيرة العلاقات حواراتها كترت وبقينا نسمع مصطلحات كتير تخص العلاقات بالإنجلش ومن ضمن المصطلحات دي مصطلح emotionally unavailable عشان كده هنقولك في الموضوع ده مين هو الشخص غير المتاح عاطفيا وفقا لموقع healthline و موقع everydayhealth

الدكتور النفسي “تشارلين روان” بيقول إن الشخص غير المتوفر عاطفيا هو اللي مابيقدرش يتواصل بشكل مستمر مع شخص تاني في محادثة عميقة ومابيقدرش يظهر التقبل لشخص بيظهر مشاعره ولا يقدر يكون صادق في مشاعره وأفكاره وأفعاله ونواياه..
وده ممكن يكون بسبب مشكلة مرتبطة بطفولته مع أهله لكن ده بيختلف من شخص للتاني حسب حالته والظروف اللي مر بيها..

وفي النقاط الجاية هنقولك علامات تعرف بيها إن شريكك شخص غير متاح عاطفيا:

– بيتجنبوا المواضيع العميقة:

بيبعدوا عن المواضيع العاطفية أو المواضيع العميقة عشان بيتجنبوا يظهروا مشاعرهم وبيحاولوا يغيروا الموضوع معاك..

– مابيحبوش يشاركوا حاجة عن نفسهم:

بيحاولوا دايما مايتكلموش عن أي حاجة شخصية وبيخفوا أي حاجة حتى لو ماتستحقش يخوفوها..

– مابيحبوش يعملوا خطط:

غالبا الشخص الغير متاح عاطفيا بيكون مابيحبش يلتزم بحاجة حتى لو كانت بسيطة ولو اقترحت عليهم حاجة بيقولولك هنشوف وفي الغالب مابيكونش عندهم رد حاسم

– أنت بتكون مسؤول عن كل حاجة في العلاقة:

بتكون بتبادر بكل حاجة ودايما مستني رد وهما مش عايزين يكون عندهم إلتزامات تجاه العلاقة ولو أنت مابادرتش الحاجات مش هتيجي منهم لوحدها

– مابيحبوش يحطوا مسمى للعلاقة:

دايما بيتجنبوا يستخدموا كلمة علاقة رسمية في وصف علاقتكوا وطول ماهما مش حاطين مسمى بيكونوا مرتاحين لحد ما تسأل عن علاقتكوا ويبدأوا يهربوا من الرد على السؤال

-دايما بيجوا متأخرين أو مابيجوش خالص:

بتلاقيهم دايما أخر ناس بتكون جنبك أو بيبوظوا الخطط اللي عملتوها عشان يحافظوا دايما على إنك تكون بعيد عنهم وفي بينكوا مسافة لإنهم مش مستعدين يدوا أولوية ليك و احتياجاتك في حياتهم الخاصة