موضوع مايهمكش: دليلك لعمل Vision Board “لوحة أهداف” ناجحة بأقل التكاليف
مع كل بداية سنة وعلى مدار شهر يناير.. الـ Vision Board أو لوحة الأهداف بتبقى تريند.. وناس كتير بتفضل تعمل عنها فيديوهات.. وإزاي تعمل Vision Board خطوة بخطوة.. وفايدتها.. وأهميتها.. وتأثيرها على الحالة النفسية.. ووصل دلوقتي إن فيه كورسات مخصوص بيتدفع فيها فلوس عشان تعلم الناس إزاي يعملوا Vision Board.. فلو انت داخل السنة دي بموود “طب ما تجرب يا اخي.. انت خسران حاجة؟ انت عندك حاجة تخسرها؟ انت خسران كل حاجة”.. بنقدملك طريقة عمل الـ Vision Board وهنحاول نخليها بأقل التكاليف.. حسب مواقع مختلفة زي Betterup و Simplify و Oprah Daily
طب في البداية كده.. إيه هي أصلا الـ Vision Board؟
لوحة الأهداف هي وسيلة بصريّة بتحط فيها الأهداف والأحلام اللي نفسك تحققها، مع حاجات تحمسك وتشجعك تحققهم.. وبتكون عبارة عن لوحة أو مساحة بتجمع عليها صور، جمل، ورمزيات بتعبر عن طموحاتك وأحلامك وأهدافك سواء على مستوى الحياة الشخصية أو المهنية.. والهدف الأساسي منها إنك تكون عندك رؤية ملموسة للأهداف اللي نفسك تحققها، فتفضل متحمس ومركز على الخطوات اللي توصلك ليها.
وقبل ما تعمل الـ Vision Board محتاج تفكر بس الأول في كذا حاجة:
فكر في أهدافك:
معظمنا عنده فكرة عامة حتى لو بشكل غامض عن اللي عايزه في الحياة أو اللي بيعتبره هدفه الحقيقي.. ولو معندكش هدف ولسه مش عارف إنت عايز إيه في الحياة.. عادي ماتوترش نفسك.. ممكن تفكر حتى في اللي بيحسسك بالسعادة.. وكلنا عامة محتاجين من وقت للتاني نفكر في أهدافنا وطموحاتنا بشكل واضح ونخطط ليها بخطوات عملية.. وإنك تعمل Vision Board دي من الحاجات اللي ممكن تساعدك تحقق ده.
فكر في الأسئلة الكبيرة والمهمة:
خد شوية وقت وفكر في الأسئلة العامة دي قبل ما تبدأ في الـ Vision Board:
- إمتى الحياة بتبقى “حلوة” من وجهة نظرك؟
- إيه اللي بيخلي لحياتك قيمة ومعنى؟
- لو بتفكر في آخر لحظة في حياتك، إيه أكتر حاجة هتندم إنك محققتهاش؟
قسم الأسئلة الكبيرة:
علشان تسهل على نفسك، حاول تبسط الإجابات على الأسئلة الكبيرة بأسئلة أصغر:
- إيه الأنشطة اللي نفسك تتعلمها؟
- إيه الهوايات اللي بتحبها وعايز تطورها أو تستمر فيها؟
- إيه أهدافك المهنية؟ وإيه الخطوات اللي محتاج تحققها علشان توصل لشغلانة أحلامك؟ (زي شهادة معينة، تدريب معين؟)
- إيه أهدافك في العلاقات؟ مش اللي هو “عايز تتجوز أو تخلف”، محتاج تفكر في صفات شريك حياتك اللي بتحلم بيها وإزاي هتحب تقضي وقتك معاه؟
- نفسك الناس تفتكرك إزاي؟
اختار موضوع اللوحة:
بعد ما تجاوب على الأسئلة اللي فاتت دي.. قرر هتركز في الـ Vision Board على إيه تحديدًا.. مش شرط تعمل لوحة واحدة فيها كل حاجة.. ممكن تعمل أكتر من لوحة منفصلة، كل واحدة لمجال معين من حياتك.. ده لو عندك طاقة يعني.. أما لو الطاقة يدوبك خليها لوحة واحدة وخلاص.
قرر شكل اللوحة:
بعد ما تختار موضوع لوحتك.. فكر بقى في الشكل اللي يناسبك.. ممكن تعمل لوحة من خشب أو فلين أو أي خامة تعلقها على الحيطة أو تسندها جنبك.. كل الفكرة والهدف من اللوحة دي إنها تكون دايمًا قدامك علشان تبص عليها يوميًا.. الموضوع عامل كده زي طاقة الجذب.. إن لما الحاجة تكون قدام عينك وتبقى مسيطرة على تفكيرك وكل شوية بتشوفها.. هتتحقق عشان أنت بشكل لا واعي وبشكل غير مباشر هتبقى بتشتغل على نفسك عشان تحققها.. بس ما علينا من الكلام العميق ده والنظريات تعالوا نرجع للوحة.
مش لازم تلتزم بشكل اللوحة التقليدية اللي بتشوفه على السوشيال ميديا.. فيه ناس بتعمل لوحات إلكترونية من على مواقع زي “Pinterest”.. أو بيعملوا فايل Powerpoint بيحطوا فيه الصور والـ Quotes اللي بيحبوها.. أهم حاجة اختار الشكل اللي يناسبك واللي مريحك وخلاص.
جمع صور ملهمة بتعبر عن أهدافك اللي انت جاوبت عليها في الأسئلة اللي فوق:
دور على صور حلوة بقى بتدعم الأهداف دي.. من أي حتة تقدر تجيب منها الصور.. واطبعها بقى وعلقها على اللوحة.. مثلاً، لو هدفك تروح جامعة معينة دور على صور للجامعة دي.. عايز تشتغل في مكان معين، حط صورة الشركة دي.. عايز تتعلم حاجة معينة، حط صور ليها.. ومحتاج تفاصيل.. يعني عايز تشتري موبايل معين، حط صورة الموبايل ونوعه واللون اللي إنت عايزه.. مش أي موبايل وخلاص.. ونفس الكلام على كل الأمثلة.
حط جمل وQuotes ملهمة بتحبها:
الـ Vision Board مش بس صور.. حط شوية جمل تحفيزية أو Quotes ليها معنى كبير ليك.. دور على جمل بتديك حافز ودافع أو اكتبها بنفسك بخط إيدك.. وممكن كلمات من أغاني أو أفلام أو مسلسلات.. أي حاجة بتقول ألو وبتديك طاقة إيجابية في المطلق.
نسق لوحتك:
لما تخلص الصور والجُمل.. جرب بقى تنسقهم مع بعض.. وممكن تشوف أمثلة على الإنترنت بس مش ضروري تقلّدهم يعني.. زي ما بيقولوا كده “أطلق العنان للفنان التشكيلي اللي جواك”.
وفيه بقى حتة Extra كده.. إن اللوحة يبقى الغالب فيها لون معين والناس اللي بتعمل كده اللي فاهمين في علم الألوان.. زي لو عايز اللوحة تكون محفزة لنشاط معين زي الرياضة، استخدم ألوان زي الأحمر اللي بيدّي طاقة.. ولو عايز هدوء وسلام نفسي، اختار ألوان هادية زي الأزرق.. أما لو مش بتفهم في الألوان فخلاص ماتركزش فيها.
وممكن كمان تجرب تحط صورتك في نص اللوحة وتخلي الصور والجمل حوالين صورتك.
وفي الآخر بقى إلصق الصور والجمل على اللوحة.. ومبروك بقى عندك Vision Board.
حط اللوحة في مكان تقدر تشوفها فيه كل يوم:
الفكرة من الـ Vision Board إنها تكون حاجة متشافة دايمًا قدامك تفكرك بالأهداف اللي نفسك تحققها.. عشان كده لازم تكون في مكان واضح تشوفه كل يوم.. مش جوا الدولاب.. مش تحت السرير.. مش ورا المكتب.. مش عالأرض.. ولو حسيت إن اللوحة حاجة شخصية ومش عايز حد يشوفها، ومالكش أوضة لوحدك.. ممكن تعمل لوحة إلكترونية زي فايل PDF أو Powerpoint بس تفتحها تبص عليها كل يوم.. والناس اللي ساعدتهم موضوع اللوحات ده بينصحوا إنك ماتبصش عليها نظرة سريعة وخلاص.. اقعد خمس دقايق قدامها وركز على الصور والكلمات اللي عليها، وحاول تفهمها كويس وتتخيل نفسك وأنت عايشها وبتحققها فعلا
بس خليك فاكر.. الـ Vision Board مش عصاية سحرية
هي مجرد أداة مفيدة بتساعدك تزود حماسك وتركز على أحلامك.. بس لازم تبقى فاهم إنها أكيد لوحدها مش كفاية عشان تحقق الأهداف.. هي مجرد لوحة في الأول والآخر.. ماتتوقعش إنك بمجرد ما تعملها كل حاجة هتحصل لوحدها، لأن النجاح محتاج شغل ومجهود مستمر.. فركز أكتر على خطواتك اللي لازم تمشيها عشان تحقق الأهداف دي وخلي عندك إيمان إن مجهودك دايمًا بيقربك من هدفك سواء دلوقتي أو بعدين.
ركز على العملية مش النتيجة بس.. سواء في اللوحة أو في حياتك
الـ Vision Board مفيدة عشان تخليك تتخيل الرحلة اللي هتوصلك للنجاح مش النتيجة النهائية بس.. والدراسات أثبتت إن الناس اللي بيقضوا وقت طويل يتخيلوا نجاحهم أحيانا بيقدّموا أداء أقل لما ييجي وقت الجد.. يعني مثلا، الطلاب اللي بيقضوا وقت طويل بيتخيلوا إنهم بيجيبوا درجات حلوة في الامتحان أداؤهم بيكون أضعف من الطلاب اللي ذاكروا فعلا وركزوا في المنهج أكتر من الوقت اللي قضوه في أحلام اليقظة.
وعشان كده، خلي في لوحتك صور وجُمل تلهمك للخطوات اللي محتاج تعملها، زي خطوات معينة في الشغل أو الرياضة أو التدريب أو التحويش.. مش بس لحظات النجاح.. عشان الـ Vision Board خطوة صغيرة في بداية طريق طويل، لكن مفيش حاجة هتعوض الشغل نفسه.
