كمية العناصر الغذائية اللي الجسم محتاجها يوميًا

لكل الناس اللي بتهتم بصحتها وحابين يعملوا نظام غذائي محترم كده لليوم بتاعهم عشان يحافظوا على جسمهم وعلى صحتهم تفضل حلوة.. حبينا نجمعلكم نسبة العناصر الغذائية اللي جسم محتاجها وإيه الأكلات اللي ممكن تظبطها ليومك والبدايل بتاعتها وتظبطها على حسب اللي متوفر عندك.

حسب منظمة الصحة العالمية وموقع Healthline

العناصر الغذائية والنسب الصح:

1- البروتينات:

بالنسبة للبروتين يفضل إنه يكون بيمثل 10-30% من السعرات الحرارية في يومك.. وزي ما كلنا عارفين البروتينات زي “اللحوم.. الأسماك.. البيض.. منتجات الألبان” ولو الدنيا صعبة شوية إنك تعمل ده وقت طويل ممكن تروح للبدايل زي “البقوليات والمكسرات” 

2- الكربوهيدرات:

بالنسبة للكارب كده كده حياتنا مليانة كرب وغم وده ياريت نقلل منه.. أما بالنسبة للكارب والتغذية بقى يفضل إنها تمثل نسبة 45-65% من السعرات الحراية لليوم.. وعندنا منها “النشويات والألياف والسكريات” ودول الأمثلة عليهم “الرز.. المكرونة.. الخضار.. العيش والخضار والفاكهة” 

3- الدهون

نخش في الدهون ودي نوعين “مشبعة وغير مشبعة” 

المشبعة الأكل الحيواني زي اللحوم الحمراء والزبدة والمخبوزات وحسب منظمة الصحة النسبة المقترحة تكون أقل من 30% 

الغير مشبعة ودي زي الأسماك الدهنية وبعض الزيوت النباتية وكمان المكسرات والبذور 

4- الفيتامينات:

ودي مسهلة الدنيا شوية وموجودة في كل أنواع الأكل زي الفاكهة والخضار والمنتجات الحيوانية والحبوب وعشان في كل الأكل فلو عملت نظام غذائي كويس.. لو يعني ساعتها هيضمنلك توصل لفيتامينات

5- المعادن:

ودول كتشييييير أوي زي الكالسيوم – الفوسفور – البوتاسيوم- الصوديوم – المغنيسيوم – الحديد – الزنك – اليود – الكروم – النحاس وغيرهم من المعادن

ومصادر المعادن في الأغذية كتير وكل معدن له حاجة مخصصة بتخليك توصل للمعدن ده.. زي منتجات الألبان والقرنبيط والخبز والخضروات والفاكهة وليلة كبيرة أوي سعادتك

6- المياه:

من أهم العناصر الغذائية اللي لازم تكون موجودة في يومك والنسبة المناسبة للبالغين هي 3.7 لتر من السوائل للرجالة و 2.7 لتر للستات

توصيات الصحة العالمية:

وزارة الصحة العالمية عاملة نظامين واحد للبالغين والتاني للأطفال فتعالوا ناخد فيهم جولة سريعة كده..

البالغين

النظام لازم يشمل فاكهة وخضروات على الأقل 400 جرام من الفاكهة والخضار يوميًا.. يعني حاول تحب البسلة والفاصوليا شوية عشان قيمتهم مهمة

أقل من 10% من السكريات الحرة وده تقريبًا حوالي 50 جرام للشخص اللي جسمه صحي وبياكل 2000 سعر حراري في اليوم.. لكن لعشاق المثالية والحاجات الصحية أوي يفضل يكون السكر أقل من 5% 

أقل من 30% من الطاقة يكون دهون وشرحناهم وشرحنا أنواعهم فوق.. يفضل الغير مشبعة تكون أقل من 10% 

أقل من 5 جرام ملح يوميًا ويفضل يكون ملح معالج باليود.

الأطفال

ضروري الطفل يرضع رضاعة طبيعية خالصة يعني صافية لأول 6 شهور من عُمره

ضروري الطفل يرضع رضاعة طبيعية مستمرة لحد عُمر سنتين 

يعني من 6 شهور تقدر تضيف على حليب الأم أطعمة كافية وآمنة ومغذية بس ضروري مايكونش فيه ملح ولا سكر خالص

في النهاية كلنا عارفين إننا لازم نظبط أكلنا عشان نفضل محافظين على صحتنا وعايشين كويسين.. ولو كده يفضل إنك تتابع مع حد متخصص في التغذية لو عندك مشكلة أو حاسس إنك محتاج تخس أو تزود وزن بشكل معين.