بعد تأهلها لأول مرة لدور الـ16 في أمم أفريقيا.. حاجات ماتعرفهاش عن موريتانيا
![](https://theglocal.com/wp-content/uploads/2024/01/WhatsApp-Image-2024-01-24-at-5.48.56-PM.jpeg)
بمناسبة صعودها لأول مرة في تاريخها لدور الـ 16 في نسخة أمم أفريقيا الحالية.. حبينا نتكلم شوية عن موريتانيا وتاريخها والحاجات المشهورة بيها وكمان تاريخها مع الكورة:
موريتانيا جغرافيًا:
على الرغم إنها بلد عربية ولكنها مش معروفة بشكل كبير ومش بتظهر قدامنا كتير وده سببه مكانها على الخريطة.. في الأول موريتانيا مساحتها حوالي مليون كم2 ومكانها أقصى غرب قارة أفريقيا وفي شمالها موجود المغرب وغربها المحيط الأطلنطي والجنوب الشرقي دولة مالي والجنوب الغربي السنغال وعشان كده اسمها مش بينتشر كتير في الإعلام.. لغتها الأصلية هي اللغة العربية وعدد سكانها حوالي 5 مليون نسمة.
التسمية:
موريتانيا اسمها الأصلي “بلاد شنقيط” والسكان كان اسمهم “الشناقطة”.. ماتستغربش احنا زينا زيك بالظبط لقينا اسمهم كده بس فرنسا لما استعمرتها ادتهم واحدة “أنا مايعجبنيش الشغل ده” وأطلقت بقى عليها اسم “موريتانيا”.
الغزل:
حسب Radiosawa.. بيقول إن منتشر ظاهرة في المجتمع الموريتاني اسمها “التبراع” ودي بيعرفها موقع الموزون المتخصص في الأدب الشعبي إنها أدب نسائي ملئ بالعاطفة والشوق ودايمًا بيكون الغرض منه الغزل.
الديانة:
حسب نفس الموقع موريتانيا بلد الديانة الواحدة.. بيقول الشعب الموريتاني إنه شعب مسلم 100% ومفيش أي مجموعات دينية غيرهم في البلد.
مميزات أخرى:
بلد فيها خمس لغات منهم 4 رسميين حسب الدستور الموريتاني.. أولهم العربي وبعده البولارية والألفية والسونونكية، وكلهم لغات أفريقية وفي لغة خامسة الزناكية وفي الغالب قربت تختفي من البلد.. وفي المجتمع التقليدي كانت الست بتحتفل بالطلاق وده مش بيحصل دلوقتي في كل الحالات ولكنه بيحصل كمان في العادات بتاعتهم إنهم بيضربوا 3 طلقات في الهواء من باب الاحتفال.. عندهم تقريبًا أكبر عدد من الرؤساء اللي لسه عايشين وهم حوالي 5 وده بسبب الانقلابات الكتير اللي بتحصل وبالتقريب ولاية كل واحد فيهم للبلد مازادتش عن سنتين.. وأشهر أكلة عندهم هي سمك بالرز واسمها “مارو الحوت”.
كرويًا:
امبارح موريتانيا فازت على الجزائر 1-0 وبقت في المركز التالت برصيد 3 نقط وجابوا 3 أهداف ودخل فيهم 4.. وكان أول فوز لموريتانيا على الجزائر على الرغم إنهم لعبوا 8 ماتشات ولكن الجزائر كسبت 5 واتعادلوا 3 ماتشات.. وتأهلت لأول مرة في تاريخها لدور الـ 16 في بطولة أمم أفريقيا
حسب الفيفا.. أعلى تصنيف وصله المنتخب الموريتاني في كرة القدم كان “81” وأقل تصنيف وصله كان “206” وتصنيفه الحالي “105”
أكبر نتيجة فاز بيها منتخب موريتانيا كانت 8-2 على الصومال.. أكبر نتيجة خسر بيها كانت 0-14 قدام غينيا
موريتانيا وصلت لأمم أفريقيا 3 مرات.. بس أول مرة تعدي من دور المجموعات كانت في نسخة البطولة دي