ليه الـ Bad losers ممكن يخسروا تاني بعد الخسارة؟!
كتب: عمر عزت
أغلبنا عارف قد إيه “بيب جوارديولا” مدرب مانشستر سيتي عبقري وعمل تاريخ كروي كبير كمدرب سواء في الدوري الأسباني أو الألماني أو الإنجليزي.. بطولات كتير مع الأندية وجوائز فردية ويعتبر عمل كل حاجة كمدرب لكن الفترة الآخيرة لحد النهاردة ماكسبش غير ماتش واحد من آخر 11 ماتش مع فرقته وخلال الماتشات دي بعض تصرفاته وبعض تصريحاته بتبين قد إيه هو Bad loser.. فتعالوا نعرف أكتر عن الـ Bad losers
حسب مواقع psychologytoday و medium
الـ Bad loser هو شخص بيواجه صعوبة في إنه يتقبل الخسارة بروح رياضية أو يتعامل معاها بنضج.. بمعنى إنه بيتعامل معاها بشكل سلبي سواء بالتبرير أو بسلوك سلبي أو لوم لناس تانية أو حتى بالتقليل من الطرف الآخر للسباق
ومن صفات الشخص الـ Bad loser هي “رفض الواقع”.. يعني مش هيكون معترف إن الطرف التاني يستحق المكسب وهيبدأ يدور على مبررات وأعذار للخسارة
كمان “لوم الظروف” هتلاقيه بيلوم كل العوامل الخارجية زي الحظ والظروف ولو فيه تيم أو حد مشارك معاه ممكن يلومه.. لكن الوحيد اللي مش هيلومه هو نفسه
وعندك “رد فعل مش ناضج” وهنا بقى هتشوف غضب وعصبية أو حتى سخرية من السباق والمنافس وكلها تعاملات سلبية
وأخيرًا “الـ Ego” وده لأن الشخص الـ Bad loser بيفتكر إن الخسارة هتقلل منه ومن قيمته الشخصية أو المهنية
طب ليه الشخص بيبقى Bad loser؟ أول حاجة هتلاقي “السعي للكمال” دايما هيبقى بيحاول يعمل كل حاجة بشكل كامل فده هيخليه مش قادر يتقبل الغلطات نهائي
تاني حاجة “الأنا العليا – Super ego” مابيعرفش أو بيخاف يعترف في وقت ما إن كفاءته قليلة في لحظة معينة
وتالت حاجة “الضغط الاجتماعي” وهنا بيبقى قلقان من حكم الناس عليه بعد الخسارة
رابع حاجة والأخيرة “التربية” ولأن الشخص متربي على المنافسة والفوز دايمًا لأن الخسارة بتكون عار أو ضعف أو أيًا كان الصفة السلبية.. فهو بيخاف يتوصف بيها لأنه اتعود من صغره على حاجة معينة
بعد ما عرفنا مين الـ Bad loser وصفاته والأسباب اللي تخليه كده ممكن نسأل سؤال.. هو كل الـ Bad losers عباقرة؟ أو جامدين يعني؟ وده إجابته أكيد هتكون “لأ” وده معناه إن عندنا:
1- Bad loser عبقري
وده بيقع في الفخ عشان بيعمل استثمار كبير ومجهود ضخم في النجاح واللي بيخليهم يحطوا طاقة عاطفية مهولة في مشروعة أو الحاجة اللي داخل عليها فلما تحصل خسارة أو مايحققش أعلى سكور هيحس إن كل اللي عمله مالوش قيمة
مع ميكس “غطرسة” أو عنجهية كده وهنا بيبقى حاسس بقى إنه عارف أكتر من أي حد وبالتالي لو حد تاني كسبه مش هيستوعب إن فيه حد تاني كان أحسن منه!
بإضافة تاتش “مثالية زايدة” واللي بيخلي أي سكور أو نتيجة أقل من الكمال بالنسبالة كارثة
2- مش كل Bad loset عبقري.. في Bad loser عادي يعني
وده بيبقى غضبه سطحي ومرتبط أكتر بالهزيمة.. فهتلاقيه “أناني” بمعنى إنه مابيحبش يشوف حد تاني بيكسب حتى لو هو شخصيًا مايستحقش المكسب
“الإحراج” وهنا بيتعامل مع الخسارة كتهديد لكرامته أو مكانته الاجتماعية
وتالت حاجة “التربية” ودي عامل مشترك بين العبقري والشخص العادي لكن الفرق إن العبقري غالبًا كسب كتير فبيكون أصعب ولكن الشخص العادي مش دايمًا بيكسب وبيكون الموضوع أقل صعوبة شوية ولكن النتيجة واحدة وهي التعود من صغره إن لازم يكسب في كل حاجة
طب إزاي تتجنب إنك تبقى Bad loser؟
1- تعترف إن الخسارة جزء أساسي من الحياة لأن النجاح حرفيًا مابيجيش إلا بعد فشل ولو جه مرة من غير فشل مش هييجي التانية.. وإنك تتعلم من الخسارة ده أكبر عامل للنجاح المستمر
2- تركز على نفسك بدل الناس التانية.. بدل ماتلوم الناس التانية أو تركز مع فوزهم حاول تركز مع خسارتك وتشوف تقدر تحسّن إيه للمستقبل
3- خلي عندك روح رياضية.. من عوامل الثقة بالنفس هي إنك تكون قوي كفاية وتهني الشخص اللي كسبك وفاز عليك في المنافسة
في النهاية الـ Bad loser مش مجرد واحد بيخسر وخلاص لأ ده كمان بيفشل في إدارة مشاعره وتصرفاته وردود أفعاله بعد الخسارة وده تأثيره السلبي أكبر من الخسارة نفسها.. لكن الشخص القوي فعلًا واللي عقليته ناضجة هو اللي يقدر يقف على رجله تاني بعد الهزيمة أو الخسارة ويكمل حتى بعد أسوأ هزيمة.
