موضوع مايهمكش: 6 معلومات محتاج تعرفها عن لعبة الـ “Slinky” أو السوستة المطاطة

فاكر أول مرة قعدت تلعب فيها بلعبة “سلينكي” أو السوستة المطاطة  أو لما كانت عندك في البيت وبتلعب بيها وأنت اسمها وبتقول عليها البتاعة دي؟ وبالرغم من كونها لعبة بسيطة أوي إلا إنها انتشرت جدا في مصر في فترة التمانينات والتسعينات وظهرت كمان في شخصية “Slinky Dog” في فيلم “Toy story” اللي اتعرض أول مرة في سنة 1995 وتقريبًا كانت موجودة في كل بيت فيه أطفال في التسعينات.

وبمناسبة يوم الـ “سلينكي” هنقولك شوية معلومات ماتعرفهاش عنها حسب موقع “yahoo”:

1- مخترعه اكتشفه بالصدفة:

زي ألعاب كتير تم اكتشافها بالصدفة وانتشرت جدا وكانت حادثة سعيدة كمان.

مخترع اللعبة اسمه “ريتشارد جيمس” كان في ورشة عمل في “بنسلفانيا” لمحاولة تطوير قوة السفن الحربية، بعدين سوستة وقعت منه في الأرض واكتشف بالصدفة إنها بتتحرك بعد ما بتتصدم في الأرض وأدرك إن ممكن يبقى معاه منجم دهب في ايده.

2- زوجة مخترع اللعبة هي اللي سمتها “Slinky”

“ريتشارد جيمس” اكتشف اللعبة بالصدفة وزوجته هي اللي سمت الاختراع باسم “Slinky” ومعنى الكلمة الشئ المتعرج.

اكتشف “ريتشارد” اللعبة لما سافر لـ “بوليفيا” في الستينيات وبعد 8 سنين من تأسيسه شركة بتصنع اللعبة دي توفي في عمر 90 سنة.

3- اللعبة مابقتش زي ما كانت زمان:

طبعا مفيش حاجة بتفضل زي ما هي، ولعبة “Slinky” اختلفت دلوقتي عن تصميم ريتشارد الأساسي ليها، لكن الاختلاف حصل بتفاصيل صغيرة جدا، زمان أول ما تم اختراعها كانت نهايتها حادة لكن دلوقتي بقيت أطرافها ناعمة أكتر لمنع الحوادث والإصابات.

 

4- كانت بطلة حرب:

في حرب فيتنام الجنود كانوا بيستخدموها في أجهزة الراديو بتاعتهم عن طريق إنهم كانوا بيربطوا طرف منها فيهم ويحدفوا الطرف التاني فوق الشجرة عشان ياخدوا إشارة واضحة.

5- هي أطول من شكلها الحقيقي:

طول “Slinky”  الحقيقي من غير تمدد 2 بوصة بس لما تتحرك ممكن توصل لـ 15 قدم من غير ما تتقطع أو يحصل فيها أي أضرار، وده معناه إنها بتتمط 15 ضعف حجمها الأصلي.

6- راحت الفضاء:

سنة 1985 كانت “Slinky” جزء من تجربة انعدام التوازن على مكوك فضاء، ولقى الدكتور “ريا سيدون” إنها ليها تصرف تاني مختلف في الفضاء ومش ممكن تقع.

Related Articles

Back to top button