في يوم الكرنب..اعرف ليه الكرنب بيحتوينا في الشتاء؟

دايما في فصل الشتاء بنلاقي ست الكل لازم تعملنا حلة محشي كبيرة عشان يدفينا ويحتوينا بس في ناس كتير بتظلمه وبتعامله بعنصرية وبتفضّل عليه ورق العنب والبتنجان رغم إنه عمره ما اشتكى.. عشان كده في الموضوع ده هنقولك فوائد الكرنب عشان تغير فكرتك عنه وتستخدمه في وجباتك وفقا لموقع altibbi و elconsolto

1- الكرنب بيحتوي على نسبة عالية من الكربوهيدرات وهي اللي بتساعد الجسم على الشعور بالدفا وكمان بتمده بالطاقة والحيوية يعني ماما طلع عندها حق!

2-غني بفيتامين c اللي بيحمي الجهاز المناعي ويقويه وكمان يعتبر من أهم مضادات الأكسدة اللي بتحمي خلايا الجسم من الأمراض

3-بيساعد في تحسين الهضم لأنه بيحتوي على الألياف بس كتره بيعمل نتيجة عكسية وبيسبب انتفاخ أنت مش قده

4-بيحتوي الكرنب على مضادات الأكسدة والالتهابات زي الكامبيفرول والسلفورافان وليلة كبيرة أوي

5-بيساعد كمان في خفض مستويات الكوليسترول في الدم وضغط الدم المرتفع بسبب احتوائه على  البوتاسيوم

6-الكرنب من الخضار الورقي الغني بالمياه عشان كده هيحميك كمان من الجفاف وخاصة جفاف البشرة

عشان كده حاول تضيف الكرنب للسلطة أو لوجباتك المختلفة حتى لو مابتحبوش عشان هيفيدك تحسن صحتك