اعرف قصة “أندرو تيت” اللي اتقبض عليه بسبب علبة بيتزا!
لو أنت متابع أخبار كويس هتلاقي خبر القبض على إنفلونسر اسمه أندرو تيت بتهمة الاتجار بالبشر.. لدرجة أنه كان من الـTOP10 في السيرش على جوجل في الفترة الأخيرة.
طب هو مين الراجل ده أصلا عشان يستحوذ على اهتمام الناس؟
هو شخص أمريكي بريطاني عنده 36 سنة اعتنق الدين الاسلامي وكان لاعب كيك بوكسنج محترف وحسب جريدة البريطانية حياته اتغيرت بعد ما اشترك في برنامج Big Brother وبدأت الأنظار تتوجه له وحس أنه له تأثير كبير خصوصًا على المراهقين اللي اهتم بيهم وقدم محتوى تعليمي بعد كده بيعرّفهم ازاي يكونوا ناجحين وإيه هي أساليب جمع الثروة من خلال مشروع اسمه Hustler’s University وبدأ يروج لنفسه وأفكاره من خلال منصات انستجرام ويوتيوب وتويتر.
ولو بصينا جوه دماغ أندرو تيت هنلاقيه بيفتخر بكونه صاحب ثروة كبيرة وكان حريص أنه ينقل خبرته للمراهقين وتنمية مهارتهم. من خلال دورات مدفوعة على الانترنت.
– وكان دايمًا بيقول إن الستات ماتنفعش في مناصب قيادية.
– وانتشر له فيديو شهير وهو بيعتدي على ست بالضرب.
طب إيه هي التهم الموجهة له؟
-اتشهر كراهية الستات والتحريض على العنف ضدهن لدرجة أنه تم حجبه في فترة من منصات تويتر وإنستجرام ويوتيوب.
– وتم اتهامه بتنظيم تشكيل عصابي لاستغلال البشر وابتزاز الستات والاتجار بيهم وتقديم عروض إباحية بهدف الربح وده اعترف بيه في انترفيو لـ The Mirror انه بيدير شركة كاميرا ويب لعروض نساء بالملابس الداخلية بهدف الترفيه.
– ومن ناحية تانية كشفت سيدات اتعرضوا لمحاولاته باظهار الاعجاب بيهم وحبهم بغرض اقناعهن وضمهن للتشكيل العصابي عشان يضموا ستات تانية يتم استغلالهم.
قصة القبض عليه غريبة جدًا…
بعد اختفاءه عن عيون الشرطة الرومانية هو وأخوه ومحاولات اعتقاله الكتير الفاشلة.. في الأخر قدروا يقبضوا عليه الخميس اللي فات وهو وأخوه المتهم برضه بتنظيم تشكيل اجرامي والاتجار بالبشر .
وده حصل بعد 24 ساعة من نشر فيديو له بيتكلم مع جمهوره وظهر في الفيديو علب بيتزا والتقارير بتقول ان الشرطة توصلت لمكانه اللي مستخبي فيه عن طريق اسم محل البيتزا واتحبس شهر على ذمة التحقيقات عشان يتم النظر في التهم الموجهة له.
وفي كلام سابق قال أندرو : ” لو انتشر خبر أنه تم إعتقالي بتهمة معينة.. الناس هتقول مستحيل يكون عمل ده”
