مشاكل في باريس بتأثر على الأولمبياد والرياضيين فيها

الفترة دي معظمنا بيتابع أولمبياد باريس وأحداثها بشكل يومي تقريبًا حتى لو بيشوف ملخصات أو أخبار ومش بيتابع بشكل حصري الألعاب والرياضات اللي موجودة.. بس في شوية مشاكل وحوارات كده موجودة في الأولمبياد دي بتأثر على تنظيم الألعاب وكمان الرياضين اللي مشاركين فيها.. فتعالوا ناخد جولة كده في المشاكل دي

حسب صحيفة The Independent وصحيفة Daily Mail

مشاكل الفئران:

أول مشكلة موجودة هي انتشار الفئران الكبيرة بشكل مخيف زي انتشار القطط في الشوارع كده بالظبط مع الاختلاف طبعًا المشاكل والحوارات اللي بتتببسها الفئران.. وحرفيًا الفئران المنتشرة زي القطط في حجمها كمان ودي مشكلة تانية إن التهديدات بتزيد والمشاكل اللي بتعملها بتزيد.. خصوصًا بعد الأمطار الغزيرة اللي حصلت في اليومين اللي فاتوا وده خلاهم يخرجوا من جحورهم وينتشروا بشكل أكبر في كل المدينة 

والتأثير ظهر بشكل كبير لما كشفت صحفة “ديلي ستار” البريطانية إن صحفي من عندهم كان قاعد بياكل وهجم عليه فئران ومش بس في الشارع ده كمان في المطاعم والأماكن اللي بيخرجوا فيها.. بعدها وضحت الصحيفة إن المختصين بيقولوا في مخاطر طبية كبيرة بتسببها فضلات الفئران وبتعمل مشاكل صحية كتير جدًا.

تلوث نهر السين:

ومن مشاكل الفئران لمشاكل تلوث نهر السين.. بعد صرف تقريبا حوالي 1.5 مليار يورو عشان كمحاولة عشان ينضفوه ويكون مؤهل للتدريبات والسباقات الخاصة بالأولمبياد إلا إن السباقات الخاصة بالترايثلون للرجال اتأجلت عن معادها وده بعد ماخلص سباق السيدات وقبلها يوم الحد والاتنين المنظمين لغوا التمارين المخصصة للسباحة بسبب التلوث الكبير اللي موجود.. وبيحصل اختبار كل يوم للمياه عشان يتأكدوا إنها صالحة للألعاب أو التمارين اللي هتتعمل فيها وفي قلق وتوتر إن ممكن يحصل تأجيل في أي وقت.

الأكل والمواصلات:

نروح للأكل اللي اشتكى منه عدد من البعثات اللي راحت سواء عشان جودته قليلة أو الكمية قليلة ومش مكفية وده اللي خلى الرئيس التنفيذي للجنة المنظمة للأولمبياد يعلق في مؤتمر صحفي ويقول “بخصوص الأكل كان لازم نعمل شوية تعديلات وإن ده أمر طبيعي في استضافة الأحداث الكبيرة اللي زي دي”.. كمان مشكلة تانية وهي النقل واللي حسب Voanews اشتكى السباحين الكوريين من المشاكل في النقل وإن ده بيأثر عليهم في المنافسات وقال اتحاد السباحة الكوري إنهم عملوا بعد كده خطط احتياطية عشان حوار الأتوبيسات أو الحاجات اللي بتنقل اللاعيبة عشان مايعملهمش مشاكل تاني 

والوفد الأسترالي خدها من قاصرها وعمل حسابه في الأكل والشرب لدرجة إنهم خدوا سمك تونة كتير وفطاير لحمة وقطع مويسلي “شبه الشوفان” وخبراء عشان يعملولهم قهوة للبعثة كلها

في الأخر المشاكل كتير موجودة في باريس ومش زي ما البعض متخيل إنها مدينة بيرفكت وكل حاجة فيها مظبوطة.. بالعكس هي بتواجه مشاكل ومشاكل كتير سواء سواء بتخص الأولمبياد أو اللاعبين أو حتى البلد نفسها بوجود حاجة زي الفئران اللي كسر خيالات الناس ووضحلهم حقيقة العاصمة الفرنسية اللي كانوا فاكرينها خيالية ومثالية.