إيه هو الحزام المداري السبب في سقوط أمطار في مصر في الصيف!
بقالنا حوالي أسبوع بنشوف ظاهرة أغلبنا مستغربها في جنوب مصر وهي إن فيه أمطار متفاوتة الشدة وأمطار رعدية على جنوب الصعيد وسلاسل جبال البحر الأحمر.. وأغلب الناس مستغربة أو فاكرة إن ده بيحصل بسبب الاحتباس الحراري عشان فيه أمطار بالشكل ده في عز الصيف في شهر 7 و 8 في مصر.
لكن الهيئة العامة للأرصاد المصرية قالت في بيان ليها إن ده شئ طبيعي وبيحصل وشرحت كمان تفاصيل الموضوع وهو إن فيه حاجة اسمها الحزام المداري بيحصل في الوقت ده لكن مابيحصلش كل سنة وبيحصل سنة بعد سنة
طاب إيه هو الحزام المداري ده؟
هو عبارة عن خط وهمي بيفصل بين الكتل الهوائية الشمالية الجافة والكتل الجنوبية الرطبة
وبيكون عند خط الاستواء ويتذبذب شمالا وجنوبا مع حركة الشمس الظاهرية باختلاف الفصول.. وبسبب تلاقي كتل الهواء دي السحب الرعدية بتكتر وده بيسبب سقوط الأمطار الشديدة وأحيانًا بتوصل لسيول في أماكن زي السودان وإثيوبيا ومنابع النيل.
واللي بيحصل إن الفاصل المداري بيتذبذب وبيطلع لحد الشمال لحد ما بيوصل لجنوب مصر واللي بتكون عرضه أكتر لسقوط الأمطار بس بتبقى متفاوتة الشدة وأقل من اللي بتحصل في دول منابع النيل في الفترة دي.. وباقي مصر مابتتأثرش بالأمطار دي عشان الظاهرة بتكون في الجنوب بس.
وقالت عضو المركز الإعلامي بالهيئة العامة للأرصاد الجوية دكتورة منار غانم في مداخلة هاتفية على فضائية القاهرة الاخبارية إن فرص تساقط أمطار من خفيفة لرعدية مستمرة على مناطق حلايب وشلاتين ومرسى علم والوادي الجديد و أبو سمبل وأسوان والأقصر من يوم 7 أغسطس الأربعاء لحد يوم الأحد 11 أغسطس وده بسبب ارتفاع الحزام المداري المسبب للأمطار الموسمية على منابع النيل.
