إيه هو اكتئاب رأس السنة.. وإزاي تتغلب عليه؟

الطبيعي إن رأس السنة أو بداية كل سنة الناس بتستقبلها بطاقة إيجابية وخطط وأحلام كلها طاقة ونشاط وده طبعا بدوره بيخليهم مبسوطين بيها لإنها بداية جديدة والكلام الإيجابي ده كله.. ولكن صوابعك مش زي بعضها فعلا ومش كل الناس بتبقى مبسوطة بالبدايات دي، فيهم منهم بيبقى قلقان منها ومنهم بيبقى بيحسب وبيحاسب نفسه على اللي عمله طول السنة وغيره من أسباب تانية تخلي فيه بعض الناس تستقبل بداية السنة وهم مش كويسين أو مكتئبين.

فلو بتحس إنك مش كويس أو مكتئب مع بداية السنة أو تعرف حد من صحابك بيبقى مش عايز يخرج ولا يقابل ناس ولا حتى يستقبل ناس في بيته يومها وبيحب ينعزل تعالى نقولك بعض الأسباب للاكتئاب ده حسب ما قال موقع “patient” وموقع “healingsolutions”:

1- القلق من المجهول:

بعض الناس بيحسوا بقلق مستمر بخصوص مستقبلهم والمجهول اللي مش عارفينه وبيقارنوا نفسهم وانجازاتهم في السنة اللي عدت بانجازات الناس اللي حواليهم سواء صحابهم أو قرايبهم وبيحسوا إنهم أقل من اللي المفروض يحققوه، وناس تانية بيبصوا على أهدافهم اللي عملوها في السنة اللي عدت وبيدركوا انهم ماحققوش منها اللي عايزينه.

2- محاسبة النفس:

السبب اللي بيخلي الناس تبقى عرضة أكتر لكتئاب بداية السنة هو إنهم بيستمروا في جلد ذاتهم وبيراجعوا غلطاتهم وبيبكوا على الأطلال وتجاربهم السيئة، ده غير فعلا الناس اللي بتعاني أصلا من الاكتئاب فالموضوع بيكبر بشكل لا إرادي عندهم بسبب ضغوط السنة الجديدة.

3- اكتئاب الشتاء:

رأس السنة بتيجي في أكتر جو شتوي في السنة.. وأيام الشتاء القصيرة واللي بتبقى مليانة غيوم أو النهار فيها قصير جدا والليل طويل بتسبب لبعض الناس حاجة اسمها الاضطراب العاطفي الموسمي واللي اسمه اكتئاب الشتاء، وبسبب نقص الشمس بتحصل بعض التغيرات في كيمياء المخ والهرمونات في الدماغ وبتخليهم يحسوا بالإحباط.. وده بيبقى سبب إن بعض الناس تحس باكتئاب رأس السنة.

4- ارتفاع سقف التوقعات: 

فترة رأس السنة بتكون مليانة توقعات عالية وتفكير وقرارت في السنة الجديدة والميكس ده ممكن يوصل لخساير أصلا.. ساعات بتكون رأس السنة بالنسبة لبعض الناس عبارة عن محطة عشان يقيموا نفسهم وصلوا لفين ومحتاجين يعملوا إيه وبالرغم إن الموضوع شكله إيجابي بس ساعات بيأثر بالسلب على صحة الشخص النفسية.

5- الوحدة:

أحيانا بتكون توقعات الشخص جبارة إنه هيسافر يقضي رأس السنة في الحتة الفلانية أو يقعد مع صحابة ويعملوا خطط أو يقضيه مع شريك حياته ولكن بيحصل أي ظرف وبيقعد لوحده في الأخر.. وطبعا في الأوقات دي ستوريز السوشيال ميديا بتبقى كلها في أماكن فيها سهر وسفر واحتفالات ولما الشخص بيشوفها وهو قاعد لوحده في البيت أكيد بيتضايق

ولو حسيت بأي اكتئاب في الأوقات دي ممكن تعمل شوية النصايح اللي قال عليها موقع “bridgestorecovery”: 

1- استقبل السنة الجديدة بقرارات تفيد صحتك النفسية:

استغل الوقت ده عشان تجدد أهدافك عشان صحتك النفسية، وخد قرارات إيجابية عشان بشكل ما بتديك أمل في السنة الجديدة، لكن بشرط تكون قابلة للتحقيق عشان ماتحسش بالفشل، زي مثلا: 

  • خلي فيه أشخاص حواليك بتخيلك مبسوط واقطع مع الناس المؤذية بالنسبة لك 
  • اطلب مساعدة لما تبقى محتاج حاجة من حد 
  • لو حاسس إن صحتك النفسية محتاجة تدخل، روح لشخص متخصص 

 القرارات دي فعلا هتقدر تنفذها ولما تعملها ثقتك بنفسك هتزيد وهتحس إنك قادر تتحكم في حياتك فعلا

2- فكر في إنجازتك وماتقارنش نفسك بالناس:

لو حسيت إنك فشلت في تنفيذ خططت السنة اللي فات أو قارنت نفسك بناس نجحت وأنت لا أو السنة اللي عدت كانت صعبة عليك، فممكن تبقى التفكير في الحاجات دي تجربة إيجابية، لكن لو فكرت فيه بشكل صح، زي مثلا لو عملت قايمة بالحاجات اللي أنجزتها مهما كانت صغيرة، مثلا لو كنت عامل خطة إنك تكسب 10 جنيه وكسبت 20 فاعتبر إن ده فوز، والأهم من ده كله بلاش تقارن نفسك بالناس لإن الدنيا مش منافسة، ولو حسيت إنك بتعمل كده كتير خد إجازة من السوشيال ميديا لإنها بتبقى السبب في ده أوقات كتير وبدل ما تقارن نفسك بالناس ركز على إنجازاتك وحياتك وقارن نفسك بنفسك وشوف إزاي اتطورت وإزاي تطور من نفسك أكتر

3- شتت نفسك:

شتت نفسك لإن التشتيت ميزة حلوة أوي تقدر تستخدمها عشان تهرب من التفكير السلبي، فلما تلاقي نفسك مدفون في أفكار سيئة، دور على نشاط يشغل عقلك وجسمك ومن ضمن الطرق دي الرياضة لإن الجسم لما بيكون مشغول صعب العقل يشتغل، أو اخرج اتمشى في الهواء أو اقرأ كتاب أو أسمع أغاني أو شوف صحابك وأخرج معاهم.

4- اعمل حاجة بتبسطك أنت:

مش لازم تكون ليلة رأس السنة عبارة عن حفلة كبيرة وفستان حلو وصحاب كتير، ممكن تعمل حاجات تانية غير تقليدية بس مفيدة أكتر لصحتك النفسية، زي إنك تقعد في البيت وتتفرج على أفلام بتحبها وتتجمع أنت وعيلتك أو أصحابك في البيت وتتفرجوا على أفلام وتاكلوا لب وسوداني وفشار.

5- تواصل مع الناس:

الإنعزال بيخلي الاكتئاب يكبر أكتر فمش هو الحل، لو حسيت إنك متضايق فعلا أو مكتئب أو حاسس بالوحدة فكلم حد بتحبه وبتثق فيه واطلب منه تقضوا ليلة رأس السنة مع بعض، أو ممكن تتصل بالدكتور بتاعك أو تلجأ لشخص متخصص يساعدك في حل المشاعر دي بدل من الإنعزال 

اكتئاب رأس السنة ظاهرة حقيقية، لكن لو بتعاني فده مش معناه إنك ماتقدرش تعمله حاجة، بس خليك سابقه بخطوة لو أنت عارف إن الوقت ده بيأثر على صحتك النفسية واتواصل مع أهلك أو صحابك واعمل عادات جديدة وحاول تبقى إيجابي وبطل جلد ذات، ولو محتاج لمساعدة أكبر اطلبها من الدكتور بتاعك

Related Articles

Back to top button