تعمل إيه لو حسيت إن العمر عدى على المخدة في حاجة مالهاش لازمة؟

كتير أوي مننا جرب إحساس إنه يدرك مرة واحدة إنه قضى عمره في حاجة ماكنتش مناسبة له سواء علاقة دخل فيها وفشل بعد سنين كتير أو شغل وماعرفش يحقق نجاح فيه أو صداقة حتى خدت من وقته وعمره كتير وصديقه خذله بعد كده.. وأكيد طبعا التفكير ده ممكن يخلي الشخص يحس بشوية مشاعر زي الخذلان أو خيبة الأمل أو مشاعر سلبية كتير

بس الحاجة اللي نقدر نقولهالك مش كل الخسارة هي خسارة فعلا ساعات بتبقى مكسب ومش كل السنين اللي بتقضيها في طريق أنت ماكنتش متخيل نهايته بالشكل المثالي اللي في خيالك هي سنين ضايعة وإنك أكيد مش لوحدك اللي بتحس.. فبدل ما تقعد تبكي على اللبن المسكوب وتشوف إيه اللي وقع من الكوباية تعالى نبص على نص الكوباية المليان ونعرف إزاي ممكن تعوض اللي شايفه ضاع منك حسب موقع “Psychology Today” و”Mind Tools” و”Verywell Mind” و”Harvard Business Review”:

1- سامح نفسك:

أول حاجة لازم تعملها هي إنك تسامح نفسك.. لوم النفس المستمر ممكن يبقى أهم وأول سبب يخيلك في مكانك وماتعرفش تتقدم.. والمهم إنك تتقبل إنك غلطت وإن الكل بيغلط وإنك مش لوحدك في ده وفيه كتير بيغلطوا بالشكل ده فسامح نفسك على اللي فات وابدأ صفحة جديدة.

2- اقعد مع نفسك وفكر:

التفكير الهادي وإنك تقعد كده مع نفسك مرة تانية وتقييم أهدافك ده بيساعدك عشان تحديد أولوياتك.. واسأل نفسك: إيه اللي كنت عايز تحققه من اللي كنت بتعمله وباظ منك؟ وإيه الفرص اللي تقدر تعوضها أو تستغلها تاني؟ وإيه اللي ممكن تبدأ فيه دلوقتي؟

3- حدد أولوياتك:

ترتيب الأولويات بيخلينا نعرف نشتغل بفاعلية أكتر ونحقق اللي عايزينه.. فعلى قد ما هتبقى حركة كليشية إنك تكتب قائمة بالأهداف المهمة بالنسبالك وتبدأ تنفذها خطوة بخطوة بس هتبقى فعالة عشان هتشوف قدام عينك إيه اللي أنت محتاجة عشان ترجع وتعوض اللي حاسه راح منك.

4- ابدأ بخطوات صغيرة:

مفيش تغيير بيبدأ زي الأفلام والمسلسلات وإنك كنت قاعد زهقان وقولت هتغير أو هغير ده فقومت غيرته.. والخطوات الصغيرة اللي عادة بتعمل التغيير الكبير.. فمثلا عايز تغير شغلك؟ ابدأ ذاكر مجال جديد أو الحاجة اللي عايز تتطور فيها، عايز تهتم بصحتك أكتر وشايف إن مش هينفع بقى اللي بتعمله ده؟ ابدأ رياضة حتى لو نص ساعة في اليوم.

5- ركز على الحاضر:

عشان ماتضيعش وقت أكتر من كده فأنت هتحتاج تاخد “ثرية أبو الفضل” روول موديل في حياتك “قومي يابت فوقي لنفسك وشوفي شغلك”.. كفاية تفكير زيادة في الماضي والمستقبل لا الماضي هيتصلح ولا المستقبل أنت عارف هيحصل فيه إيه.. فالتركيز على اللحظة الحالية وتجنب التفكير المفرط في الماضي أو المستقبل ده بيساعدك تبني حياة أفضل وتستغل وقتك بكفاءة أكتر.

6- قدر التجارب اللي عشتها:

حتى التجارب السلبية بتعلمنا حاجات مفيدة وحتى لو شايف الكلام ده تنمية بشرية وأي كلام بس هو حقيقي.. فخليك ممتن للدروس اللي اتعلمتها من كل موقف مر عليك بس أهم حاجة تبقى عارف إن فيه دروس ماتبقاش عدت عليك كده وماتعلمتش حاجة.

7- افتكر إنك مش لوحدك

وطبعا لو حسيت إنك مش عارف تتعامل مع كمية المشاعر اللي بتدور في دماغك السلبية دي أو الأفكار اللي مابتساعدكش تطلع قدام.. فأنت محتاج تطلب مساعدة سواء من أهلك أو صحابك أو متخصص 

وخليك عارف إن أه عادي ممكن تبقى السنين اللي فاتت راحت عليك فعلا بس السنين اللي جاية هي اللي بتحدد مستقبلك.. فماتفضلش واقف عند نفس مكانك وماتأخرش على نفسك أي خطوة مهما كانت صغيرة هتساعدك أبدا.